text size
Минатата недела политичката и берзанската активност се споија поради враќањето на отпишаниот Доналд Трамп во Белата куќа по четири години. Инаугурацијата на староновиот претседател ги зазелени американските берзи и покрај заканувачката реторика за воведување царини.
Различните реакции на берзите за враќањето на Трамп ги одразуваат непредвидливите ефекти од неговите извршни наредби, кои новиот претседател ги користи за да ја оствари својата амбициозна агенда. Ова претставува голем предизвик за глобалните финансиски пазари, бидејќи инвеститорите ќе мора внимателно да ги следат и да ги проценат последиците од стотиците извршни наредби на Трамп во текот на наредните месеци, кои суштински ќе го променат ликот на американскиот политички систем и, следствено, геополитичкиот поредок на светот.
Сите главни светски берзански индекси минатата недела завршија во зелено. Најголем раст забележа јапонскиот индекс Nikkei (3,6 отсто), кој воедно е и единствен меѓу набљудуваните индекси што оваа година забележа пад.
Повод за прослава на берзата беа акциите на технолошките компании кои се приклучија на новиот проект за развој на вештачката интелигенција, „Старгејт“ (Stargate). Проектот вреден 100 милијарди долари, кој ги обединува „Опен еј-ај“ (OpenAI), „Софтбанк“ (SoftBank), „Оракл“ (Oracle) и МГХ (MGX), ќе вклучува изградба на центри за податоци и инфраструктура за поддршка, а вредноста на проектот може да достигне и до 500 милијарди долари во следните четири години, пишува „Си-би-ес њуз“ (CBS News).
Инвестициите во вештачката интелигенција моментално бележат брз раст ширум светот, поттикнувајќи ја побарувачката за нови центри за податоци, како и за акциите на технолошки компании на берзите.
По презентацијата на проектот „Старгејт“, акциите на компаниите кои работат во областа на вештачката интелигенција пораснаа, поттикнати од очекувањата за поголеми инвестиции во компјутерска опрема. Во четвртокот акциите на „Софтбанк“ во Токио скокнаа уште шест отсто, дополнително зголемувајќи го растот од 11 отсто забележан во средата.
Скокнаа и акциите на компанијата „Оракл“ на денот на претставувањето на проектот во Белата куќа, продолжувајќи го со тоа трендот на исклучителен раст во 2024 година. Лани акциите на американскиот производител на софтвер остварија раст од 58 отсто, што претставува најдобар резултат од 1999 година.
Рекорд на словенечката берза
На Љубљанската берза индексот на водечките словенечки компании SBITOP минатата недела достигна рекордна вредност. Од почетокот на годината веќе ја зголеми вредноста за десетина.
И регионалните берзи бележат успешна недела. Сите завршија во зелената зона, освен Белградската берза. Најголем раст оствари Љубљанска берза, каде што словенечкиот индекс SBI TOP порасна за 4,4 проценти.
„Блумберг Адрија“ / Bloomberg Adria
Подготвивме и финансиски календар за објава на блу чип компании и проекции за работењето во 2025 година.
Динамично е и на пазарот на нафта
Откако Трамп повторно предупреди на можноста за трговска војна и најави дека од Саудиска Арабија и ОПЕК (Организацијата на земји извознички на нафта) ќе побара намалување на цената, нафтата за прв пат годинава забележа неделен пад.
Цената на брент нафтата се движи на ниво од околу 78 долари за барел, што претставува пад од приближно три отсто, додека барелот ВТИ (WTI) нафта се тргува по цена под 75 долари.
Фјучерсите на нафтата во петокот беа на пат да остварат најголема неделна загуба од ноември, иако цените остануваат повисоки оваа година откако студената зима на северната хемисфера ја зголеми побарувачката за греење, додека санкциите на САД кон Русија ги потресоа пазарите на сурова нафта.
Што се случуваше на пазарот на крипто?
На крипто-пазарот најмногу внимание минатата недела привлече издавањето на новите мемекоини на Доналд Трамп и Меланија Трамп, кои кренаа голема прашина. Во петокот, на 17 јануари, Трамп ја лансираше својата дигитална монета $TRUMP, чија вредност скокна од 10 на 75 долари за само еден ден, за потоа значително да се намали.
Ја анализиравме профитабилноста на купувањето на криптовалутата на Трамп или Меланија.
Светскиот економски форум минатата недела се осврна и на криптовалутите. „Мислам дека со администрацијата на Трамп ќе почнеме да гледаме конвергенција на традиционалните финансии и криптовалутите, што е она што ни треба“, рече Џени Џонсон, извршен директор на „Френклин темплтон инвестментс“ (Franklin Templeton Investments) во интервју за телевизијата „Блумберг“.
Најголемата и најстара криптовалута, биткоинот, се тргуваше нешто над 105.000 долари по токен во понеделникот наутро, откако претходната недела достигна рекордно високо ниво. Крипто индустријата сè уште чека конкретни упатства од новата американска администрација.
Анализиравме кои трендови и шпекулации предизвикуваат раст на цените на криптовалутите. Топ 5 шпекулации.
Што ќе гледаме следната недела?
Понеделник, 27 јануари
• Во Кина ќе се објави композитниот индекс МПИ (PMI).
• Германскиот институт Ифо (Ifo) ќе објави податоци за деловната клима.
• Во САД ќе се објават податоци за продажба на недвижности и издадени градежни дозволи.
Вторник, 28 јануари
• Берзите во Кина и Кореја ќе бидат затворени поради новогодишните празници.
• Државниот завод за статистика (ДЗС) на Мекедонија ќе го објави индексот на продажни цени на производители на индустриски производи на домашниот пазар во декември.
Среда, 29 јануари
• Берзите во Кина, Кореја, Хонгконг и Сингапур ќе бидат затворени поради новогодишните празници.
• Германскиот институт ГфК (GfK) ќе објави податоци за расположението на потрошувачите.
• Американската централна банка, Фед (Fed), ќе донесе одлука за каматните стапки.
Четврток, 30 јануари
• Берзите во Кина, Кореја, Хонгконг и Сингапур ќе бидат затворени поради новогодишните празници.
• Во Франција, Италија, Германија и еврозоната ќе се објават податоци за БДП во вториот квартал.
• Евростат ќе објави податоци за невработеноста.
• Европската централна банка ќе донесе одлука за каматните стапки.
Петок, 31 јануари
• Во Јапонија ќе бидат објавени податоци за индустриското производство.
• Во Германија ќе се објават податоци за невработеноста и за инфлацијата.
• ДЗС ќе објави податоци за индустриското производство во декември во Македонија, како и за индексот на промет во секторот трговија во декември.
.webp){kind=icon}
