Преглед на берзите: Биткоинот ја предводи глобалната распродажба на берзите, обврзниците во подем

Акциите паднаа, а биткоинот достигна седуммесечно најниско ниво, бидејќи инвеститорите се повлекоа од поопасните сегменти на пазарот во пресрет на неделата со високи влогови, која ги вклучува финансиските резултати на „Енвидија“ (Nvidia Corp.) и клучниот извештај за вработување во САД.

Индексот на глобалните акции се задржа околу најниското ниво во изминатиот месец, додека азиските пазари паднаа за 2 отсто и се движат кон трет ден со загуби. Во индексот MSCI Asia Pacific речиси четири акции бележеа пад на секоја што се зголеми, а самиот индекс падна под својата 50-дневна подвижна просечна линија за првпат од април – што некои од инвеститорите го толкуваат како сигнал за слабеење на пазарот.

Фјучерсите за индексите S&P 500 и Nasdaq 100 и за европските берзи укажуваат дека денот ќе донесе нови падови и на глобалните пазари. Ослабената доверба кај инвеститорите го турна биткоинот под 90.000 долари – првпат по седум месеци. Побарувачката за посигурни вложувања се засили, па цената на обврзниците се зголеми, а приносот на референтната 10-годишна американска обврзница се намали за три базични поени, на 4,11 отсто.

Движењата ја истакнаа трајната неизвесност околу каматните стапки и добивките на технолошките компании, при што извештајот на „Енвидија“ в среда ќе ги тестира нервите на инвеститорите во однос на високите вреднувања во секторот на вештачката интелигенција. Потоа вниманието ќе се насочи кон одложениот извештај за вработување за септември, кој ќе биде објавен в четврток и ќе даде насоки за идната политика на Федералните резерви.

„Ова е распродажба што се случува кога инвеститорите немаат јасна претстава за тоа што следува на пазарите“, рече Хеби Чен, аналитичарка во „Вантиџ маркетс“ (Vantage Markets) во Мелбурн. „Бегањето од ризик – од биткоинот до најсилните технолошки акции – покажува дека инвеститорите се штитат од неочекувани ризици. Сè додека нема поголема јасност, волатилноста ќе остане основно сценарио.“

Bloomberg

Алармите се вклучуваат кај аналитичарите што ги проучуваат графичките обрасци на американскиот пазар на акции, зголемувајќи ја загриженоста дека најновиот пад може да прерасне во целосна корекција од најмалку 10 отсто.

Остриот пад на индексот S&P 500 во понеделникот ја продолжи корекцијата од последниот рекорд од 28 октомври – на 3,2 отсто. Референтниот индекс затвори под својата 50-дневна подвижна просечна линија за првпат по 139 сесии, со што беше прекината втората најдолга серија во овој век над оваа внимателно следена линија на тренд.

И индексот Nasdaq Composite испраќа „лоши“ сигнали, вели Џон Рок, раководител на техничка анализа во „22В Рисрч“ (22V Research). Повеќе од околу 3.300 компании во индексот сега тргуваат на 52-неделни минимални нивоа отколку на максимални, рече тој – сигнал за внатрешна слабост на пазарот, што ги прави понатамошната стабилизација и пораст на цените малку веројатни.

„Годинава генерално беше одлична за инвеститорите, но нервозата очигледно расте кон крајот на годината“, изјави Ник Твидејл, главен пазарен аналитичар во „АТ Глобал маркетс“ (AT Global Markets) во Сиднеј. „Можно е да видиме дополнителна волатилност во следните неколку недели, како што влегуваме во празничниот период на тргување.“

Што велат стратезите на „Блумберг“ 

Апетитот за ризик се намали бидејќи загриженоста за прегреаниот бум на вештачката интелигенција се спојува со изненадувањето на инвеститорите дека Федералните резерви можеби ќе го одложат очекуваното намалување на каматната стапка од 25 базични поени за еден месец или повеќе. Сепак, имајќи предвид дека економијата на САД веројатно ќе остане отпорна – и дека централната банка е подготвена да попушти доколку податоците го покажат спротивното, тоа ја зголемува веројатноста американските и глобалните акции да закрепнат од тековниот пад.

– Гарфилд Рејнолдс, раководител на тимот МЛИВ (MLIV).

Во другите делови од пазарот, индексот што ја мери вредноста на доларот ги задржа добивките од претходниот ден.

Цената на златото падна четврти ден по ред и сега се тргува само малку над 4.000 долари за унца. Пазарот очекува сè помала веројатност Федералните резерви да ги намалат каматите следниот месец – а кога каматните стапки се повисоки, златото обично е помалку привлечно за инвеститорите.

Акциите на „Енвидија“ (Nvidia Corp.) исто така паднаа во тргувањето во САД, откако стана јасно дека хеџ-фондот на Питер Тил ја продал својата инвестиција во компанијата во третиот квартал.

