„Спејс екс“ на Маск додава милијарди долг, намалува трошоци за камати

Елон Маск е познат за финансиска алхемија. Неговата најнова вештина: додавање милијарди долари долг на неговата бизнис империја која троши готовина, додека истовремено го намалува годишниот товар од камати.

„Спејс екс“ („SpaceX“) во вторник продаде обврзници со инвестиционен рејтинг во вредност од 25 милијарди долари, што го означи последниот чекор за замена на скапиот долг кој помогна да се финансира аквизицијата на „Екс“ („X“) во 2022 година (тогаш познат како „Твитер“), како и скапите заеми и обврзници издадени од лабораторијата за вештачка интелигенција „Екс еј-ај“ („xAI“) минатата година за да се покрие брзиот одлив на готовина.

Тие компании би потрошиле приближно 1,8 милијарди долари за сервисирање на комбиниран долг од 17,5 милијарди долари оваа година доколку не беа интегрирани во „Спејс екс“. Сега бизнисот треба да плаќа 1,5 милијарди долари годишно за камати на својата прва продажба на обврзници од 25 милијарди долари.

Пред историската иницијална јавна понуда на „Спејс екс“ вредна 75 милијарди долари порано овој месец, Маск ги спои многу од своите различни компании во конгломерат кој инвеститорите го пречекаа со воодушевување, иако тој сè уште не остварува профит.

Трилионерот ефективно ги искористи приходите од продажбата на сателитски интернет преку „Старлинк“ („Starlink“) и ракетните договори на „Спејс екс“ со американската влада за да го поддржи големото трошење на „Екс еј-ај“, кој ја поседува „Екс“, преименуваната апликација за социјални медиуми.

„За да инвестираш во ова, суштински мора да бидеш верник,“ изјави Арт Хоган, главен пазарен стратег во „Б. Рајли“ („B. Riley Wealth“). „Мора да веруваш дека приходите значително ќе се зголемат во наредните години.“

Побарувачката за долгот на „Спејс екс“ сугерира дека многу инвеститори имаат доверба. Понудата доби нарачки во вредност од 89 милијарди долари на својот врв, ниво на пазарна желба што му овозможи на компанијата да обезбеди пониски трошоци за камати за време на процесот на маркетинг.

Купувачите на обврзници беа желни да учествуваат иако акциите на „Спејс екс“ се колебаа на берзата, губејќи околу една четвртина од својата вредност во текот на три сесии пред да направат мало закрепнување во вторник.

Претставник на „Спејс екс“ веднаш не одговори на барањето за коментар.

Досега, инвеститорите со задоволство ја искористија можноста да добијат дел од огромната компанија на Маск, но „Спејс екс“ сега мора да докаже дека може да балансира толку различни бизнис модели и на крај да ја претвори својата ВИ дејност во предност, а не во товар.

 

ВИ должничко лудило  

Пристапот до пазарот на обврзници со инвестициски рејтинг беше клучен за поддршка на амбициите на „екс Еј-Ај“ да се натпреварува со компании како „Антропик ПБС“ („Anthropic PBC“) и „Опен Еј-Ај“ („OpenAI“).

Претходно, неговиот ризичен кредитен профил му дозволуваше да продава само левериџирани заеми и обврзници со висок ризик, каде долгот е скап. Но откако „Спејс екс“ го презеде „екс Еј-ај“ во февруари, а потоа доби инвестицски рејтинг од водечките кредитни оценувачи, се отвори пристап до поевтиниот американски пазар на обврзници со висок рејтинг.

Тоа исто така му даде на „Спејс екс“ пристап до подлабоки финансиски ресурси. Американскиот пазар на обврзници со инвестициски рејтинг е приближно 8 трилиони долари, наспроти 3 трилиони долари на комбинираниот пазар на обврзници со висок ризик и левериџирани заеми.

„Ќе им треба дополнително финансирање за да ја извршат експанзијата,“ изјави Роберт Шифман, кредитен аналитичар во „Блумберг Интелиџенс“ („Bloomberg Intelligence“). „Ако имаш биланс со 80 до 100 милијарди долари долг, не можеш да го финансираш тоа на пазарот на обврзници со висок ризик.“

Трката за изградба на дата-центри и поврзана инфраструктура за поддршка на бумот на вештачката интелигенција се очекува да чини трилиони, а високо профитабилни компании како „Енвидија“ („Nvidia Corp“). и „Амазон“ („Amazon.com Inc.“) веќе позајмуваат од овој пазар за да ги финансираат своите ВИ амбиции. Издавањето на обврзници се очекува да се зголеми во наредните години.

