Криптовалутите тонат, расте стравот низ финансиските пазари

Падот на биткоинот под 90.000 долари ги продлабочи низата загуби на азиските финансиски пазари во вторникот, засилувајќи ги стравувањата дека инвеститорите со висока задолженост би можеле да предизвикаат негативна спирала на продажен притисок.

Криптовалутата падна до 2,8 отсто, продолжувајќи го трендот што ги избриша сите нејзини добивки од почетокот на годината. Тоа го зголеми притисокот врз азиските берзи: индексот MSCI Asia Pacific имаше вртоглав пад за повеќе од 2 отсто, што е негов најслаб резултат во еден месец, а речиси сите пазари во регионот забележаа пад.

Американските државни обврзници поскапеа низ целата крива, при што приносот на 10-годишните обврзници се намали за четири базични поени. Традиционално безбедните валути, меѓу кои јенот и швајцарскиот франк, се засилија, додека австралискиот долар, кој е чувствителен на ризик, ослабе. Индексот Bloomberg Asia Dollar падна на најниско ниво од мај.

Bloomberg

Некои пазарни набљудувачи предупредија дека падот на криптовалутите може да ги натера малите инвеститори да продаваат и други свои инвестиции за да ги покријат барањата за маржа. Тоа може да создаде повратна спирала, каде што падот на цените на еден пазар предизвикува продажен притисок и на другите.

„Можно е да видиме дополнителен пад кај криптовалутите, бидејќи портфолијата се приспособуваат – било по избор, било за покривање загуби на акциите“, рече Ник Твидејл, главен пазарен аналитичар во „АТ Глобал маркетс“ (AT Global Markets) во Сиднеј.

Аларм за ризик

Падот на најпопуларната криптовалута се случи во момент кога инвеститорите и онака беа загрижени околу темпото на намалување на каматните стапки во САД и го префрлаа фокусот на клучни финансиски резултати, меѓу кои и тие на „Енвидија“ (Nvidia Corp.), кои ги објавува неделава. Но падот на биткоинот под 90.000 долари беше доволен утринската поширока распродажба во Азија да ја претвори во силен пад.

„Продолжениот пад на биткоинот дефинитивно го засили чувството на ризик на пазарот, зајакнувајќи го впечатокот дека под површината се случува нешто подлабоко“, изјави Хеби Чен, аналитичарка во „Вантиџ маркетс“ (Vantage Markets) во Мелбурн.

Дополнителна тежина врз расположението во регионот донесе и уште посилната распродажба на акциите во Јапонија, делумно поттикната од загриженоста за фискалната состојба на земјата и за дипломатскиот спор со Кина.

Индексот Nikkei 225 ја заврши трговијата во вторникот со пад од 3,2 отсто, додека приносот на 10-годишните јапонски државни обврзници се искачи на највисоко ниво од средината на 2008 година, спротивно на трендот во другите земји, каде што инвеститорите купуваа државни обврзници.

Распродажбата на пазарите може да стане самоодржлива дури и без засилувачкиот ефект на задолжувањето. Криптовалутите растеа заедно со акциите оваа година, откако инвеститорите ја оставија зад себе загриженоста за глобална трговска војна и почнаа да се потпираат на иновациите за заедничко пазарно закрепнување. Тие надежи сега изгледа слабеат.

„Бумот е машина што сама се храни“, рече Ана Ву, стратег за вкрстени вложувања во „Ван Ек“ (Van Eck). „Ослабеното расположение во САД, поттикнато од трговци што продаваат позиции во ‘Енвидија’ пред објавата на резултатите и макроподатоците, се прелеа на азиските пазари. Ако го користиме биткоинот како показател за расположението на пазарот, тој укажува на ниво на страв типично за мечкин пазар.“