text size
Американскиот претседател Доналд Трамп повторно предизвика потреси на берзите со заканите за воведување царини од 25 проценти за повеќе сојузници. Овој пат на удар се најдоа Мексико и Канада, за кои воведувањето на царините е одложено за еден месец, како и Европската Унија.
Словенечкиот зет пред новинарите во Белата куќа изјави дека ќе воведе царини од 25 проценти за европските производи, но не беше конкретен. Овие најави предизвикаа пад на европските берзи, при што паневропскиот индекс Stoxx 600 падна за половина процент. Еврото исто така малку ослабе.
Повеќето големи европски берзански индекси забележаа мали падови во првите часови од четврточното тргување: францускиот индекс CAC 40 падна за 0,3 проценти, германскиот DAX за 0,89 проценти, додека британскиот FTSE 100 забележа раст од 0,19 проценти.
„Приказната за царините е малку збунувачка“, изјави Анека Гупта од „Виздомтри“ (Wisdomtree UK) за телевизијата „Блумберг“. „Од една страна имаме најави, од друга страна преговори, можности за прекин или продолжување. Инвеститорите сè уште не знаат што точно е во игра. Засега добивме многу повеќе врева отколку содржина“, призна таа.
„Блумберг“ во својот берзански преглед истакна две европски акции што забележаа голем скок и пад. Првите се акциите на автомобилската компанија „Ролс Ројс“ (Rolls-Royce), кои пораснаа за 16 проценти на рекордна вредност, откако компанијата ги зголеми прогнозите за добивка и најави откуп на акции. Акциите на британската комуникациска мултинационална компанија ВПП (WPP) паднаа за 17 проценти, бидејќи најавената продажба на рекламната агенција не ги исполни очекувањата на аналитичарите.
Bloomberg
Нафтата на најниско ниво годинава
Нафтата вчеравечер падна на ново најниско ниво годинава, бидејќи американскиот претседател со серија контрадикторни најави за трговијата ги потресе пазарите. Барел западнотексашка нафта ВТИ (WTI) падна под 69 долари, што е најниско ниво годинава. Барел северноморска нафта брент моментално се движи околу 73 долари - најниско од септември минатата година.
Несигурноста околу мерките на Трамп и заканата од голем број меѓународни трговски војни ги замаглија прогнозите за економскиот раст и побарувачката за енергенти и во САД и во Кина, двата најголеми светски потрошувачи на сурова нафта, наведува „Блумберг“.
Американскиот пазар на дизел-гориво веќе покажува знаци на слаба побарувачка, бидејќи фјучерсите за дизел паднаа за 1,9 проценти, откако владините податоци покажаа дека резервите се зголемиле најмногу од почетокот на јануари.
Царинските закани ги засенија најавите на Трамп дека ќе ги прекине концесиите за нафта што администрацијата на Џо Бајден му ги даде на венецуелскиот диктатор Николас Мадуро, новите санкции против иранската нафтена понуда и очекувањата дека нафтениот картел ОПЕК+ повторно ќе ги одложи плановите за постепено зголемување на производството на нафта, наведува „Блумберг“.
Одлуката на администрацијата на Трамп ќе ја погоди американската нафтена компанија „Шеврон“ (Chevron), која од 1 март повеќе нема да смее да произведува нафта во Венецуела или да ја извезува таму.
„Енвидија“ не импресионира
Вчеравечер една од најжешките компании во светот, калифорниската „Енвидија“ (Nvidia), ги објави деловните резултати за последниот квартал од 2024 година. Иако производителот на чипови претстави добри квартални бројки, инвеститорите, кои веќе се навикнати на извонредни деловни резултати, реагираа со воздржаност.
Директорот на „Енвидија“, Џенсен Хуанг
Bloomberg
„Енвидија“ предупреди дека продажбата за тековниот квартал ќе биде помала од очекувањата и дека бруто-профитните маржи ќе бидат пониски, бидејќи брза со воведување на новиот дизајн на чипови „блеквел“ (Blackwell). Дополнително, резултатите беа под влијание на американските царини.
Овие мешани прогнози доаѓаат во несигурно време за индустријата на вештачката интелигенција. Акциите на компанијата годинава паднаа поради загриженоста дека управувачите на дата-центрите ќе ја намалат потрошувачката. Стравовите ги предизвика и кинеската стартап-компанија „Дипсик“ (DeepSeek).
Мешано на азиските берзи
Јапонскиот индекс Nikkei 225 денеска забележа раст од 0,3 проценти и трговскиот ден го заврши на 38.256,17 поени, додека индексот Topix порасна за 0,73 проценти. Јужнокорејскиот индекс Kospi падна за 0,73 проценти и трговскиот ден го заврши на 2.621,75 поени.
Во континентална Кина, шангајскиот индекс CSI 300 порасна за 0,21 процент, додека хонгконшкиот индекс Hang Seng падна за 0,61 процент. Си-ен-би-си (CNBC) извести дека се очекува Пекинг во наредните недели да потврди значително намалување на домашната побарувачка, истовремено откривајќи ги долгоочекуваните детали за фискалните субвенции, чија цел е да го зајакнат растот поради зголемените трговски тензии со САД.
.webp){kind=icon}
