Драстичен пад на добивката на „ЕВН Македонија“

„ЕВН Македонија“ АД Скопје во текот на минатата година оствари добивка од 709,6 милиони денари (11,5 милиони евра) што е повеќе од двојно помалку отколку претходната година кога добивката на компанијата изнесувала 1,6 милијарди денари (27,2 милиони евра).

„ЕВН Македонија“ е дел е од австриската „ЕВН АГ“, а во рамки на македонската групација функционираат компаниите „ЕВН Хоме“, која има статус на универзален снабдувач со електрична енергија и снабдувач во краен случај, „ЕВН Снабдување“, која нуди услуги на корисниците кои се снабдуваат со електрична енергија на отворениот пазар, „ЕВН Електрани“, која се занимава со производство на електрична енергија и „Електродистрибуција“, која управува со дистрибутивната мрежа.

Стожерот на македонската групација, „ЕВН Хоме“ ги снабдува домаќинствата и малите потрошувачи кои не избрале снабдувач на слободниот пазар, кои одлучиле да бидат снабдувани од универзалниот снабдувач или поради одредени околности останале без снабдувач со електрична енергија. „ЕВН Хоме“ ги снабдува потрошувачите по цени и тарифи формирани согласно тарифниот систем за продажба на електрична енергија на потрошувачите донесен од Регулаторната комисија за енергетика(РКЕ).

Според податоците на РКЕ, „ЕВН Хоме“ лани има остварено продажба од 3.519.433.043 kWh по просечна цена од 6,4460 ден/kWh, со што има остварено вкупен приход од околу 369 милиони евра по основ на продадена електрична енергија. 

Најголем удел во продажбата на електрична енергија на „ЕВН Хоме“во 2025 година од 91,53 проценти  има категоријата домаќинства, додека 8,47 проценти од продажбата е насочена за малите потрошувачи.  Според РКЕ, остварената продажба на електрична енергија кај домаќинствата во 2025 година е за 4,95 проценти повисока од остварената продажба во 2024 година. 

 

„Продажбата на електрична енергија кај малите потрошувачи бележи пад од високи 22,72 проценти споредено со претходната 2024 година“, се наведува во годишниот извештај на РКЕ за 2025.

Оттаму објаснуваат дека зголемената потрошувачка на електрична енергија кај домаќинствата е во рамките на нормалните вредности и зависи пред се од временските услови, како што беа екстремно високите температури во летниот период во неколку бранови. Од друга страна, намалувањето на потрошувачката кај малите потрошувачи се должи на тоа што голем дел од компаниите се одлучиле своите потреби од електрична енергија да ги обезбедат од слободниот пазар поради стабилноста на цените, како и поради пониските цени на слободниот пазар од цените на регулираниот пазар за оваа категорија на потрошувачи.

„Понатаму, исто така дел од овие потрошувачи инсталираа фотонапонски панели со цел дел од  потребите да обезбедат од сопствено производство на електрична енергија“, посочуваат од РКЕ.