„Блекрок“ ќе го претстави својот прв биткоин ЕТФ во Европа

„Блекрок“ (BlackRock Inc.), најголемиот управител на средства во светот, се подготвува да листира производ поврзан директно со биткоин во Европа, по успехот на неговиот американски ЕТФ - фонд со кој се тргува преку берза - од 58 милијарди долари, а кој ја следи криптовалутата.

Фондот најверојатно ќе биде регистриран во Швајцарија, според лица запознаени со плановите, кои не беа овластени јавно да дискутираат за ова прашање. „Блекрок“ би можел да започне со маркетинг на фондот уште месецов, вели извор запознаен со ситуацијата.

Портпарол на „Блекрок“ одби да коментира.

„Блекрок“ е лидер во издавање фондови што се тргуваат на берза, управувајќи со повеќе од 4,4 трилиони долари во такви производи. Додека продукти поврзани со криптовалути се тргуваат на европските берзи со години, новиот фонд би бил првиот поврзан криптопродукт на „Блекрок“ надвор од Северна Америка.

Компанијата е еден од најистакнатите поддржувачи на дигиталната класа на средства на Волстрит во последните години. На Светскиот економски форум во Давос минатиот месец извршниот директор на „Блекрок“, Лари Финк, ги истакна придобивките од биткоинот како заштита од девалвација на другите валути.

Дебито на неколку американски ЕТФ-ови поврзани директно со биткоин пред една година доведе до пораст на побарувачката за оваа класа на средства, носејќи 116 милијарди долари до денес преку 12 фонда, покажуваат податоците на „Блумберг“ (Bloomberg). „Ајшерс биткоин траст“ (iShares Bitcoin Trust / тикер IBIT) на „Блекрок“  е најголемиот од групата, кој урива индустриски рекорди со најуспешното деби на кој било ЕТФ во историјата.

Цените на криптовалутите доживеаја значителен пораст од реизборот на претседателот на САД, Доналд Трамп, при што биткоинот достигна рекордна вредност од 109.241 долар во јануари. Повеќе финансиски институции се очекува да влезат во просторот благодарение на отворената поддршка на Трамп за индустријата и ветувањето за нови регулативи, кои би обезбедиле појасни насоки за компаниите. Во Европската Унија новите правила за криптото стапија во сила кон крајот на декември.

Европскиот пазар за криптовалутни производи на берзата е жестоко конкурентен, со повеќе од 160 производи достапни што ја следат цената на биткоинот, етерот и другите токени. Сепак, неговата големина од 17,3 милијарди долари е значително помала во споредба со онаа на САД.