„Блекрок“ меѓу гигантите кои добија одобрение за биткоин ЕТФ фондови

Американските регулатори за првпат одобрија фондови со кои се тргува преку берза, а кои инвестираат директно во биткоин, потег што се смета за исклучително значаен настан за секторот на дигитални средства „тежок“ околу 1,7 трилион долари, бидејќи се очекува да го прошири пристапот на најголемата криптовалута до Волстрит, а и пошироко.

Американската Комисија за хартии од вредност (SEC), чиј мандат вклучува и заштита на инвеститорите, одобри фондовите за тешкашите во индустријата како „Блекрок“ (BlackRock), „Инвеско“ (Invesco) и „Фиделити“ (Fidelity), но и за помалите конкуренти, меѓу кои и „Валкири“ (Valkyrie), да започнат со тргување в четврток.

Одобрувањата означуваат ретка капитулација од страна на SEC по противењето што траеше повеќе од една деценија, откако Тајлер и Камерон Винклевос првпат предложија биткоин ЕТФ (англ. Exchange-traded funds / ETFs) во 2013 година. Неочекуваната апликација на „Блекрок“ минатиот јуни, проследена со одлука на апелацискиот суд дека претходното негирање на апликациите e „произволно и каприциозно“, предизвика бурeн раст на криптовалутата поради шпекулациите дека американските регулатори конечно ќе го дадат својот благослов за ваквата структура.

„Додека денеска ги одобривме котирањето и тргувањето со одредени спот биткоин ETP акции, ние не го одобривме ниту го поттикнуваме биткоинот“, рече претседателот на SEC, Гери Генслер. „Инвеститорите треба да останат претпазливи во врска со безбројните ризици поврзани со биткоинот и производите чија вредност е поврзана со крипто“.

Претходни пресуди

Во суштината на претходните пресуди за SEC против спот ЕТФ беше аргументот дека ниту една регулирана берза не може соодветно да го следи тргувањето со биткоин на начин што сигурно ќе открие измама и манипулација. На тој аргумент се спротивстави, меѓу другите, и „Арк инвестментс“ (Ark Investments) на Кети Вуд, која обезбеди податоци што покажуваат висока корелација помеѓу тргувањето со готовина и фјучерс-договорите што се тргуваат на платформата на ЦМЕ (CME Group).

При разгледувањето на најновиот сет на предлози, од SEC соопштија дека ја разгледувале корелацијата помеѓу спот и тргувањето со фјучерси во различни временски интервали и заклучиле дека цените се движеле на таков начин што неправилностите на берзите како „Кракен“ (Kraken) и „Коинбејс“ (Coinbase) најверојатно ќе се појават во фјучерсите.

„Бидејќи надзорот на ЦМЕ може да помогне во откривањето на тие влијанија врз цените на фјучерсите на ЦМЕ биткоин, сеопфатниот договор за споделување надзор над берзите со ЦМЕ - регулиран пазар во САД чии фјучерси на биткоин постојано се во голема корелација со спот биткоинот, иако не е со значителна големина во однос на спот биткоинот - разумно е да се очекува да помогне во надзорот за измамнички и манипулативни дејства и практики во конкретниот контекст на предлозите“, се наведува во одредбата.

Лажна објава

Одлуката доаѓа еден ден откако лажна објава на официјалниот налог на X на SEC тврдеше дека агенцијата ги одобрила ЕТФ фондовите. Регулаторот потоа соопшти дека налогот бил компромитиран, поради што цената на биткоинот значително флуктуира.

Генслер гласал, заедно со двајцата републиканци во агенцијата, за поддршка на плановите на берзите да ги понудат овие производи, покажа веб-страницата на SEC. Другите двајца демократи во регулаторот гласале против предлогот.

Говорејќи во интервју на телевизијата „Блумберг“, Хестер Пирс, една од републиканските членови на агенцијата, рече дека е воодушевена од резултатот. „Има уште делови да се завршат, но ова е голема пресвртница“, кажа Пирс, која важи за една од најгласните поддржувачи на индустријата во Вашингтон.

Биткоинот накратко достигна 47.000 долари во придушено искачување по објавата на одлуката. Тој се тргуваше со 46.480 долари заклучно со 12.42 часот во четвртокот во Сингапур. Оригиналната криптовалута, која потона за 64 отсто во 2022 година, се зголеми повеќе од двојно во 2023-та, во голем дел поради шпекулациите дека SEC на крајот ќе ги одобри ЕТФ фондовите.

Производите им овозможуваат на инвеститорите да добијат изложеност на токенот во традиционалните брокерски сметки наместо директно преку криптостартапи, кои се под зголемена контрола на властите по серија скандали и банкроти.

Во моментов нема коментари за веста. Биди прв да коментира...

Остави коментар