Биткоин или злато: Волстрит нуди нови можности за „обложување“

Судирот на културите меѓу биткоин ентузијастите и љубителите на злато наскоро ќе се одигра преку нови берзански фондови, ЕТФ (ETFs).

„Тајдл Фајненшл Груп“ (Tidal Financial Group) поднесе барање за лансирање пар долгорочни-краткорочни фондови — ставајќи ја најголемата светска криптовалута наспроти блескавиот метал,  и обратно — нудејќи им на инвеститорите можност за силен и одлучен облог околу тоа кој е подобар хеџ против економски неизвесности.

Пакувани под брендот „Бетлшерс“ (Battleshares), овие нови фондови имаат цел да профитираат од долгогодишната дебата за тоа кој е вистинскиот „чувар на вредноста“ во време на трговски војни, геополитички тензии и лабава фискална и монетарна политика. Идеолошкиот јаз меѓу индивидуалните и институционалните инвеститори постои уште од појавата на биткоинот по финансиската криза од 2008 година — токму кога и двете средства доживуваат голем раст во последнава година, но од различни причини.

Доколку бидат одобрени, овие фондови би користеле различни финансиски алатки, вклучувајќи продажба на позајмени хартии од вредност, свопови и опции, според поднесените документи до Американската комисија за хартии од вредност (SEC). „Бетлшерс“ сѐ уште не коментираат околу ова.

„Ова за мене е своевидна победа“, изјави Давал Џоши, главен стратег во„Каунтерпоинт“ ( Counterpoint), кој долго тврди дека биткоинот и златото спаѓаат во истата категорија на „имот што не може да се конфискува“ — имуни на инфлација, контроли на капиталот или запленување. „Биткоинот постепено ќе му презема пазарен удел на златото. Па така, долга позиција на биткоин/кратка на злато би требало да расте со текот на времето, а спротивната позиција да паѓа.“

Сепак, има и скептици кон ваквиот пристап.  „Изгледа сензационалистички и непотребно“, вели Брент Донели, претседател на „Спектра Еф Екс Солушнс“ (Spectra FX Solutions). „Повеќето луѓе кои се оптимисти околу биткоинот, се оптимисти и за златото. Овие фондови само додаваат трошоци на една трговија која веќе може да се направи со евтини ЕТФ-и како “ИБИТ“ (IBIT) и „ГЛД“ (GLD)“ — мислејќи на ЕТФ за биткоин на  „БлекРок“ (BlackRock) и за злато на  „Стејт Стрит“ (State Street), кои имаат многу ниски надоместоци.

 

 

Оваа година, златото бележи рекордни нивоа поради побарувачката за безбеден чувар на вредноста, додека биткоинот, пак,  потона во април поради трговските тензии и падот на ризичните акции. Сепак, по сигналите дека Белата куќа сака трговски договори, биткоинот нагло се врати во игра, особено во период кога американската влада сè повеќе е пријателски настроена  кон дигиталните финансии.

„Биткоинот и понатаму се однесува како ризично средство, движејќи се речиси идентично со Nasdaq со неколку исклучоци“, вели Донели.

И покрај различните наративи, и златото и криптовалутите се гледаат како средства за диверзификација и осигурување од девалвација на валутите и системските ризици во финансискиот поредок. Дали е тоа реална потреба или „страв од пропуштање на нештата“ (Fear Of Missing Out - FOMO), не е секогаш јасно. Инвеститорите вложиле над 14 милијарди долари во четирите најголеми ЕТФ-и за злато оваа година и 8 милијарди долари во четирите водечки ЕТФ-и за биткоин.

Апетитот за ризик трае

„Бетлшерс“, нова компанија за инвестициски продукти на пазарот, се обидува да го искористи следниот чекор во еволуцијата на пар - тргувањето. Засега, нивниот единствен продукт  е ЕТФ  „Бетлшерс Тесла наспроти Форд“ (Battleshares TSLA vs F) (тикер: ELON) — долга позиција на „Тесла“ (Tesla Inc.) и кратка на „Форд“ (Ford Motor Co.), според вебсајтот на компанијата. Лансиран во февруари со трошок од 1,29 отсто, досега има собрано едвај еден милион долари. Компанијата поднесе уште неколку барања за вакви ЕТФ-и со долги и кратки обложувања: „Коинбејс“ наспроти „Велс Фарго“ (Coinbase vs. Wells Fargo), „Ели Лили“ наспроти “Јам Брендс“ (Eli Lilly vs. Yum! Brands), и други.

Тие не се први што тестираат вакви стратегии. Сè повеќе мали и големи финансиски фирми нудат ЕТФ-и со посложени производи базирани на деривативи, со различни профили на обезбедување и принос. ЕТФ-и базирани на деривативи — брзо растечка категорија која вклучува и фондови со една акција — процвета по 2019 година кога регулаторите во САД ги олеснија правилата за нови фондови. Многу од нив се популарни меѓу поагресивните индивидуални трговци кои бараат високи добивки среде нестабилните пазарни движења.

И покрај сè, апетитот за ризик останува висок, особено по неочекуваниот опоравок на пазарите минатиот месец. А оваа недела, биткоинот надмина 100.000 долари во четврток, додека златото падна по одлуката на Федералните резерви да ги задржат каматните стапки непроменети.

Судирот меѓу овие два финансиски инструменти можеби ќе продолжи, но според Чарли Морис од “Бајттри Асет Менаџмент“ (Bytetree Asset Management), биткоинот на долг рок ќе го надмине златото и ќе му преземе пазарен удел.

„Сметам дека и  биткоинот и златото профитираат од оваа ера на макроекономска неизвесност, но во различни времиња,“ вели Морис, чија фирма управува со фондот „БОЛД“ (BOLD) — ЕТФ  што инвестира и во злато и во биткоин. „Златото обично има подобри перформанси  кога има геополитички тензии, а биткоинот кога нештата се одвиваат добро.“

-Со помош на Вилдана Хајриќ