„Опен еј-ај“ претстави нов модел на ВИ со способност за расудување

„Опен еј-ај“ (OpenAI) пушта нов модел на вештачка интелигенција, познат внатрешно како „јагода“ (Strawberry), кој може да извршува задачи со човечко расудување, како дел од напорите на компанијата да остане на врвот на пазарот преполн со конкуренти.

Новиот модел, наречен o1, е дизајниран да троши повеќе време одмерувајќи го одговорот пред да одговори на прашањата на корисниците, соопшти компанијата во објава во четвртокот. Со овој модел, алатките на „Опен еј-ај“ би требало да можат да решаваат повеќеслојни проблеми, вклучувајќи сложени математички и кодирачки прашања.

„Како рана верзија, сè уште нема многу од карактеристиките што го прават ЧетГПТ (ChatGPT) корисен, како што се пребарување на интернет и прикачување датотеки и слики“, посочија од компанијата. „Но, за задачи за сложено расудување, ова е значаен напредок и претставува ново ниво на способност на вештачката интелигенција. Поради тоа, ние го враќаме бројачот назад на 1 и ја именуваме оваа серија o1.“

Промотивната верзија на моделот ќе биде достапна од четврток преку популарниот четбот на „Опен еј-ај“, ЧетГПТ, за корисници со платени сметки „плус“ (Plus) и „тим“ (Team). „Блумберг“ претходно објави дека компанијата може да го пушти новиот модел веќе неделава.

 

 

Пуштањето на моделот доаѓа во време кога „Опен еј-ај“, со седиште во Сан Франциско, се обидува да собере милијарди за финансирање и се соочува со зголемена конкуренција во трката за развој на сè понапредни системи на вештачка интелигенција. „Опен еј-ај“ не е единствената компанија што работи на вакви способности; конкурентите „Антропик“ (Anthropic) и „Гугл“ (Google) исто така ги истакнаа своите напредни модели на ВИ со „способности за расудување“.

Во својата објава, „Опен еј-ај“ даде примери за одговори на моделот на прашања на теми како што се кодирање, англиски и математика и побара од него да реши едноставен крстозбор. Во серија објави на X, Ноам Браун, научник за истражување во „Опен еј-ај“, рече дека компанијата сега делумно го пушта моделот за да види како го користат луѓето и каде треба да се подобри.

Искуството со користење на ажурираниот систем на „Опен еј-ај“ ќе биде малку поинакво од она на кое луѓето се навикнати со ЧетГПТ, четботот на компанијата. Пред да одговори на корисничкото барање, новиот софтвер ќе паузира неколку секунди, додека зад сцената, невидливо за корисникот, ќе разгледува неколку поврзани прашања и потоа ќе го сумира она што изгледа како најдобар одговор. Оваа техника понекогаш се нарекува „подредување на мисловниот процес“.

Во моментов нема коментари за веста. Биди прв да коментира...

Остави коментар