НЛБ влегува на автопазарот: Купува веб-платформа за продажба на возила

Групацијата НЛБ преку својата новоформирана компанија „НЛБ Кар и гоу“ (NLB Car&Go) ја купува словенечката веб-платформа за продажба на возила „доберавто.си“ (DoberAvto.si), којашто е во сопственост на Автомото сојузот на Словенија (Avto-moto zveza Slovenije - AMZS). Групацијата за целите на оваа трансакција минатиот месец ја основала „НЛБ Кар и гоу“ како друштво за управување со интернет платформи и склучила договор за пренос на бизнисот со АМЗС.

На веб-платформата „доберавто.си“ може да се забележи дека веќе се нудат возила на лизинг преку компанијата „НЛБ хитри лизинг“ (NLB Hitri Lizing).

Од „НЛБ групацијата“ на прашањата од словенечката редакција на „Блумберг Адрија“ околу оваа аквизиција одговорија дека ги зајакнуваат нивните активности.

„Лизингот станува се поважна стратешка активност на ‚НЛБ Групацијата‘. Бидејќи овие услуги ефективно ги задоволуваат потребите на клиентите, ‚НЛБ Групацијата‘ одлучи постепено да ја прошири оваа активност: прво со влез на словенечкиот пазар со „НЛБ Леасе и го“ (NLB Lease&Go) во пролетта 2020 година, а потоа со две нови лизинг компании основани во 2022 година во Северна Македонија и Србија“, информираат од групацијата.

Оттаму додаваат дека во септември оваа година, НЛБ успешно го заврши и купувањето на групацијата СЛС и со тоа стана сопственик на „Самит Лизинг Словенија“ и нејзините подружници.

„Основањето на „НЛБ Кар и гоу“  и потпишувањето на договорот за купување на платформата доберавто.си е само следниот чекор во зајакнувањето на нашите активности во оваа област, додека се‘ уште ги чекаме сите потребни регулаторни одобренија. Како и секогаш, ќе ги известиме заинтересираните чинители за секоја релевантна деловна одлука во согласност со берзанските правила“, посочуваат од групацијата.

НЛБ е една од најголемите финансиски групации во Словенија и во регионот, а во Македонија моментално има три поврзани друштва: „НЛБ Банка“ АД Скопје, лизинг компанијата „НЛБ Леасе и го“ ДОО Скопје и друштвото за управување со отворени и затворени инвестициски фондови „НЛБ Фондови“ АД Скопје.

За оваа концентрација на капиталот е известена македонската Комисија за заштита на конкуренцијата од каде што констатираат дека таа се однесува на „дигиталниот пазар за нови и користени возила“.

„Врз основа на прелиминарното испитување Комисијата утврди дека предметната концентрација може да потпадне под одредбите на Законот за заштита на конкуренцијата. Сепак конечната одлука по ова прашање е резервирана. Комисијата ги повикува заинтересираните трети страни да достават забелешки и мислења за оваа концентрација“, соопшти Комисијата.

Текстот е надополнет со одговор на „НЛБ групацијата“.

Со помош на Урош Божин

 

Во моментов нема коментари за веста. Биди прв да коментира...

Остави коментар