„НЛБ Фонд“ го купи македонскиот „Генерали Инвестментс“ за 2,5 милиони евра

Во блок-трансакција вредна 153,8 милиони денари (2,5 милиони евра) денеска на Македонската берза се продадоа 93.574 акции од инвестицискиот фонд „Генерали Инвестментс“. Станува збор за 100 проценти од основната главнина на друштвото, а акциите се продадоа по цена од 1.644,24 денари за акција. Купувач е словенечкиот „НЛБ Фонд“ (NLB Skladi).

Од „Генерали Инвестментс“ соопштија дека „НЛБ Фонд“ по добивањето на сите релевантни одобренија, успешно го завршил преземањето и дека купопродажниот договор со компанијата „Генерали Инвестментс“ Д.О.О Љубљана бил склучен во ноември 2023 година.

Блаж Бродњак, извршен директор на НЛБ по повод купопродажбата изјави дека Македонија е еден од стратешки најважните пазари за „НЛБ Групацијата“, која одржува силно присуство на пазарот.

„‚НЛБ Банка Скопје‘ е трета по големина банка на групацијата во однос на вкупната актива, заземајќи системски важна позиција со пазарен удел од повеќе од 16 проценти мерено според вкупната актива и над 20 проценти кај кредитите и депозитите кај населението. Од друга страна, гледаме многу можности за раст, затоа веќе имаме основано лизинг компанија во Македонија на крајот на 2022 година, а сега го комплетираме нашето портфолио на производи со услуги за управување со средства“, вели Бродњак.

Лука Подлогар, претседател на Управниот одбор на „НЛБ Фонд“ рече дека во „НЛБ Групацијата“ веруваат во развој на инвестициски производи во регионот на Југоисточна Европа.

„Македонија е особено интересна во овој поглед, бидејќи пенетрацијата на инвестициските производи е многу мала, од друга страна, пазарот е доволно развиен и приемчив на ваква понуда, затоа гледаме многу можности за раст“, вели Подлогар.

Тој додаде дека по завршувањето на трансакцијата, на клиентите наскоро ќе им биде понуден проширен опсег на средства. Исто така појасни дека намерата на групацијата во делот на управувањето со средства e да се организира во рамките на „НЛБ Фонд“.

„НЛБ Фонд“ е најголемата компанија за управување со фондови во Словенија, како и најголема компанија за управување со средства според вкупните средства под управување.

„Компанијата ја одржува својата водечка позиција на пазарот долги години и постојано остварува најголем удел од приливите, а воедно е компанија на која и веруваат голем број Словенци“, се наведува во соопштението.

„Генерали Инвестментс“ АД Скопје е трето по големина друштво за управување со инвестициски фондови на македонскиот пазар, со пазарен удел од 18 проценти. Компанијата управува со приближно 48 милиони евра средства на клиентите во четири различни инвестициски фондови (два акциски, еден паричен и еден комбиниран).

 

Во моментов нема коментари за веста. Биди прв да коментира...

Остави коментар