„Ова е само почеток“, вели директорот на „Блекрок“ откако фирмата постигна рекорд

„Блекрок“ (BlackRock Inc.) постигна годишен рекорд од 641 милијарда долари во средства на клиенти, нагласувајќи го глобалниот досег на фирмата преку акции и обврзници, индексни и активни фондови и сè повеќе на брзорастечкиот и профитабилен пазар за приватни средства.

Вкупниот износ вклучува 390 милијарди долари, кои минатата година се влеале во нејзиниот ETF-бизнис со фондови со кои се тргува на берза ЕТФ (ETF), 226 милијарди долари во фондови за акции и 164 милијарди долари во фиксни приходи, посочи „Блекрок“ во соопштение во средата, објавувајќи ги своите годишни и квартални заработки како најголем менаџер на средства во светот.

Акциите на „Блекрок“ пораснаа за 3,3 отсто, на 995 долари, во 6.21 часот во Њујорк.

Годишниот износ ги надминува вкупните средства на некои помали менаџери на пари и ја демонстрира способноста на „Блекрок“ да продолжи да привлекува клиенти во време кога пазарите се нестабилни и владеат интензивна индустриска конкуренција и промени.

Вкупните средства на „Блекрок“ изнесуваа речиси 11,6 трилиони долари на 31 декември и се очекува да растат  годинава, по година на драматични зделки од извршниот директор Лари Финк, кој насочи речиси 30 милијарди долари во три трансакции за да ја трансформира фирмата во главен играч во алтернативни и приватни средства и податоци.

Лари Финк Bloomberg

„Ова е само почеток“, наведува Финк во соопштението. „’Блекрок’ влегува во 2025 година со поголем потенцијал за раст и нагорен тренд од кога било“.

Активности за спојувања и преземања

Акциите на „Блекрок“ пораснаа за 26 отсто во 2024 година, надминувајќи го прогресот од 23 отсто на индексот S&P 500. Тие паднаа за околу 6 отсто досега годинава до затворањето на пазарот во вторникот, поради падот на пазарот на акции додека инвеститорите се обложуваат дека Федералните резерви (Фед) годинава ќе ги намалат каматните стапки побавно отколку што мислеа пред само неколку месеци.

Средствата на фирмата се очекува значително да растат во следните неколку месеци со најавената зделка за купување на ХПС (HPS Investment Partners), која управува со околу 150 милијарди долари и ќе го лансира „Блекрок“ меѓу водечките менаџери во сферата на приватниот кредит.

„За многу компании периодите на спојувања и преземања придонесуваат за пауза во ангажманот околу клиентите“, рече Финк, додавајќи дека во неговата фирма „активноста за клиентите се забрзала во четвртиот квартал“.

Заработката покажува како најголемиот менаџер на средства во светот продолжува да се шири додека многу фирми се мачат со преминот од активно управувани фондови за акции, слаби инвестициски приноси и трета година на нестабилност на пазарот на обврзници.

Фирмата ја заврши својата аквизиција од 12,5 милијарди долари на ГИП (Global Infrastructure Partners) во октомври и е во процес на затворање зделка од 2,55 милијарди фунти (3,1 милијарди долари) за фирмата за податоци „Прекин“ (Preqin Ltd). Нејзината аквизиција од 12 милијарди долари на приватната кредитна компанија ХПС ќе ја преобликува способноста на компанијата да обезбеди целосен опсег на јавни обврзници и приватно кредитно финансирање на различни пазари.

Во моментов нема коментари за веста. Биди прв да коментира...

Остави коментар