Ќе го пробие ли биткоинот плафонот во 2024-та?

Годинава во криптосекторот имаше многу турбуленции, стечаи, парични и затворски казни. Oд судскиот процес против Сем Банкмен-Фрид поради скандалот со криптоберзата FTX, преку До Квон, коосновачот на „Тераформ лабс“ (Terraform Labs), кого американските обвинители го обвинија за оркестрирање на наводна измама што минатата година збриша најмалку 60 милијарди долари пазарна вредност од криптовалутите тераУСД и луна, до казната за „Бајненс“ (Binance) за прекршување на законите во САД и падот на Чангпенг Жао. Се поставува прашањето колку треба да биде светла иднината на криптопазарот за да може да ги засени сите негативни случувања во 2023 година.

Прочитајте повеќе: Паднати криптокралеви!

Доколку се тргне од тоа како стојат работите сега, на крајот од годината, може да се заклучи дека оваа класа на средства, која и натаму се смета за многу нестабилна, сепак жилаво им одолева на предизвиците. Имено, цената на биткоинот се зголеми повеќе од двојно годинава (над 40.000 долари), а некои помали криптовалути, како солана, постигнаа уште подобри резултати.

Биткоинот до нова историска вредност

За очекувањата во 2024 година во криптоиндустријата разговаравме со Александар Тасевски, соосновач на „Крипто хаус“ (Crypto House) во Скопје и генерален секретар на криптоздружението „Кон месечината“ (2 The Moon), кој смета дека случаите како FTX и „Бајненс“ секако дека малку ќе го забават растот во криптоиндустријата, но, како што вели, на сите би требало да им биде јасно дека перспективата на криптото не е ставена под знак прашалник. Во ваквата своја прогноза тој оди подалеку и вели дека следната година водечката криптовалута ќе ја надмине досега најголемата вредност во своето постоење (68.789 долари), која ја имаше во ноември 2021 година.

„Мое лично мислење е дека ќе надмине и 100.000, има стручни и упатени луѓе што зборуваат и за 200.000-250.000 долари. Има и такви што во перспектива, не конкретно за 2024 година, зборуваат за вредност на биткоинот од еден милион долари, меѓутоа конкретно за ова прашање дали во 2024 година биткоинот ќе ја достигне највисоката вредност досега од 69.000 долари, мојот цврст одговор е да. Сепак, морам да се оградам, така мислев и во 2021 година, кога беше оној голем маркет, кога нештата одеа сериозно нагоре, но тогаш не се случи тоа. Сега цврсто верувам дека во 2024 година ќе дојде до тоа“, вели Тасевски.

Depositphotos

Раст поттикнат од ЕТФ и од преполовувањето

Биткоинот годинава отскокна поради очекувањата дека Федералните резерви (Фед) ќе ги намалат каматните стапки и надежта дека ќе има силен интерес за фондовите со кои се тргува преку берза (ЕТФ).

Прочитајте повеќе: Сè што треба да знаете за биткоинот откако вредноста надмина 40.000 долари

Индустријата чека да види како ќе завршат процесите за аплицирање на компании како „Блекрок“ (Blackrock) за лансирање на првиот американски биткоин ЕТФ. „Блумберг интелиџенс“ очекува група такви финансиски инструменти да добијат регулаторно одобрение до јануари.

Постои и уште еден фактор што ја движи цената - преполовувањето (англ. halving) на биткоинот, кое треба да се случи следната година.

Прочитајте повеќе: Што е преполовување на биткоинот и дали овој феномен ја зголемува цената?

„ЕТФ, според мене, се најголемата причина што ќе доведе до брз раст, бидејќи луѓето сè уште имаат некакви резерви кон криптовалутите. Од друга страна, подоверливи се кон овие големи фондови. Така што, големите фондови многу лесно може да направат една лавина од реакции. Тоа значи дека кога тие ќе почнат малку да купуваат, цената полека ќе почне да оди нагоре, при што настанува спирала, односно кога луѓето гледаат дека цената оди нагоре ќе започнат и самите да купуваат. Вториот сегмент што многу брзо ќе предизвика брз раст, конкретно на биткоинот (а тој ги влече сите други криптовалути), е преполовувањето што се очекува во април 2024 година. Ова т.н. преполовување се случува на секои четири години и тоа значи дека наградите за крипторударите се намалуваат за 50 отсто. На пример, ако сега еден рудар заработува 100 долари од машина, по четири години ќе заработува 50, по уште четири години ќе заработува 25 итн. Значи наградата за рударите се намалува. Но како што се намалува наградата за нив, така расте вредноста на биткоинот. Така што овие два фактора, ЕТФ и преполовувањето ќе бидат основните причини за очекуваниот раст на биткоинот во 2024 година“, вели Тасевски.