Падот на биткоинот се продлабочи – пад што трае веќе еден месец и ги избриша сите добивки на криптовалутата од почетокот на 2025 година. Тоа дополнително го влоши расположението на пазарот на дигитални средства.

Овој пресврт се случува во период на сè посилни економски притисоци, како што се повторните грижи за каматната политика и високите, напумпани вреднувања на шпекулативните пазари.

„Волатилноста на пазарот на криптовалути се прелева и на другите ризични вложувања, а дополнителна несигурност внесува и тековната процена на тоа колкави се шансите Федералните резерви да ја намалат каматната стапка во декември“, изјави Хомин Ли, виш макростратег во „Ломбард Одиер“ (Lombard Odier). „Нервозата ќе потрае сè додека септемврискиот извештај за вработување не донесе поголема јасност. Послаби податоци за пазарот на трудот или силни резултати на ‘Енвидија’ би можеле да помогнат.“

Прашањето за тоа кога ќе почнат каматните намалувања е другата голема тема што ги загрижува инвеститорите, особено поради спротивставените ставови меѓу претставниците на централната банка.

Заменик-претседателот на Федералните резерви Филип Џеферсон рече дека ризиците за пазарот на трудот се насочени надолу, но предупреди дека носителите на политиката треба да се движат претпазливо. Членот на Одборот, Кристофер Волер, пак, го поддржува намалувањето на каматната стапка во декември, повикувајќи се на слабите податоци за вработување. Трговците во моментов пресметуваат околу 40 проценти шанса за намалување на каматната стапка следниот месец.

„Претставниците на Федералните резерви продолжуваат да изразуваат грижа околу упорната инфлација, нагласувајќи дека моменталниот недостиг од информации го отежнува разбирањето на вистинскиот импулс на економијата“, напиша Дилин Ву, стратег во „Пеперстоун груп“ (Pepperstone Group Ltd.).

Корпорациски вести

„Акзо Нобел“ (Akzo Nobel NV) е во напредни разговори за спојување со конкурентот „Аксалта коутинг системс“ (Axalta Coating Systems Ltd.), велат лица запознаени со преговорите.

Акциите на „Пинкфонг“ (Pinkfong Co.), креаторот на „Бејби Шарк“ (Baby Shark), скокнаа до 62 отсто во првиот ден од тргувањето, откако инвеститорите брзо купуваа удели во студиото зад најгледаната јутјуб-песна. Скокот следуваше по силната побарувачка за ова мало иницијално јавно понудување.

„Амазон“ (Amazon.com Inc.) собра 15 милијарди долари со својата прва обврзничка понуда во американски долари по три години, придружувајќи се на бран големи задолжувања од технолошките компании.

Џина Рајнхарт, најбогатата Австралијка, стана најголем акционер во американскиот производител на ретки метали „МП Матиријалс“ (MP Materials Corp.), зголемувајќи ја својата глобална вложувачка позиција во стратешките минерали.

„Рио Тинто“ (Rio Tinto Group) речиси ќе го преполови производството во својата рафинерија за алуминиум „Јарвун“ во Австралија, бидејќи депонијата за отпад достигна максимален капацитет, а компанијата настојува да ги намали трошоците.

Некои од главните пазарни движења:

Акции

• Фјучерсите на S&P 500 паднаа за 0,4 отсто заклучно со 13:55 часот по токиско време.
• Јапонскиот Topix падна за 2,2 отсто.
• Австралискиот S&P/ASX 200 се намали за 2 отсто.
• Хонгконшкиот Hang Seng падна за 1,5 отсто.
• Шангајскиот композитен индекс се намали за 0,6 отсто.
• Фјучерсите на Euro Stoxx 50 паднаа за 1,3 отсто.

 

Валути

• Индексот Bloomberg Dollar Spot речиси не се промени.
• Еврото остана речиси непроменето на 1,1596 долари.
• Јапонскиот јен се зајакна за 0,1 отсто – на 155,08 за долар.
• Офшор-јуанот остана речиси непроменет на 7,1141 за долар.

 

Криптовалути

• Биткоинот падна за 2,5 отсто – на 89.529,26 долари.
• Етерот се намали за 0,9 отсто – на 2.978,73 долари.

 

Обврзници

• Приносот на 10-годишните американски обврзници се намали за три базични поени – на 4,11 отсто.
• Јапонскиот 10-годишен принос се зголеми за два базични поени – на 1,745 отсто.
• Австралискиот 10-годишен принос падна за три базични поени – на 4,44 отсто.

 

Суровини

• Цената на американската нафта ВТИ падна за 0,7 отсто – на 59,51 долари за барел.
• Спот-цената на златото се намали за 0,9 отсто – на 4.010,56 долари за унца.