Министерот за финансии на САД не е загрижен за падот на берзите, корекциите ги нарекува здрави

Американскиот министер за финансии Скот Бесент, кој инаку е поранешен менаџер на хеџ-фондови, рече дека не е загрижен за неодамнешниот пад што избриша милијарди долари од пазарот на акции додека САД се обидуваат да ги преобликуваат своите економски политики.

„Јас сум во инвестицискиот бизнис веќе 35 години и можам да ви кажам дека корекциите се здрави, тие се нормални“, рече Бесент во неделата за „Ен-би-си“ (NBC). „Не сум загрижен за пазарите. На долг рок, ако воведеме добра даночна политика, дерегулација и енергетска безбедност, пазарите ќе работат одлично“, рече тој.

„Воспоставуваме политики што ќе направат да се намали кризата со достапноста и да има умерена инфлација. Уверен сум дека американскиот народ ќе биде покрај нас“, рече Бесент, кој пред да ѝ се приклучи на администрацијата раководеше со „Ки сквер груп“ (Key Square Group).

Како што се проширува опсегот на царинската политика на претседателот Доналд Трамп, потрошувачите стануваат сè позагрижени дека дополнителните давачки ќе доведат до повисоки трошоци. Сега се во сила глобалните царини за челик и алуминиум, а 2 април е крајниот рок за воведување уште поширок опсег на царини.

Иако инфлацијата минатиот месец се залади, какво било трајно зголемување на ценовните притисоци претставува ризик да предизвика домаќинствата да ги ограничат купувањата. Расположението на потрошувачите во САД се намали поради зголемените долгорочни инфлациски очекувања.

Во интервјуто Бесент рече дека американскиот сон не зависи од можноста да се купува евтина стока од Кина. Наместо тоа, семејствата сакаат да си дозволат дом и да гледаат како нивните деца живеат во сѐ подобри услови.
„Тука се хипотеките, автомобилите, тоа е реална добивка од платите“, рече тој.

Инаку, претставниците на Федералните резерви (Фед) треба да се состанат неделава. Претседателот на Фед, Џером Пауел, во текот на месецов нагласи дека централната банка не треба да брза да ги намали стапките, но тој најверојатно ќе биде под притисок поради неизвесноста и ризиците што се појавуваат.

Трамп и другите членови на администрацијата ја минимизираа важноста на краткорочните финансиски ротации, а претседателот месецов рече: „Јас дури и не ги следам берзите“. Тоа е сосема спротивно на претходните тврдења дека неговата влада ќе направи сѐ за да ги задоволи инвеститорите.

„Со оглед на неодамнешните коментари на администрацијата, кои покажуваат очигледен недостиг од загриженост поради падот на пазарот, всушност, тие велат дека не постои пат на Трамп за акционерските инвеститори“, напиша Ед Јардени од „Јардени рисрч“ (Yardeni Research) во белешката во неделата. „Истовремено, претставниците на Фед рекоа дека не брзаат да обезбедат Федов пат, што во минатото честопати доведуваше до значителни падови на берзата“, додаде тој.