Како работеше НЛБ: Приходите поголеми, добивката помала

Во третиот квартал НЛБ остварилa приход од речиси 320 милиони евра, додека нето-добивката изнесува 135,5 милиони евра, објавено е вчера на веб-страницата на Љубљанската берза.

Во претходниот квартал приходите биле помали, 305,9 милиони евра, но нето-добивката е поголема и изнесува 152 милиони евра. Во третиот квартал од минатата година банката остварила 289,2 милиони евра приход и 144,5 милиони евра добивка.

Во текот на првите три квартали од годинашното работење, банката остварила вкупно 427,5 милиони евра нето-добивка, што е за 10 проценти повеќе во однос на истиот период лани. Аналитичарите неодамна прогнозираа дека 500 милиони евра нето-добивка на годишно ниво е достижна цел.

Групацијата продолжува да расте со осум проценти органски раст на кредити во споредба со крајот на 2023 година, а потенцијалот за понатамошен раст е дополнително зголемен во септември со успешното преземање на „СЛС група“ (SLS Group) со подружници лизинг-компании во Словенија („Самит лизинг Словенија“, Љубљана) и во Хрватска („Мобил лизинг“, Загреб), се наведува во извештајот. Покрај лизингот, дополнително се зајакнуваат управувањето со имотот и банкарското осигурување. „Уште поголем придонес кон резултатите и влијанието имаат банките членки на Групацијата од пазарот на Југоисточна Европа (ЈИЕ), каде што сите банки бележат добивка и придонес во заедничкиот резултат на Групацијата од 57 проценти“, се посочува во извештајот.

Претседателот на Управниот одбор на НЛБ, Блаж Бродњак, при објавувањето на резултатите рече: „Нашите деловни резултати во последните три месеци, кога пазарите во ЈИЕ стануваат сè поважни, како и пошироките економски трендови, укажуваат на нешто што ние во ’НЛБ групацијата’ веќе долго време го чувствуваме: промените се на видик. Меѓутоа, ние во ‘НЛБ групацијата’ не само што ги следиме тие промени туку често и поставуваме некои од трендовите“.

Нето-приходите од камати во третиот квартал изнесуваат 233,7 милиони евра, што претставува раст од два процента (5,5 милиони евра) во однос на претходниот квартал. Приходите од камати на кредити се зголемени за 10,9 милиони евра поради зголемениот обем на кредити, додека приходите од камати од состојби кај банките и централните банки се намалени за 4,7 милиони евра.

Нето-некаматниот приход (NNII) пораснал уште побрзо, забележувајќи раст од 11 проценти во третиот квартал од 2024 година, кога достигнал 86,2 милиони евра.

Се зголемува обемот на депозити на сметките на населението

Обемот на депозити на сметките на домаќинствата се зголемува, а вкупните трошоци се зголемени за четири отсто, на 148,7 милиони евра, што делумно е последица на трошоците поврзани со преземањето на групацијата СЛС.

Растот на кредитното портфолио продолжил и бележи зголемување од 14 проценти во однос на претходниот квартал. Во Словенија деловната активност значително се зголемила во вториот квартал, а високата продажба на нови кредити продолжила да расте и во третиот квартал.

„Депозитната база на Групацијата се зголеми за 641,2 милион евра во однос на крајот на 2023 година и достигна 21,37 милијарда евра. Ова зголемување е резултат на растот на депозитите на населението, додека корпоративните и државните депозити останаа стабилни во однос на крајот на 2023 година“, се посочува во извештајот.

Очекувањата на аналитичарите

Аналитичарите очекуваа нешто послаби резултати за третиот квартал во однос на вториот квартал.

Пред објавувањето на резултатите, Владан Павловиќ од компанијата „Ипопема“ (Ipopema) изјави: „Во третиот квартал притисокот ќе биде присутен и на расходната и на приходната страна. Не треба да се заборави и данокот на имот на банките во Словенија, кој го немаше во третиот квартал лани. Присутен е и континуиран притисок врз платите на вработените, што е проблем во целиот регион, каде што сите страдаат од недостиг од работна сила“.

Затоа банката е принудена да ги зголеми и платите, за што се обезбедени резерви, кои веројатно ќе бидат повисоки од претходната година, барем ако се суди според најавата на банката околу трошоците за ризик. Притоа, на страната на приходите, нема да можеме да постигнеме толку силен раст со кој сето тоа би се неутрализирало, со оглед на почетокот на падот на каматните стапки“.