Тој предупредува внимателно да се следат и постапките на големите играчи во криптоиндустријата, познати како „китови“.

„Кога тие ’китови’ си играат, малите играчи доколку не се внимателни, многу лесно може да бидат изедени од големите, односно ќе си ги изгубат своите средства. Една од стратегиите што ја прават ’китовите’ е во одреден момент да тргнат да продаваат криптовалута, нагло и во големи количества. Кога ќе почнат да продаваат, луѓето што имаат криптовалути го следат тој тренд и на тој начин уште повеќе се симнува цената на криптовалутите, односно 'китовите' успеваат да ја соборат цената на криптото и создаваат шанса повторно да си купат одредена криптовалута по пониска цена. Така што во овие фактори, покрaj трејдинг фондовите и преполовувањето, треба да се земе предвид и овој момент со т.н. 'китови'“, нагласува нашиот соговорник.

Крипторегулација

Тој е еден од оние приврзаници на криптото што не го делат мислењето дека војната (конкретно војната во Украина или некои други светски кризи, како на пример на Блискиот Исток) може толку многу да влијае за движењето на вредноста. Како позначаен фактор во оваа смисла, сепак, тој ги посочува тенденциите за регулација на индустријата.

„Во светски рамки во моментот не само што многу сериозно се размислува како да се регулираат криптовалутите туку се оди и чекор понапред, дигиталното евро чука на вратата, ЕЦБ го разработува тој концепт, тука се и дигиталната рубља и дигиталниот јуан. Многу држави во светот се на прагот на усвојување на биткоинот, односно криптовалутите, како легално средство за плаќање, во многу држави тоа веќе може да се прави. Така што светот со големи чекори се движи напред по тоа прашање“, дециден е Тасевски.

Bloomberg

Во однос на регулацијата во Македонија, тој смета дека државата малку избрзала со законот со кој се регулира дигиталниот имот, донесен во текот на минатата година.

„Таму криптовалутите се третираат како имот, меѓутоа неодамна на предавање во БиХ, еден универзитетски професор по блокчејн зборуваше дека е грешка криптовалутите да се гледаат како имот. Криптовалутите, како што и самото име кажува, се валути, не се имот (asset). Така, во тој поглед, има многу за работа и кај нас, мојот личен став е да не се избрзува, да се види во светски рамки како ќе функционираат работите и да се следат оние решенија што ќе бидат имплементирани на глобално ниво“, посочува Тасевски.

Совети за инвестирање

За нашите читатели што се заинтересирани во текот на 2024 година да инвестираат во криптовалути, Тасевски ја сподели својата стратегија, која, како што и самиот вели, се базира на максимална диверзификација.

„Мојот совет за инвестирање има два сегмента. Првиот е дека треба најмалку 50 отсто од средствата да бидат во криптовалути што важат за постабилни, како биткоин, етериум, бајненс коин (BNB), коини што е многу тешко да пропаднат. Би советувал меѓу 50 и 80 отсто, во зависност кој колку е подготвен да ризикува. Меѓутоа барем 50 отсто треба да бидат во овие коини. Тие не може да паднат на нула, но може да изгубат нешто од вредноста. Другите 20 отсто треба да бидат во ризични коини (меѓу пет и 10 од нив). Тие ризични коини се бараат, секој инвеститор си прави свое испитување... Што е поентата со тие 20 отсто што, како што рековме, би требало да бидат десетина високоризични коини: Од нив, двa-три ќе пропаднат, двa-три ќе остварат мала загуба, некои ќе бидат на нула, а некои, пак, со мала добивка, но еден или два може да отидат нагоре (и да донесат добивка од x100 или x1.000).

Да ја илустрираме целата шема со пример: Ако составиме портфолио од, да речеме, 100.000 денари, 80 отсто вложуваме во оние постабилните коини (како биткоин, етериум, солана, полигон...). Потоа ни остануваат уште 20.000 денари односно 20 отсто што одат во високоризични проекти. Ако го следиме примерот, тоа би биле 10 коини, при што во секој од нив би вложиле по 2.000. Ако успее еден од нив, тоа ќе ги покрие трошоците за преостанатите девет што ќе пропаднат. Генерално, на колку повеќе страни, толку подобро. Оние што се повеќе ориентирани кон ризик може и да ја зголемат застапеноста на високоризични коини во своето портфолио, на 30 или 50 отсто“, вели Тасевски.

Во моментов нема коментари за веста. Биди прв да коментира...

Остави коментар