Во последниве недели, „Спејс екс“ преку „Екс еј-ај“ обезбеди неколку договори за компјутинг вредни милијарди долари со „Антропик“, „Гугл“ и стартапот за „Еј-ај Рефлекшн“ („AI Reflection“), што ќе го зголеми вкупниот приход на компанијата поврзан со ВИ.

Но „Екс еј-ај“ минатата година генерираше само 3,2 милијарди долари продажба, додека прикажа оперативна загуба од 6,4 милијарди долари, според јавните извештаи. Тие годишни загуби се зголемија од околу 1,6 милијарди долари во 2024 година.

Продажбата на обврзници во вторник во голема мера се потпираше на силата на другите деловни линии на „Спејс екс“.

„Кредитниот случај е растот на Старлинк и сегментот за ВИ да достигне некаков пат кон самостојност пред да ти се потроши капиталот,“ изјави Рос Памфилон, главен инвестициски директор за фиксни приходи во „Импакс Асет Менаџмент“ („Impax Asset Management“), кој изрази интерес за купување обврзници на „Спејс екс“. „Екс Еј-Ај“, рече тој, е „длабоко во негатива по однос на паричен тек, но мора да се гледа на тоа со што е споен, а тоа е успешна и силна франшиза за конективност во Старлинк.“

 

Долг пат  

Продажбата на обврзници од 25 милијарди долари беше реализирана во повеќе транши со купонски камати кои се движат од 5,35 отсто до 6,65 отсто во зависност од рокот на доспевање. Тоа води до годишни трошоци за задолжување од околу 1,5 милијарди долари.

За споредба, 17,5 милијарди долари обврзници со висок ризик и левериџирани обврзници кои беа на билансите на „Екс“ и „Екс еј-ај“ со каматни стапки приближно меѓу 9,5 и 12,5 проценти ќе чинеа околу 1,8 милијарди долари годишно за сервисирање доколку долгот сè уште беше активен на почетокот од оваа година.

Патот до ова беше долг и полн со свиоци.

Маск ги шокираше пазарите со најавата за приватизација на „Твитер“ вредна 44 милијарди долари во април 2022 година, во екот на лудилото околу левериџирани откупи на технолошки компании. Но циклусот на зголемување на каматните стапки од Федералните резерви ги урна вреднувањата, што значеше дека Маск значително преплати за бизнисот. Тој се обиде да се повлече од купувањето, но судија во Делавер го принуди да ја затвори аквизицијата во октомври истата година.

Група банки предводени од „Морган Стенли“ („Morgan Stanley“) обезбедија околу 13 милијарди долари за да помогнат во финансирањето на трансакцијата, со план да го продадат на институционални инвеститори во форма на обврзници со висок ризик и левериџирани заеми. Тие не успеаја поради турбуленции на пазарот и високите каматни стапки, па мораа да ги користат сопствените биланси за да ги финансираат обврските - една од најголемите „црни точки“ во пазарот на долгови на Волстрит во поново време.

Банките собираа камати, што малку ја ублажи болката. На крајот успеаја да го префрлат долгот на инвеститорите во почетокот на 2025 година - благодарение во голема мера на изненадувачката инвестиција на „Екс“ во „Екс еј-ај“, која ја зголеми вредноста на долгот.

Потоа „Екс еј-ај“ го презеде „екс“ во март 2025 година, а во јуни истата година позајми дополнителни 5 милијарди долари. Кога „Спејс екс“ подоцна го купи „Екс еј-ај“ во февруари, „Морган Стенли“ кој ги менаџираше долговите на двете компании им кажа на постоечките кредитори дека долгот ќе биде отплатен целосно, без да објасни како.

Таа готовина на крај дојде од кредит од 20 милијарди долари што „Спејс екс“ го обезбеди од група банки. Краткорочниот заем требаше да биде активен најмногу околу две години и имаше ефективна каматна стапка од 4,58 проценти заклучно со 31 март, според регулаторни документи.

Договорот за обврзници на „Спејс екс“ во вторник го рефинансираше ова финансирање и може да се користи за општи корпоративни цели.

„Тешко е дури и да се моделира каде оди „Спејс екс“ во следните неколку години,“ изјави Шифман. „Нивната мисија е возвишена.“

 - Со помош од Брајан В. Смит