„Опен еј-ај“ вреди 150 милијарди долари, покажува новиот круг на финансирање

„Опен еј-ај“ (OpenAI) сака да собере 6,5 милијарди долари средства од инвеститорите, изјавија за „Блумберг“ (Bloomberg) извори запознаени со плановите, додавајќи дека според овие податоци вредноста на компанијата е 150 милијарди долари.

Новата процена на пазарната вредност, која не ги вклучува средствата што треба да се соберат, е значително повисока од онаа што компанијата ја доби претходно годинава (86 милијарди долари). Со ова, „Опен еј-ај“ го зацврсти своето место меѓу највредните стартапи во светот.

Од друга страна, „Опен еј-ај“ исто така размислува да побара од банките 5 милијарди долари во револвинг заеми, рече еден од упатените, кој побара да остане анонимен бидејќи станува збор за приватни информации.

Компанијата не сакаше да коментира. Извори запознаени со плановите забележуваат дека разговорите сè уште се во тек и дека условите може да се променат.

Планирано е кругот на финансирање да го води „Трајв капитал“ (Thrive Capital), објави „Блумберг“ претходно. „Трајв“ одби да коментира за последното вреднување. Предвидено е да учествува и корпорацијата „Мајкрософт“, која инвестираше најмногу во „Опен еј-ај“, а „Епл“ (Apple Inc.) и „Енвидија“ (Nvidia Corp.) се во преговори за инвестирање.

„Опен еј-ај“ не е првиот голем технолошки стартап што побара од банките на Волстрит револвинг заем. Голем број технолошки компании, вклучувајќи ги и „Фејсбук“ (сега „Мета платформс“ / Meta Platforms Inc.), „Алибаба“ (Alibaba Group Holding Ltd.), „Убер“ (Uber Technologies Inc.) и „Дор деш“ (DoorDash Inc.), бараа заеми од овие банки пред да излезат на берзата, често делумно заради зајакнување на односите со банките.

Низ историјата, компаниите често ги ангажирале за ИПО токму банките што им давале заеми. За возврат, заемодавците понекогаш нудат подобри услови за финансирање.

„Опен еј-ај“, кој е основан во 2015 година, дојде во центарот на вниманието заедно со имплементацијата на вештачката интелигенција, а неговата популарност најмногу се должи на четботот ЧетГПТ (ChatGPT). Производите на компанијата, кои само со неколку кратки команди можат да создадат реални слики и текст што изгледаат како да ги направил човек, го привлекоа вниманието и на потрошувачите и на инвеститорите.

„Опен еј-ај“ од своето основање порасна многу како компанија. Кон крајот на минатата година накратко беше сменет извршниот директор Сем Алтман. Денес остана само дел од првичниот тим на основачи, а компанијата го менува одборот на директори и го зголемува бројот на вработени во менаџментот.

Главната финансиска директорка Сара Фриар рече дека компанијата ќе ги користи средствата од кругот на финансирање за да го прошири компјутерскиот капацитет и за други оперативни трошоци, објави „Блумберг“ претходно. Таа исто така рече дека стартапот сака да им дозволи на вработените да продадат дел од нивните акции подоцна годинава.

Во моментов нема коментари за веста. Биди прв да коментира...

Остави коментар