Со раст на единечната нето-добивка од седум отсто ги заврши првите девет месеци годинава најголемата фармацевтска компанија „Алкалоид“. Во финансиските резултати за периодот од јануари до крајот на септември е прокнижена добивка од 1.531.840 илјади денари (24,9 милиони евра). Остварената консолидирана нето-добивка во 2025 година изнесува 1.487.455 илјади денари (24,2 милиони евра) и во споредба со остварената во 2024 година бележи зголемување од осум отсто.
Вкупните остварени единечни приходи во периодот јануари–септември 2025 година изнесуваат 10.789.845 илјади денари (175,4 милиони евра) и во споредба со остварените во истиот период во 2024 година бележат раст од пет проценти. Во структурата на вкупните приходи најголемо учество или 94 проценти имаат приходите остварени од продажба на производи и на услуги, кои во споредба со остварените во 2024 година бележат раст од два отсто. Од компанијата објаснуваат дека во 2024 година имале раст на продажбите од 14 отсто.
„Како докажан партнер на јавното здравство, компанијата активно учествува во обезбедувањето најсовремени ретки и специфични терапии преку застапување на производите на светски реномирани фармацевтски производители, обезбедувајќи значајна поддршка за здравствениот систем во земјава. Иако профитабилноста на овие програми е ограничена, тие значително го зголемуваат учеството на домашниот пазар во вкупните консолидирани продажби, каде што се остварени 35 проценти. Во споредба со истиот период од минатата година, продажбите во земјава бележат раст од 17 проценти“, се наведува во образложението.
Инаку, странските пазари заземаат 65 отсто од вкупните консолидирани продажби. Продажбите на странските пазари во првите девет месеци од 2025 година бележат раст од два отсто во однос на минатата година.
Вкупните остварени консолидирани приходи во периодот јануари–септември 2025 година изнесуваат 15.742.664 (околу 256 милиони евра) илјади денари, што е за девет проценти повеќе од истиот период минатата година.
Според единечниот биланс на успех, во периодот јануари–септември 2025 година продажбите достигнуваат 10.180.866.920 денари (165,5 милиони евра), што е за два процента повеќе во споредба со истиот период од минатата година. Вкупните консолидирани продажби, пак, достигнуваат 15.191.149.664 денари (246,6 милиони евра), што е за седум проценти повеќе во споредба со истиот период од минатата година.
Во овој период единечните расходи се зголемиле за четири проценти во однос на минатата година и се на ниво од 9.131.160 илјади денари (148,5 милиони евра). Во исто време консолидираните расходи се зголемиле за девет проценти.
Во анализираниот период цената на акцијата на компанијата порасна за над 31 отсто. „Движењето на цената на акцијата е во рамките на трендот на просечниот годишен раст и се должи на редовното и транспарентно објавување позитивни резултати од работењето на компанијата, позитивното јавно мислење, на довербата во нашите производи, управувањето со Друштвото и на генералниот тренд на движење на глобалните и на регионалните берзи“, се истакнува во образложението.
Во бизнис-планот за следната година друштвото предвидува да инвестира околу 8 отсто од консолидираните приходи од продажби во материјални и во нематеријални средства. Предвиден е раст од осум проценти на консолидираните продажби во однос на реализираните во 2024 година, како и раст од 7 проценти на консолидираниот профит пред оданочувањето во однос на 2024 година.
Од компанијата наведуваат дека глобалните безбедносни кризи ги отежнуваат економскиот амбиент и предвидливоста, што секогаш може да влијае и врз цените на енергентите, да создаде тешкотии во синџирите на испораки, но и на достапноста на одредени материјали. „Дополнително, потенцијалниот ризик од глобална трговска војна може да предизвика нови покачувања на цените на суровините и да доведе до зголемени трошоци во работењето. Внимателно го следиме развојот на настаните и преземаме мерки за ублажување на овие потенцијални ефекти“, се наведува во извештајот.
.webp){kind=icon}
