Трамп обвинет за „манипулација на пазарот“

Тримесечниот мораториумот на американскиот претседател Доналд Трамп на таканаречените реципрочни царини предизвика бурни реакции на Волстрит. Но, помалку од четири часа пред да го објави одложувањето на тарифите, претседателот им кажа на своите следбеници на неговиот профил на социјалната мрежа „Трут Сошл“ (Truth Social) дека е добро време за купување.

„ОДЛИЧНО ВРЕМЕ ЗА КУПУВАЊЕ!!! ДЈТ“, напиша тој на неговиот профил. Околу четири часа подоцна, тој напиша на истата мрежа дека ќе ги суспендира повеќето нови тарифи - со исклучок на Кина - по што Волстрит премина во зелено.

Одлуката на Трамп наиде на широки критики и осуди за „манипулации на пазарот“.

„Претседателот на САД е буквално вклучен во најголемата шема за манипулација на пазарот во светот“, објави Демократската партија на социјалните мрежи.

Според „Вашингтон пост“, Трамп долго време предизвикува загриженост меѓу етичките експерти за неговите деловни практики, вклучувајќи го и неговото одбивање да вети дека ќе се тргне од какви било финансиски активности по изборите. Неговото богатство од повеќе милијарди долари, за кое Белата куќа вели дека е управувано од неговите деца, исто така се заснова на неговиот удел во „Трамп Медиа“ (Trump Media & Technology Group), чии акции пораснаа за 21,67 отсто по контроверзната објава на „Трут Сошл“.

Не беше само компанијата на Трамп таа што забележа силен раст; сите три главни американски референтни индекси забележаа силни добивки откако Трамп објави 90-дневен мораториум. S&P 500 на завчерашното тргување заврши со раст од 9,52 отсто, индустрискиот индекс Dow Jones порасна за 7,87 отсто, а технолошкиот Nasdaq за 12,16 отсто.

Акциите на „Тесла“ (Tesla), во сопственост на блискиот соработник на Трамп и „прв пријател“ Илон Маск, забележаа повисока добивка од 22,69 отсто на вчерашното тргување. И покрај силното враќање, акциите на производителот на електрични возила изгубија 28,23 отсто од нивната пазарна вредност оваа година.

Bloomberg

Белата куќа вчера преку соопштение ја отфрли идејата дека Трамп неправилно манипулирал со пазарите. „Одговорноста на претседателот на Соединетите Држави е да ги увери пазарите и Американците за нивната економска безбедност наспроти постојаното поттикнување страв од медиумите“, изјави портпаролот на Белата куќа Куш Десаи за „Вашингтон пост“.

Шема „напумпај, па фрли“.

Сепак, американската администрација се соочува со обвинувања на социјалните мрежи дека претседателот Трамп води обратна шема од „напумпај и фрли“ (pump and dump) со најголемата светска економија. Англискиот весник „Индипендент“ пишува дека демократскиот сенатор Адам Шиф бара истрага за инсајдерска трговија.

Дејвид Вагнер, портфолио менаџер во „Аптус“ (Aptus Capital Advisors), изјави за „Блумберг“ (Bloomberg) дека првично не верувал дека објавата на Трамп е вистинска. „Дали ова ги крши правилата? Не знам, бидејќи Трамп не следи никакви правила“, рече тој, додавајќи дека ова ги менува правилата на пазарот. „Очигледно, сега ќе барате какви било знаци од Трамп“.