Тој смета дека врвот на нето-профитната маржа е забележан некаде во четвртиот квартал од минатата година и првиот квартал од годинава. „Реално е можно да има помал пад на добивката во овој квартал, околу 15 отсто, што е во согласност со консензусот и не е ништо негативно или неочекувано. Сметам дека околу 500 милиони евра добивка е сосема солиден резултат“.  НЛБ во третиот квартал имаше 11 проценти помала добивка во однос на претходниот.

Аналитичарите на „Блумберг“ очекуваа повеќе

Ги проверивме и прогнозите за нето-добивката на НЛБ преку терминалот на „Блумберг“. Аналитичарите во просек (консензус) предвидуваа дека НЛБ во третиот квартал ќе прикаже нето-добивка од 139 милиони евра. Тоа значи дека остварената добивка од 135,5 милиони евра е под просекот на очекувањата на аналитичарите.

Во претходниот квартал аналитичарите предвидуваа добивка од 131,5 милион евра за НЛБ, но банката значително ја надмина таа прогноза и прикажа добивка од 152 милиони евра.

Консолидација на „Самит лизинг“

Јован Сикимиќ од „Рајфајзен банка интернешнл“ (Raiffeisen Bank International) веќе најави пред објавувањето на резултатите за третиот квартал дека НЛБ за првпат ќе ја консолидира неодамна преземената компанија „Самит лизинг“, што позитивно ќе се одрази на вкупниот износ на кредитите, како и на оперативниот резултат на банката (иако овој ефект врз добивката на групацијата би требало да биде главно неутрален, како што неодамна објави раководството на банката).

Сикимиќ предвидуваше дека резултатот ќе биде солиден, без поголеми флуктуации. Исто така, имајќи предвид дека еуриборот е релативно стабилен во третиот квартал, тој сметаше дека каматната маржа ќе остане приближно на исто ниво како во вториот квартал или малку пониска поради падот на каматните стапки во Србија: „Кредитниот раст веројатно ќе биде, како и во претходните квартали, многу солиден, како во Словенија така и во странство, со вкупен раст од шест до седум проценти во однос на крајот на 2023 година, што донекаде ќе го ублажи влијанието на пониските маржи“.

„Во третиот квартал очекувам натамошен раст на приходите. Што се однесува до ризикот, не гледаме закани за работењето на банката, така што профитот треба да расте, освен во случај на вонредни околности“, рече Михаел Антолиќ од „Интеркапитал“ (InterCapital). Тој предвиде и зголемување на трошоците, пред сѐ  поради интеграцијата со „Самит лизинг“ и инфлацијата, особено поради зголемувањето на платите. Тој очекуваше натамошен раст на кредитите и на депозитите (негативното влијание на намалувањето на приходите поради пониските каматни стапки ќе се ублажи со растот на новите кредити), додека кредитите треба да растат побрзо поради ниските стапки на принос на депозитите.

Што велат аналитичарите за акциите на НЛБ

Интересно е што аналитичарите очекуваат акциите на НЛБ и понатаму да имаат потенцијал за раст. „На среден рок, акциите сè уште изгледаат релативно евтино во споредба со слични банки во Централна и Источна Европа (ЦИЕ), така што мислам дека имаат потенцијал за раст, особено ако приказната за ’Адико банка’ (Addico) повторно се активира“, рече Сикимиќ.

И Антолиќ нагласи дека акциите на НЛБ имаат потенцијал за раст. Тоа се оправдува со тоа што коефициентот P/B (односот на пазарната и книговодствената вредност) е околу 0,8, додека стандардот во финансиската индустрија е околу еден, а некои други големи регионални банки имаат многу поголем коефициенти. На пример, кај „Загрепска банка“ книговодствената вредност е повеќе од 2,5 пати поголема. НЛБ постигнува стабилни растечки резултати, а неодамна објави и втора дивиденда, но треба да се има предвид геополитичкиот и макроекономскиот контекст, како и расположението на инвеститорите.

Во моментов Павловиќ не гледа причина зошто акциите би можеле да изгубат вредност. Добивката од 500 милиони евра годинава би била повеќе од доволна за следната година повторно да ја зголемат дивидендата: „Со оглед на тоа што дивидендниот принос сè уште е многу атрактивен, околу 6,4 отсто нето на годишно ниво, верувам дека пад на цената на акциите не е можен. Уште повеќе, поверојатно е дека акциите ќе продолжат со мал раст“.

Како долгорочно ќе се движи цената на акцијата, според Павловиќ, веројатно зависи од тоа колку добро банката ќе успее да го компензира притисокот врз приходите од камати со зголемување на обемот на вложени средства и зголемување на приходите од надоместоци и од провизии.

Во моментов нема коментари за веста. Биди прв да коментира...

Остави коментар