Рекордна добивка на НЛБ, дивидендата повисока за 100 отсто

„НЛБ групацијата“ оствари над милијарда евра приходи минатата година, со што успеа да ги исполни планираните проекции. Во 2023 година НЛБ има вкупен приход од 1.093,3 милиони евра, што е за 37 отсто повеќе во однос на 2022 година. За растот на приходите најмногу придонеле нето-приходите од камати, кои лани изнесувале 833,3 милиони евра и забележале раст од 65 отсто во однос на претходната година. Добивката по оданочување изнесува 550,7 милиони евра, што е речиси четвртина повеќе. Сето ова е причина за значителното зголемување на висината на дивидендата.

Преку исплата на дивиденда во 2024 година, банката планира да прераспредели 40 отсто од добивката од претходната година на две транши. Тоа значи 220 милиони евра, што е вкупно 11 евра по акција, односно зголемување од 100 отсто во однос на претходната година. Република Словенија како најголем акционер во буџетот ќе добие 55 милиони евра“, велат од банката.

Според нив, ваквиот начин на плаќање на акционерите нема претерано да ја намали способноста на банката за планиран органски раст или раст преку натамошни аквизиции и спојувања, а во исто време банката ќе избегне прекумерна акумулација на капитал.

„Најавената дивиденда го надминува консензусот и нашите очекувања - тоа значи дивиденден принос од 10,6 отсто, цената на акцијата веројатно ќе продолжи да расте“, оценува аналитичарот Владан Павловиќ од „Ипопема секјуртис“.

Според него, резултатите во најголем дел се во согласност со општите пазарни очекувања, освен во случајот на нето-добивката, која е многу повисока поради даночниот третман.

Добри резултати очекуваа и акционерите, само во денешното тргување вредноста на акцијата порасна за 2,5 отсто и моментално изнесува околу 105 евра. „И покрај неодамнешниот пораст на цените на акциите, тие остануваат атрактивни во светло на очекуваното деловно работење во 2024 и 2025 година“, вели Лојзе Козоле, аналитичар во брокерската куќа „Илирика“.

На годишно ниво, резултатот пред исправка на вредност и резервации изнесува 591,4 милиони евра, што е за 75 отсто повеќе во однос на претходната година.

Дополнително, „НЛБ групацијата“ призна одложена даночна обврска за даночно задржување од дивиденди во износ од 9,6 милиони евра. Ефективната даночна стапка на НЛБ, без да се земе предвид ревалоризацијата на одложените даночни средства, ослободените од данок и ослободените од данокот од исправка на вредноста на капиталните инвестиции, на ниво на групација изнесува 12 отсто.

Доминираат станбените кредити и фиксните каматни стапки

„Кредитната активност во 2023 година беше умерена, но стабилна“, велат од НЛБ. Банката лани во однос на претходната година бележи пораст на бруто-кредитите во износ од материјални 666,2 милиони евра или пет отсто. За растот во голема мера придонесоа кредитите на населението (491,9 милиони евра или седум отсто), скромни 92,1 милиони евра (проценти) од деловниот сегмент и 82,3 милиони евра од кредитите на државата.

„Кредитното портфолио остана добро диверзифицирано и немаше висока концентрација во ниту една индустрија или клиентски сегмент“, нагласуваат оттаму. Станбените кредити продолжуваат да доминираат во портфолиото на домаќинствата и остануваат во фокусот. Од гледна точка на каматните стапки, за речиси 66 отсто од кредитното портфолио се користеше фиксна каматна стапка, а за преостанатиот дел од портфолиото како референтна стапка се користеше Еурибор. Најголемиот дел од кредитното портфолио (82 отсто) е деноминиран во евра, додека остатокот е изведен од локалните валути на банките членки на групата.

Каматната маржа скокна на 3,5 отсто

Трошоците за финансирање растеа побавно од каматните стапки на средствата и, како резултат на тоа, годишната нето-каматна маржа на групацијата се подобри за 1,21 процентен поен, на 3,5 проценти во 2023 година. Годишната оперативна маржа достигна 4,75 проценти, што претставува зголемување од 1,19 процентни поени во споредба со истиот период минатата година, главно поради растот на нето-приходите од камати.

Подобреното финансиско работење резултираше со ROE по оданочување од 21 отсто, што претставува зголемување од 8,8 процентни поени на годишно ниво (во споредба со 12,2 отсто во 2022 година без негативен гудвил).

Како одработе „НЛБ банка“ Скопје

Во 2023 година „НЛБ банка“ забележа раст на вкупните кредити од 4,3 отсто и зголемување од 10,1 проценти кај кредитирањето во секторот домаќинства во однос на 31.12.2022 година, како резултат на зголемениот пласман на потрошувачките и станбените кредити. Истовремено, вкупните депозити пораснаа за 2,6 отсто споредено со истиот период претходната година.

Нето-добивката на банката изнесува 3.216.860 илјади денари (52,3 милиони евра), со остварени вкупни приходи од над 100 милион евра. Приходите од камати изнесуваат 64,6 милиони евра.