„НЛБ Банка“ оствари добивка од 44,1 милиони евра за девет месеци

„НЛБ Банка“ АД Скопје во периодот јануари-септември годинава оствари нето добивка во износ од 2,7 милијарди денари (44,1 милиони евра), што претставува зголемување за 11,6 проценти во однос на остварената нето добивка во истиот период претходната година.

„Зголемувањето се должи на континуирани продажни активности на кредитните продукти со посебен фокус на домаќинствата, микро, малите и средни претпријатија, зголемен број на корисници на платните сервиси на банката, како и позитивните трендови на финансиските пазари“, информираа од банката.

Од „НЛБ Банка“ во претстојниот период очекуваат да се одржи макроекономската стабилност на државата како резултат на економскиот раст, намалувањето на стапката на невработеност, стабилизацијата на инфлацијата и намалувањето на каматните стапки.

„Рејтингот на државата BB+ со стабилна перспектива, беше потврден од агенцијата за кредитен рејтинг ‚Фич‘, како резултат на веродостојните и конзистентни макроекономски политики кои го поддржуваа стабилниот девизен курс (де факто фиксниот девизен курс)на денарот во однос на еврото. Забрзувањето на растот на БДП се очекува да биде воден од владините капитални инвестиции во инфраструктурни проекти, како и од приватните инвестиции и потрошувачката“, наведуваат од банката.

Сепак, оттаму укажуваат дека неизвесност за идната макроекономска стабилност и понатаму постои преку ризиците поврзани со глобалните фактори и геополитички случувања.

„Во вакви околности ‚НЛБ Банка‘ и понатаму делува во насока на поддршка на приватниот  сектор во земјата, со што има значаен придонес во макроекономскиот и финансискиот амбиент на државата. Притоа, банката и понатаму ја има водечката позиција во полето на дигитализацијата, технолошките иновации, примената на вештачката интелигенција и силната посветеност кон заштита на животната средина и социјалните аспекти“, велат од банката.

Од НЛБ додаваат дека дигитализацијата се зајакнува преку унапредување на капацитетите на дигиталните канали со што се обезбедува повисоко ниво на достапност на банката и подобро искуство на клиентите како и поддршка на клиентите преку зајакнување на улогата на контакт-центарот. Дополнителен фокус е ставен и на проширување на палетата на производи и услуги преку продажбата на различни банкарски и небанкарски производи и зголемување на квалитетот на услугите.

Од „НЛБ Банка“ посочувааат дека ги препознаваат ризиците од климатските промени и проактивно ги акцентираат „ЕСГ - зелените кредити“ односно кредитирањето во области за производство на електрична енергија од обновливи извори, намалување на загадувањето и подобрување на животната средина.