text size
„Булиш“ (Bullish), оператор на берза за дигитални средства меѓу чии поддржувачи е милијардерот Питер Тиел, поднесе барање за почетна јавна понуда на акции (ИПО) во најновиот обид на компаниите за криптовалути да влезат на јавните пазари.
Компанијата, со седиште на Кајманските Острови, имаше нето-загуба од околу 349 милиони долари од продажба на дигитални средства од 80 милиони долари во првиот квартал, во споредба со нето-добивка од 105 милиони долари од приближно истата продажба претходната година, според извештајот што компанијата го поднесе до Комисијата за хартии од вредност на САД во петокот.
Според известувањето, „Булиш“ се приклучува на растечкиот број криптокомпании што се залагаат годинава за берзански котации, било преку конвенционални ИПО, спојување со компании со бланко-чекови или преземања.
Најзначаен беше издавачот на стабилни монети „Сркл интернет груп“ (Circle Internet Group Inc.), чии акции скокнаа дури за 750 проценти над нивната цена од ИПО во првиот месец по понудата од 1,2 милијарда долари.
Криптофирмите во САД имаа корист од поддршката на администрацијата на Трамп за индустријата и Конгресот за унапредување на криптозаконодавството, што кулминира со усвојувањето и потпишувањето на новиот закон неделава за регулирање на стабилните монети.
Предводена од главниот извршен директор Том Фарли, берзата на „Булиш“ нуди криптоспот-тргување, тргување со маржи и со деривати, но нејзините маржи и деривати во моментов не се достапни во САД или за американските корисници.
„Имаме намера да направиме ИПО затоа што веруваме дека индустријата за дигитални средства го започнува својот следен чекор на раст“, напиша Фарли во писмото до инвеститорите во петокот. „Транспарентноста и усогласеноста ги гледаме како белег на начинот на кој работиме со ‘Булиш’ и веруваме дека тие вредности добро се совпаѓаат со јавните пазари на капитал“, рече тој.
„Булиш“ го купи медиумскиот канал „Коиндеск“ (CoinDesk) од „Диџитал кренси груп“ (Digital Currency Group) во 2023 година, а сумата не беше откриена.
Според поднесениот извештај, најголеми инвеститори на „Булиш“ се извршниот директор на „Блок уан“ (Block.one), Брендан Блумер, „Пу Луо Чанг прајват“ (Pu Luo Chung VC Private Ltd.) и Александар Си, како и нивните филијали.
Компанијата во 2021 година објави дека планира да излезе на берза преку посебен субјект за аквизиција, но потоа планот го стави на чекање.
Понудата ја водат „ЏП Морган Чејс“, „Џефрис фајненшл груп“ и „Ситигруп“. Компанијата планира да дебитира на њујоршката берза под симболот BLSH.
.webp){kind=icon}
