text size
Глобалните берзи денеска бележат широк раст, додека инвеститорите добија дополнителна поддршка од падот на цените на нафтата, кој ги ублажи стравувањата од повторно засилување на инфлацијата. Истовремено, приносите на државните обврзници се намалија, што дополнително го подобри расположението на финансиските пазари.
Фјучерсите на американскиот индекс S&P 500 пораснаа за 0,3 отсто, откако индексот вчера се затвори на само чекор од својот историски максимум. Во нагорна насока се движеше и Nasdaq 100, кој се подготвува за дополнително поместување во рекордната зона. Добивки забележаа сите компании од таканаречената величествена седумка, предводници на американскиот технолошки сектор. Доларот бележеше нестабилно движење, додека цената на северноморската нафта брент се спушти кон 98 долари за барел.
Позитивното расположение се прелеа и на европските пазари. Индексот Stoxx 600 порасна за 0,7 отсто и се движи кон прва тридневна серија на раст во последниот месец. Европските обврзници исто така закрепнаа по неодамнешниот пад, при што особено силен раст забележаа француските и италијанските државни обврзници. Еврото, пак, закрепна од 17-месечниот минимум.
На пазарите во моментов се чувствува пошироко олеснување, иако високите цени на нафтата и зголемените приноси на обврзниците во изминатиот период го ограничуваа апетитот на инвеститорите за ризик. Глобалните берзански индекси, сепак, досега релативно добро ги издржаа притисоците, потпирајќи се пред сè на силните корпоративни резултати и огромните инвестиции во вештачката интелигенција.
Според аналитичарите, растот на берзите годинава во поголема мера е поттикнат од подобрувањето на профитите на компаниите отколку од зголемувањето на нивните берзански вреднувања. Стручњаците очекуваат овој тренд да продолжи доколку ревизиите на прогнозите за заработката останат позитивни, особено во САД, каде што компаниите во просек даваат подобри прогнози од очекуваното.
Во меѓувреме интересот за инвестиции поврзани со вештачката интелигенција продолжува да расте. „Опен еј-ај“ (OpenAI), според наводите, разговара со повеќе инвестициски фондови од Обединетите Арапски Емирати за нивно учество во финансирање вредно околу 30 милијарди долари. Во Кина компаниите за вештачка интелигенција „Дипсик“ (DeepSeek) и „Муншот“ (Moonshot AI) исто така се обидуваат да обезбедат скапо финансирање. Дополнително, матичната компанија на „Гугл“ (Google), „Алфабет“, склучи договор за купување електрична енергија произведена од нуклеарни извори од КЕ (Constellation Energy).
Сепак, аналитичарите предупредуваат дека растот на берзите останува концентриран во релативно мал број технолошки компании. Според процените на „Џефрис“ (Jefferies), силните корпоративни резултати, продолжувањето на капиталните инвестиции и високата ликвидност во финансискиот систем би можеле да продолжат да го поддржуваат инвестирањето во компании што обезбедуваат инфраструктура, опрема и технологии неопходни за развојот на вештачката интелигенција.
На европскиот пазар во фокусот останува и Франција, каде што политичката нестабилност и високите трошоци за финансирање на државниот долг и натаму создаваат притисок. И покрај новите знаци на политички превирања и студентските протести поради кои беа затворени стотици средни училишта, француските државни обврзници денеска забележаа раст. Разликата меѓу приносот на 10-годишните француски и германски обврзници се намали на помалку од 1,30 процентни поени, откако неодамна достигна речиси 1,60 процентни поени.
Дополнителен сигнал до инвеститорите испрати и француската претседателска кандидатка Марин Ле Пен, лидерка на крајно десничарската Национален собир, која предложи буџетскиот дефицит на земјата да биде намален под 3 отсто од БДП до 2032 година. Франција во последниот период е под зголемен притисок на пазарите поради политичката неизвесност и растечките трошоци за сервисирање на јавниот долг.
Што велат аналитичарите на „Блумберг економикс“:
„На долг рок, инвеститорите во француски државни обврзници веројатно нема да бидат убедени од фискалните цели наведени во алтернативниот буџетски план на Марин Ле Пен. Постигнувањето на тие цели би барало значително заострување на фискалната политика во време кога нема доволно политички консензус за длабоки кратења на јавната потрошувачка. Со оглед на тоа што изгледите за јавните финансии и натаму се неизвесни, француските обврзници остануваат изложени на ризик од нов бран распродажба.
- Вен Рам, стратег за повеќе класи на средства.
.webp){kind=icon}
