ЕТФ-ови за солана пристигнуваат на Волстрит

Една нова ЕТФ-фирма дебитира со првите фондови што ги следат фјучерсите на соланата, шестата најголема криптовалута, по големиот успех на ваквите производи (фондови со кои се тргува на берза) за биткоин.

Фирмата „Волатилити шерс“ (Volatility Shares LLC) од Флорида во четвртокот лансира пар фондови што ги следат фјучерсите на соланата, според поднесокот за регистрација. Производите ќе бидат први од ваков вид што нудат изложеност на соланата, која има пазарна вредност од околу 67 милијарди долари.

Волатилити шерс солана ЕТФ (тикер SOLZ) ќе ги следи фјучерсите на соланата, додека Волатилити шерс 2x солана ЕТФ (SOLT) ќе нуди двојно поголема изложеност. Фирмата првично поднесе документи до Комисијата за хартии од вредност на САД за фондовите во декември. SOLZ и SOLT ќе имаат трошоци од 0,95 и 1,85 отсто, соодветно.

„Нашето лансирање доаѓа во време на обновен оптимизам за иновации во криптовалутите во САД“, рече Џастин Јанг, извршен директор на „Волатилити шерс“. „Веруваме дека администрацијата на Трамп ја признава стратегиската важност на одржување на американското лидерство во финансиската технологија“.

Дебитирањето на производите следува по лансирањето на ваквите понуди за етерот, кои забележаа одливи поради неодамнешната пазарна нестабилност. Додека ЕТФ-овите за солана што директно ја држат монетата не се достапни во моментов, индустриските набљудувачи ги гледаат фондовите на „Волатилити шерс“ како знак дека е на ред следниот фонд за криптовалутата. И биткоинот и етерот следеа сличен пат; издавачите прво лансираа фјучерс-производи, а потоа ЕТФ-ови за директно држење.

„Ова е првиот алткоин што е одобрен по етерот. Но историјата покажа дека инвеститорите во ЕТФ-ови сакаат да го држат физичкото средство што е можно повеќе“, рече Ерик Балчунас од „Блумберг интелиџенс“ (Bloomberg Intelligence). „Може да има некои проблеми кога ќе биде одобрен директниот фонд“.

ЕТФ-овите за директно држење на биткоинот собраа 92 милијарди долари од нивното деби во јануари 2024 година, покажуваат податоците собрани од „Блумберг“. Тоа е во контраст со 6,5 милијарди долари за етерот, кој беше лансиран околу јули минатата година. Балчунас и Џејмс Сејфарт од БИ проценуваат 75 отсто шанса дека ЕТФ за директно држење на соланата ќе биде одобрен до крајот на годинава.

Соланата првично привлече широко внимание кога беше поддржана од Сем Банкмен-Фрид. По колапсот на неговата криптоберза FTX и поврзаниот фонд „Аламеда“ (Alameda Research) во 2022 година, опстанокот на соланата беше под прашање. Но оттогаш се врати, благодарение на пониските такси што ги наплаќа во споредба со своите ривали. Досега годинава соланата е намалена за околу 30 отсто.

ЕТФ-овите за соланата долго време се гледаат како најверојатни за одобрување бидејќи имаат највисоко ниво на интерес од институционалните инвеститори, имајќи ја предвид јасната нарација на токенот.

Новите фондови исто така покажуваат дека ЕТФ-фирмите сè уште нудат производи на шпекулативни инвеститори, кои и натаму имаат апетит за ризик, и покрај неодамнешниот пазарен колапс. Издавачите исто така им пркосат на критичарите што тврдат дека пазарот за ЕТФ од 10 трилиони долари веќе е заситен. Годинава има повеќе поднесувања за нови ЕТФ-ови што следат сè, од алткоинот аваланч, преку токенот СУИ, кој има пазарна вредност од 7 милијарди долари, до директното држење на биткоинот и фјучерсите за карбон-кредити.

Лансирањето доаѓа додека администрацијата на Трамп ги прифаќа дигиталните средства, поттикнувајќи низа нови пазарни иницијативи, вклучувајќи нови фондови и таканаречениот стакинг. Меѓу менаџерите на средства што поднесоа барање за ЕТФ за директно држење на соланата се „Френклин темплетон“ (Franklin Templeton), „Грејскел“ (Grayscale) и „Ванек“ (VanEck).