Индексот Nasdaq 100 влегува во тренд на раст

Облозите на трговците на Волстрит дека трговскиот договор меѓу САД и Кина ќе стави крај на царинската војна доведоа до пораст на индексот S&P 500 за повеќе од три проценти. Доларот го забележа својот најголем раст од ноември, кога Трамп победи на изборите во САД.

Поголемата подготвеност за преземање ризици и надежта дека рецесијата можеби на крајот сепак нема да дојде доведоа до промена на цените на акциите каква што не е видена од 2 април, кога американскиот претседател Доналд Трамп прогласи „Ден на ослободувањето“. Зголемувањето на цените на акциите на голем број технолошки компании го врати индексот Nasdaq 100 во тренд на раст, само околу еден месец откако сериозно падна. Приносите од државните обврзници се зголемија бидејќи повеќе не се очекува инфлацијата да биде толку висока. Исто така, се очекува Фед (Федерални резерви) да не ги намали каматните стапки повеќе од двапати во текот на целата 2025 година.

Април на берзите беше обележан со краткорочна продажба на доларот, долги позиции на волатилност на акциите и очекувања дека Федералните резерви ќе ги намалат каматните стапки повеќекратно. По дводневни разговори на високо ниво во Швајцарија, трговските преговарачи од најголемите економии во светот вчера објавија масовно намалување на царините. Во внимателно координирана заедничка изјава, Америка ги намали царините за кинеските производи од 145 проценти на 30 проценти во период од 90 дена, додека Пекинг ги намали давачките за повеќето стоки на 10 проценти.

„Никој не очекуваше дека царинските стапки на Кина ќе бидат намалени за толку многу, ова е големо изненадување“, вели Џеф Бухбиндер од „Елпиел фајненшл“ (LPL Financial). Индексот S&P 500 е понестабилен отколку што беше во просек во последните 200 дена. Индексот Nasdaq 100 порасна за четири проценти, додека Dow Jones Industrial Average додаде над 1.000 поени. Индикаторот за мегакапитализација скокна за 5,7 проценти. Трамп рече дека разговарал со Тим Кук од компанијата „Епл“ (Apple) токму кога производителот на ајфон (iPhone) наводно размислува за зголемување на цените. Производителите на лекови се вратија на обложувањето дека го избегнале најлошото сценарио, бидејќи Трамп се стреми кон намалување на цените.

Двегодишниот принос се зголеми за 12 базични поени и е највисок - четири проценти. Индексот на доларот на „Блумберг“ порасна за еден процент.

Bloomberg

„Поголемото намалување на царините меѓу САД и Кина од очекуваното, иако привремено, и воспоставувањето рамка за продолжување на дискусиите се токму тоа што берзата се надеваше да го види“, рече Керол Шлајф од „БМО Прајват велт“ (BMO Private Wealth). Новото свртување кон ризик покажува дека инвеститорите не очекувале толку брзо да дојде позитивен исход, вели Улрике Хофман-Бурчарди од „УБС Глобал велт менаџмент“ (UBS Global Wealth Management). Таа очекува американските царини за увоз од Кина да се стабилизираат на околу 30-40 проценти. „Инвеститорите сега ќе бидат фокусирани на знаци дека привременото решение може да се претвори во траен договор“, рече таа.

Мет Малеј од „Милер табак“ (Miller Tabak) вели дека договорот меѓу САД и Кина е добра вест за берзите, но дека прашањето е дали промената ќе биде доволна за да доведе до значителен раст. „Замислете го ова како укинување на ембаргото“, вели Кали Кокс од „Ритхолц велт менаџмент“ (Ritholtz Wealth Management). „Царините сè уште се високи, Американците веројатно ќе ги почувствуваат ефектите од повисоките цени, а компаниите веројатно нема да донесат многу поинакви стратегиски одлуки по овој договор. Но трговијата меѓу САД и Кина би можела да се отвори повеќе, што значи повеќе пратки и помалку празни полици (засега)“.

Bloomberg

„Америка и Кина сè уште треба да преговараат за да постигнат вистински договор“, вели Џејми Кокс од „Харис фајненшл груп“ (Harris Financial Group). „Сепак, ова условно примирје во царинската војна им дава на американските компании повеќе време да се приспособат и да планираат за непредвидени ситуации доколку трговските преговори повторно тргнат наопаку. Исто така, со малку среќа, даночниот пакет би можел да биде готов и инвеститорите повеќе нема да мора да се грижат дека трговијата ќе биде попречена од даночните мерки“, додава тој.

Инвеститорите што го следеа советот на Трамп на социјалните медиуми во текот на изминатиот месец уживаа во една од најголемите добивки на индексот S&P 500 од почетокот на неговиот втор претседателски мандат. Откако падна поради најавата за царини од страна на Трамп за „Денот на ослободувањето“, референтната вредност скокна откако тој на 9 април изјави дека е „одлично време за купување“, само неколку часа пред привремено да ги суспендира највисоките американски царини во последниот век. Тој го повтори тоа на 8 мај, кажувајќи им на новинарите дека економските перспективи го оправдуваат инвестирањето во акции.

Расположението кон американската берза се подобрува, но е прерано инвеститорите да кажат дека сè е во ред, сметаат стратезите во „Морган Стенли“ (Morgan Stenley). Тимот предводен од Мајкл Вилсон идентификува четири фактори потребни за одржување траен раст, но забележа напредок само кај два: „оптимизам околу трговскиот договор со Кина и стабилизација на ревизиите на заработката“, рекоа вчера тие. „Другите две точки на нашата листа за проверка сè уште не се материјализирале - попустлив Фед и 10-годишен принос под четири отсто без рецесија“.

„Сè уште се води дебата за тоа колку царините веќе ги нарушија синџирите на снабдување и потенцијално го забавија растот“, рече Крис Ларкин од „Морган Стенли“. „Иако бројките што придонесуваат за наративот за стагфлација секако може да го намалат оптимистичкото расположение, сè уште се чини дека економијата е на солидна основа“, забележа Џером Пауел минатата недела.

Bloomberg

Гувернерката на Федералните резерви, Адријана Куглер, изјави дека царинските политики на администрацијата на Трамп веројатно ќе ја зголемат инфлацијата и ќе го попречат економскиот раст, дури и со неодамна објавените намалувања на даноците за Кина.

„Трговските политики еволуираат и веројатно ќе продолжат да се менуваат, дури и утрово“, рече Куглер во понеделникот. „Сепак, се чини дека веројатно ќе генерираат значителни економски ефекти дури и ако царините останат блиску до моментално објавените нивоа“, додаде таа.

Претседателот на Федералните резерви на Чикаго, Остан Гулсби, вчера во интервју за „Њујорк тајмс“ изјави дека сè уште постои зголемен ризик од раст на цените и забавување на економскиот раст. Тоа што царинскиот договор меѓу САД и Кина е привремен и општото опкружување со повисоки царини ќе продолжат да ја оптоваруваат економијата, додаде тој.