Европските акции закрепнаа по падот предизвикан од технолошкиот сектор: Преглед на пазарите

Европските акции закрепнаа по продажбата поттикната од технолошкиот сектор, поставувајќи стабилен тон на почетокот од месецот, кој историски важи за слаб за пазарите.

Stoxx 600 порасна за 0,3 отсто, откако индексот на технолошките акции во регионот остана стабилен по падот во петокот. Азиските акции имаа мешана трговија, а акциите на производителите на чипови паднаа откако САД ги повлекоа дозволите што им овозможуваа на „Самсунг електроникс“ (Samsung Electronics Co.) и „СК Хиникс“ (SK Hynix Inc.) да користат американска технологија во Кина. Фјучерсите на S&P 500 и Nasdaq 100 останаа речиси непроменети, со оглед на тоа што берзанската трговија со акции и обврзници во САД беше затворена поради празникот Ден на трудот.

Среброто се искачи над 40 долари за унца за првпат од 2011 година, додека златото се приближи кон рекордно ниво, бидејќи растеше оптимизмот за намалување на каматните стапки од страна на Федералните резерви овој месец.

Следните неколку недели ќе му дадат јасна слика на Волстрит дали рекордниот берзански подем ќе продолжи или пак ќе биде прекинат. Извештаите за вработување, клучниот податок за инфлацијата, и одлуката на Федералните резерви за каматните стапки ќе бидат објавени во следните 14 трговски сесии, одредувајќи ја насоката за инвеститорите што се враќаат од летните одмори.

„Што се однесува до американскиот пазар, фокусот јасно е ставен на податоците за вработување и инфлација и како тие ќе влијаат врз очекувањата за понатамошни намалувања на каматите на Фед“, изјави Александар Барадез, главен пазарен аналитичар во ИГ (IG) во Париз.

Глобалните акции обично паѓаат во септември

Bloomberg

Корпорациски вести:

„Еквинор АСА“ (Equinor ASA) соопшти дека има намера да се претплати за нови акции во развивачот на ветерници „Орстед А/С“ (Orsted A/S), како прв голем инвеститор по данската влада што ќе ја поддржи продажбата.

„Опен еј-ај“ (OpenAI) има намера да изгради нов масивен дата-центар во Индија, што би можело да претставува голем чекор напред во Азија за нејзината инфраструктурна иницијатива за вештачка интелигенција со брендот „Старгејт“ (Stargate).

„Капвест партнерс“ (CapVest Partners) е блиску до договор за купување на „Штада арцнајмител АГ“ (Stada Arzneimittel AG) за околу 10 милијарди евра (11,7 милијарди долари), вклучувајќи го и долгот, со што потенцијално би завршила долгогодишната сага за продажбата на германската фармацевтска компанија. 

Акциите на „Алибаба груп холдинг“ (Alibaba Group Holding Ltd.) скокнаа за повеќе од 18 отсто по извештајот за растот на приходите од вештачка интелигенција, нагласувајќи го континуираниот напредок што компанијата го прави во однос на конкурентите во кинеската трка по „Дипсик“ (DeepSeek).

Акциите на БЈД (BYD Co.) паднаа по извештајот за огромен пад на кварталната добивка од 30 отсто во петокот, што претставува прв пад по повеќе од три години и покажува дека дури ни доминантните играчи не се безбедни во жестоката борба за удел на пазарот.

Некои од главните движења на пазарите:

Акции

Индексот Stoxx Europe 600 порасна за 0,4 отсто заклучно со 8:33 часот по лондонско време

Фјучерсите на S&P 500 останаа речиси непроменети

Фјучерсите на Nasdaq 100 останаа речиси непроменети

Фјучерсите на Dow Jones Industrial Average останаа речиси непроменети

Индексот MSCI Asia Pacific остана речиси непроменет

Индексот MSCI Emerging Markets порасна за 0,6 отсто

Валути

Индексот Bloomberg Dollar Spot остана речиси непроменет

Еврото порасна за 0,3 отсто, на 1,1718 долари

Јапонскиот јен остана речиси непроменет, на 147,15 за долар

Офшор јуанот остана речиси непроменет, на 7,1292 за долар

Британската фунта порасна за 0,1 отсто, на 1,3518 за долар

Криптовалути

Биткоинот падна за 0,4 отсто, на 108.679,5 долари

Етерот падна за 0,7 отсто, на 4.422,51 долари

Обврзници

Приносот на 10-годишните американски државни обврзници остана речиси непроменет, на 4,23 отсто

Приносот на 10-годишните германски обврзници порасна за три базични поени, на 2,76 отсто

Приносот на 10-годишните британски обврзници порасна за три базични поени, на 4,75 отсто

Суровини

Суровата нафта брент порасна за 0,4 отсто, на 67,77 долари за барел

Спот цената на златото порасна за 0,7 отсто, на 3.471,48 долари за унца