.webp){kind=icon}
Цената на нафтата порасна по падот на најниско ниво во последните шест месеци, а можноста Иран да го зголеми извозот остана во фокусот на инвеститорите.
Фјучерсите Вест Тексас Интермедиејт (West Texas Intermediate-WTI) достигнаа 87 долари за барел откако во претходните три дена на тргување паднаа за повеќе од 8 проценти. Преговорите за заживување на нуклеарниот договор со Иран се поместија од мртвата точка откако Европската Унија го објави конечниот предлог за текстот и содржината на договорот. Меѓутоа, од компанијата Голдман Сахс Груп (Goldman Sachs Group Inc.) велат дека договорот веројатно нема да биде потпишан во блиска иднина.
„Ако ја гледаме широката слика, расположението на пазарот и натаму е негативно, главно поради можноста за зголемување на понудата од Иран и несигурноста во врска со побарувачката во иднина“, изјави Варен Петерсон од компанијата ИНГ Груп НВ (ING Groep NV).
Администрацијата на претседателот на САД, Џо Бајден, ги разгледува можните одговори на иранските власти во врска со предлогот од ЕУ, а надлежните од двете страни сигнализираат дека е можно да се постигне договор откако преговорите траеја повеќе од една година но, без резултати.
Иако од компанијата Голдман рекоа дека се сомневаат во можноста за постигнување договор наскоро сепак, во случај да дојде до договор може да се очекува значајно покачување на производството на суровата нафта во Иран. Од компанијата очекуваат дека зголемувањето на понудата на светскиот пазар може да изнесува и милион барели нафта на ден.
Дополнителната понуда би можела негативно да влијае на цените, што веќе се на удар поради неизвесноста со економскиот раст во претстојниот период во многу од големите земји.
Цената на нафтата и натаму е за 16 отсто повисока од годишниот просек, а од Меѓународната агенција за енергетика остануваат оптимисти во врска со прашањето за побарувачката зашто зголемените цени на природниот гас значат преориентирање кон други извори на енергија и поголема потрошувачка на нафта. Шведска е една од последните земји која почна да се потпира на нафтата во производството на електрична енергија, со цел да ја намали цената за самото производство.
Извори за Блумберг велат дека залихите на суровата нафта во САД се пониски за 448.000 барели во однос на претходната недела, а официјалниот податок се очекува наскоро да биде објавен.
Цената на Брент (Brent) фјучерсите за октомври по отвраањето на европскиот пазар порасна за 0,67 проценти на 92,96 долари за барел, додека цената на WTI фјучерсите за септември порасна за 0,8 проценти и достигна 87,21 долари за барел.
