Позитива на берзите по одлуката на судот за царините на Трамп

Американските средства денеска добија поттик откако огромен дел глобални царини на претседателот Доналд Трамп беа прогласени за нелегални и беа блокирани од трговскиот суд, што ги намали грижите за економските перспективи на земјата. Оптимистичките заработки од „Енвидија“ исто така го зголемија расположението на инвеститорите.

Фјучерсите за индексите S&P 500 и Nasdaq 100 добија 1,6 отсто и два отсто по пресудата, на која администрацијата на Трамп секако дека ќе поднесе жалба. Фјучерсите на европските акции пораснаа за 1,4 отсто по растот од 0,6 отсто на азиските акции. Јенот и швајцарскиот франк паднаа поради послабата побарувачка за средствата што се сметаат за засолниште. Мерачот на доларот се искачи на највисоко ниво за повеќе од една недела.

„Енвидија“ скокна за речиси пет проценти во постпазарното тргување во Њујорк откако производителот на чипови објави солидна прогноза за приходите.

Иако движењата на пазарот го одразуваа оптимизмот за намалување на трговските тензии, некои инвеститори беа скептични дали пресудата ќе биде правосилна.

„Ова може да се смета за удар, но не е конечниот резултат“, рече Тимоти Мо, главен стратег за акции во азиско-пацифичкиот регион во групацијата „Голдман Сакс“, во интервју за телевизијата „Блумберг“. „Поточно, постојат голем број други алтернативни акти што администрацијата на Трамп би можела да ги употреби за одржување на царините“.

Тројцата судии во Американскиот суд за меѓународна трговија во Менхетн вчера донесоа едногласна пресуда, со која се застана на страната на државите и малите бизниси предводени од демократите, кои го обвинија Трамп за несоодветно повикување на закон за вонредна состојба за да го оправда поголемиот дел од неговите давачки.

Судот ѝ даде на администрацијата десет дена да ја „спроведе“ наредбата, но не даде никакви конкретни упатства што мора да се преземе за укинување на царините. Секако дека последниот збор ќе го има Врховниот суд на САД во случајот со висок ризик што би можел да влијае на трилиони долари во глобалната трговија.

Наредбата се однесува на глобалните рамки на царини на Трамп, зголемените стапки за Кина и други земји, како и неговите царини поврзани со лекот „фентанил“ за Кина, Канада и Мексико. Другите царини наметнати според различни овластувања, како што се таканаречените давачки според членот 232 и членот 301, не се засегнати и ги вклучуваат царините за челик, алуминиум и автомобили.

„Потребни се повеќе детали“, рече Родриго Катрил, стратег во Националната банка на Австралија (National Australia Bank Ltd.) во Сиднеј. „Особено дали има забрана или дали ова оди во процес на жалба и тарифите засега остануваат во сила. Најдобрата претпоставка во оваа фаза е дека администрацијата има доволно овластувања да ја заобиколи пресудата и да воведе тарифи по неколку основи“.

Доларот денеска зајакна дури за 0,4 проценти. Индексот на доларот падна за повеќе од седум отсто од максимумот во февруари бидејќи трговската војна сериозно го наруши расположението за американските средства и поттикна преиспитување на зависноста на светот од американската валута.

„Доларот многу се распродаваше поради царините, па затоа има смисла сега да го видиме спротивното, бидејќи трговските перспективи стануваат попозитивни“, рече Мингзе Ву, трговец со валути во „Стоун икс фајненшл“ (StoneX Financial Pte) во Сингапур.

Главниот извршен директор на „Енвидија“, Јенсен Хуанг, ги смири стравувањата на инвеститорите за забавување во Кина со објавувањето солидна прогноза за продажба, велејќи дека пазарот на вештачка интелигенција сè уште е подготвен за „експоненцијален раст“.

Додека „Енвидија“ го зголемува оптимизмот, ХП (HP Inc.) падна за околу осум отсто во продолженото тргување откако изгледите за профит на компанијата беа под очекувањата и ја намали годишната прогноза за заработка, што укажува на послаба економија и континуирани трошоци од американските царини за стоки од Кина.

Вестите дека администрацијата на Трамп презема мерки за ограничување на продажбата на софтвер за дизајн на чипови во Кина предизвикаа пад на акциите на „Каденс дизајн системс“ (Cadence Design Systems Inc.) и „Синопсис“ (Synopsys Inc).

Акциите на кинескиот софтвер за чипови скокнаа откако администрацијата на Трамп им кажа на некои американски производители на апликации за дизајн на полупроводници да ги запрат испораките во земјата. Бирото за индустрија и безбедност на Министерството за трговија во петокот испрати писма до некои од водечките доставувачи на производи за автоматизација на електронски дизајн во кои им кажува да ги запрат испораките до кинеските клиенти, велат луѓе запознаени со ова прашање.

Перспективите на „Енвидија“ ги зголемија акциите на чипови и доставувачите во Азија. Растот во Јужна Кореја го искачи локалниот индекс на највисоко ниво во последните девет месеци.

 

Во моментов нема коментари за веста. Биди прв да коментира...

Остави коментар