„Емирати“ потпиша договор со „Спејс екс“ на „Старлинк“ за вај-фај за време на лет

Авиокомпанијата „Емирати“ (Emirates) потпиша договор со „Спејс екс“ (SpaceX) на „Старлинк“ (Starlink) за имплементација на вај-фај (Wi-Fi) интернет во целата флота на авиони со широк труп, што за Илон Маск претставува голема победа во натпреварувањето со конкуренцијата за поврзување кога станува збор за превозниците од Блискиот Исток.

„Старлинк“ овој месец ќе почне да работи во авионите „боинг 777“ во сопственост на „Емирати“, додека во „ербас A380“ ќе биде во функција од февруари, соопшти денеска авиокомпанијата со седиште во Дубаи. „Емирати“ планира да опремува околу 14 авиони месечно, а воведувањето интернет се очекува комплетно да заврши до средината на 2027 година.

 

„Блумберг“ претходно објави дека „Емирати“ треба да го објави договорот со „Старлинк“ на тековниот авиосаем што се одржува во Дубаи (Dubai Air Show).

Освојувањето на авиокомпанијата „Емирати“ како клиент е клучно за сателитската мрежа во сопственост на „Спејс екс“, со оглед на тоа што превозникот е најголемата меѓународна авиокомпанија и е глобално признаен за премиум услуга.

„Катар ервејс“ (Qatar Airways) беше првата авиокомпанија на Блискиот Исток што го понуди „Старлинк“, почнувајќи од летовите минатата година. „Спејс екс“ исто така им го понуди производот на „Галф ер“ (Gulf Air) и „Флај Дубаи“ (Flydubai) и склучи договор со водечката авиокомпанија на Саудиска Арабија, „Саудија“ (Saudia), објави „Блумберг“ во август.