Внимателен старт на азиските пазари во пресрет на средбата за мир во Украина

Азиските пазари забележаа раст додека инвеститорите ги очекуваат разговорите на американскиот претседател Доналд Трамп со неговиот украински колега Володимир Зеленски, откако самитот со Русија заврши без ново разгорување на геополитичките тензии.

Азиско-пацифичкиот индекс MSCI порасна за 0,4 отсто, поттикнат од растот во Кина и Јапонија, додека Јужна Кореја заостануваше. Фјучерсите на европските акции се зголемија за 0,3 отсто, а оние на S&P 500 за 0,1 отсто. Индексот на акциите котирани во Шангај е на пат кон највисоко затворање во последната деценија. Индиските акции скокнаа за 1,5 отсто – најмногу во повеќе од три месеци – откако беше најавено намалување на данокот на потрошувачка за првпат од неговото воведување пред речиси десет години.

Цената на суровата нафта се движеше променливо, бидејќи се намалија стравувањата од прекини во снабдувањето. Индексот на доларот остана речиси непроменет. Приносот на 10-годишните американски државни обврзници се намали за еден базичен поен, на 4,30 отсто. Златото порасна за 0,4 отсто, а криптовалутите паднаа.

Разговорите меѓу Трамп и Зеленски в понеделник ќе бидат во фокусот на инвеститорите, кои ќе бараат индикации за идното движење на пазарите, откако самитот со Путин заврши без нови санкции за Русија или за купувачите на нејзината нафта. Трговците исто така остануваат претпазливи пред годишниот состанок на Федералните резерви во Џексон Хол, каде што говорот на претседателот Џером Пауел ќе биде внимателно следен за насоки околу можниот септемвриски пресек на каматните стапки по најновите американски податоци.

Бидејќи очекувањата пред самитот меѓу Трамп и Путин веќе беа мали, реакцијата на пазарите најверојатно ќе биде умерена, „бидејќи сè уште многу зависи од подготвеноста на Украина да ги прифати условите од Русија“, вели Џордан Рочестер, раководител за макростратегија за EMEA (Европа, Блискиот Исток и Африка) во „Мизухо“ (Mizuho Corp.). „Но надежта е силен фактор и овој исход ќе ја одржи постепената расположеност за преземање ризик“.

 

Bloomberg

Иако се очекува САД да се фокусираат на територијалните отстапки што ги бара Русија, Киев ќе се обиде да обезбеди појасни гаранции за безбедност, наведува извор упатен во ситуацијата.

Што велат стратезите на „Блумберг“...

Акциите денеска претежно бележат мал раст, додека пазарите чекаат да видат каков исход ќе донесе посетата на украинскиот претседател Зеленски во Белата куќа. Инвеститорите изгледа повеќе се насочени кон тоа што нема негативни сигнали од средбата во Алјаска отколку кон отсуството на позитивни вести.
– Гарфилд Рејнолдс, раководител на тимот на МЛИВ (MLIV).

 

Конечниот резултат од петочниот самит е без поголеми промени, бидејќи засегнатите страни сè уште ги бараат следните чекори за решавање на кризата, изјави Хелима Крофт, шефица на стратегија за суровини во „РБЦ Капитал маркетс“ (RBC Capital Markets LLC). Сега вниманието може повторно да се пренасочи кон Индија и Кина, додека САД бараат начини дополнително да ги ограничат приходите на Кремљ од нафта.

„Трамп изгледа ги става на ‘пауза’ сите дополнителни санкции или секундарни тарифи за енергентите“, изјави Крофт.

Во петокот трговците на Волстрит (Wall Street) ги спуштија акциите од рекордните нивоа, откако податоците покажаа мешани сигнали за тоа како американските потрошувачи гледаат на економијата. Американските државни обврзници исто така ја завршија неделата пониско, во пресрет на состанокот во Џексон Хол во Вајоминг.

Говорот на Пауел в петок на годишниот собир на централната банка означува почеток на клучен период за пазарот на државни обврзници, кој веќе гледа намалување на каматните стапки за четвртина процентен поен следниот месец како готова работа, со уште едно намалување до крајот на годината.

Во меѓувреме, странските вложувања во американските државни обврзници достигнаа рекордно високо ниво во јуни, што укажува на постојана странска побарувачка за американски државен долг, и покрај падот на доларот што поттикна загриженост за расположението кон американските средства.

Неделава инвеститорите ќе ги следат и податоците за инфлацијата во Јапонија како насока за тоа дали Банката на Јапонија (Bank of Japan) ќе ги зголеми каматните стапки уште еднаш годинава. Кинеските основни каматни стапки за кредити исто така ќе бидат во фокусот, среде очекувањата за нов стимул од Пекинг за да се преброди трговската војна на Трамп.