„Блекрок“ и „Мајкрософт“ тргнаа да соберат 30 милијарди долари за развој на ВИ

„Блекрок“ (BlackRock Inc.) и „Мајкрософт“ (Microsoft Corp.) се здружуваат во еден од најголемите проекти досега за финансирање изградба на центри за податоци и енергетска инфраструктура, поттикнати од растот на вештачката интелигенција.

Компаниите, заедно со инвестициската компанија МГХ (MGX) од Обединетите Арапски Емирати (ОАЕ), ќе побараат 30 милијарди долари капитал, со цел стратегијата да го искористи за потенцијални инвестиции до 100 милијарди долари, објавија компаниите во вторникот.

„Потребата за изградба на наши центри за податоци глобално изнесува повеќе трилиони долари“, изјави во интервју извршниот директор на „Блекрок“, Лари Финк, додавајќи дека глобалното партнерство за инвестиции во инфраструктура за вештачка интелигенција се подготвува со месеци. „Ова е одличен пример за тоа како пазарите на капитал градат инфраструктура и отвораат можности за нови технологии“.

Инфраструктурните инвестиции - вклучувајќи ги и енергетските проекти - главно ќе бидат во САД, при што дел од средствата ќе се вложи во земји партнери на САД, се наведува во соопштението на компаниите. Планот вклучува и привлекување дополнителни инвеститори, а пензиските и осигурителните фондови се заинтересирани за вакви долгорочни инфраструктурни инвестиции, изјави Финк.

„Не веруваме дека ќе биде тешка задача да се соберат парите“, рече тој.

Групата ги вклучува и ГИП (Global Infrastructure Partners), управителот на средства што „Блекрок“ го купува за околу 12,5 милијарди долари, МГХ од Абу Даби, која беше создадена годинава специјално за инвестирање во вештачка интелигенција, и „Енвидија“ (Nvidia Corp.), производителот на чипови што ќе ја поддржи коалицијата со своето искуство во центри за податоци и фабрики за вештачка интелигенција. „Енвидија“ има инвестирано во создавање софтвер, мрежи и други технологии што се клучни за брзо создавање комплетни системи за вештачка интелигенција.

Bloomberg

„Инвестициската можност е реална, а потребата за инвестиции е уште поголема“, изјави Бред Смит, потпретседател на „Мајкрософт“. Вештачката интелигенција „е следната технологија за општи цели што ќе го поттикне растот во секој сектор на економијата, како во САД, така и во странство“.

Компаниите веќе разговарале за плановите со американските законодавци и регулатори, рече Смит.

„Мајкрософт“ има инвестирано 13 милијарди долари во истражувачката лабораторија за вештачка интелигенција на „Опен еј-ај“ (OpenAI) и целосно ја преработува својата производствена линија за да биде базирана околу функции за вештачка интелигенција. Компанијата значително го зголемува своето трошење во центри и инфраструктура за компјутерско работење за да ги испорача тие услуги и соопшти дека нејзината способност да ги опслужи клиентите со вештачка интелигенција е ограничена поради недоволно чипови и капацитет за центри за податоци.

Потрошувачка на електрична енергија

Енергетските компании низ САД се тркаат да одговорат на порастот на побарувачката од центрите за податоци со вештачка интелигенција, чие користење енергија се очекува да се зголеми и до 10 пати до 2030 година, според „Блумберг интелиџенс“ (Bloomberg Intelligence).

За да ја задоволат таа побарувачка, енергетските компании одложуваат затворање постројки за јаглен и гас, планираат изградба на нови постројки за гас и развиваат обновлива енергија како соларни и ветерни електроцентрали. Конкуренцијата за електрична енергија доведе до зголемување на времето потребно за поврзување на новите центри за податоци на електроенергетската мрежа, при што времето на чекање во Вирџинија достигнува и до седум години.

„Денес е јасно дека достапноста на електрична енергија е еден од ограничувачките фактори за изградба не само на дата-центри туку и за електрификација воопшто“, рече Огулеси. „Производството на енергија во САД не расте драматично, така што ќе мора значително да го зголемиме темпото на развој на нови обновливи електроцентрали“.

„Мајкрософт“ исто така разговараше со соосновачот и извршен директор на„Опен еј-ај“, Сем Алтман, кој развива свои планови за групи на инвеститори и технолошки компании да соработуваат на начини за драматично проширување на компјутерската инфраструктура за производи за вештачка интелигенција.

„Фајненшл тајмс“ веќе објави за таа соработка.