Блаж Бродњак поднесе оставка од Надзорниот одбор на „НЛБ Банка“ АД Скопје

„НЛБ Банка“ АД Скопје информира дека на 10 октомври годинава Блаж Бродњак поднел оставка од функцијата претседател на Надзорниот одбор на „НЛБ Банка“ АД Скопје.

„До добивање на согласност од гувернерот на Народната Банка на Република Северна Македонија за именување на нов член на Надзорниот одбор на банката, Блаж Бродњак ќе продолжи да ја извршува својата функција како претседател на Надзорниот одбор на банката“, информираат од „НЛБ Банка“ АД Скопје.

Како што велат од НЛБ Групацијата „промената на Надзорниот одбор на ‚НЛБ Банка‘ Скопје се планира веќе извесно време, бидејќи досегашниот претседател на Надзорниот одбор на банката, Блаж Бродњак, на оваа функција беше повеќе од 7 години и по последните активности за преземања, презема и други должности во рамките на членките на НЛБ Групацијата“.

Оттаму потенцираат дека Бродњак останува претседател на Надзорниот одбор на „НЛБ Банка“ АД Скопје до назначувањето и добивањето на сите потребни одобренија на неговиот наследник/наследничка, што, со целосна доверба кон новото раководство на банката, ќе овозможи непречен и континуиран процес на нејзиното работење во иднина.

„Во секој случај, Блаж Бродњак во улога на претседател на Управниот одбор на матичната банка НЛБ д.д. во рамките на својата линија на известување, има целосен ангажман во натамошните развојни активности на НЛБ Групацијата на стратешки исклучително важниот пазар на Република Северна Македонија“, додаваат од групацијата.