Пазарот ги „казнува“ европските компании кои ги утнаа проценките за заработка

Берзанскиот пазар им изрекува најстрога казна во последните децении на компаниите кои не ги исполнуваат проценките за заработка во Европа во овој квартал, покажува истражувањето на „Голдман Сакс“ (Goldman Sachs Group Inc.).

Компаниите-членки на индексот Stoxx Europe 600 кои објавија заработка или најави за профит пониски од предвидените, заостануваат од референтната вредност за 2,3 процентни поени во просек, според податоците на „Голдман“. Тоа е најлошата реакција во анализите на банката уште од 2005 година.

Толеранцијата за слаби резултати е минимална: влегувајќи во периодот на известување, аналитичарите ги намалија проценките за да ги земат предвид нарушувањата и конфузијата предизвикани од американските царини. Сепак, сезоната беше полна со предупредувања од низа сектори, вклучувајќи ги производителите на лекови, автомобилските компании и акциите за производи за широка потрошувачка.

Француската автомобилска компанија „Рено“ (Renault SA) падна за 18 проценти откако ги намали своите насоки за оперативна маржа за 2025 година, додека германскиот производител на спортска облека „Пума“ (Puma SE) падна за 16 проценти по бројките што ги натераа некои аналитичари да предупредат дека компанијата се соочува со „егзистенцијална криза на идентитетот“.

Највисокопрофилното предупредување дојде од данскиот фармацевтски производител „Ново Нордиск А/С“, чие шокантно намалување на насоките накратко избриша над 90 милијарди долари пазарна капитализација.

„Оптимизмот за раст во Европа веќе е донекаде намален од пазарот“, напишаа во белешка стратезите на „Голдман“, вклучувајќи ги Питер Опенхајмер и Шерон Бел. „Ова може да укажува на поголема ранливост во случај на ризици од пад и разочарување“.

Гледајќи ја реакцијата на пазарот, не би знаеле дека сезоната на заработка всушност се покажува подобра отколку што се стравуваше.

Откако повеќе од 80 проценти од компаниите од MSCI Europe објавија резултати, растот на заработката по акција е непроменет за кварталот во споредба со очекувањата на аналитичарите за пад од 4,8 проценти, покажуваат податоците собрани од „Блумберг Интелиџенс“ (Bloomberg Intelligence).

Но, Stoxx 600 се бори да го врати својот мартовски рекорд. Откако го остави S&P 500 во прашина во првиот квартал, европскиот репер повторно почна да заостанува во последните три месеци, бидејќи облозите за робусна економија ги привлекоа инвеститорите назад кон американските акции.

Загриженоста за влијанието на американските царини врз економскиот раст го намалува расположението на инвеститорите во Европа. Претседателот Доналд Трамп минатата недела објави низа давачки за земји, вклучувајќи ја и Швајцарија, предизвикувајќи го најголемиот еднодневен пад на Stoxx 600 од април.

- Со помош од Јан-Патрик Барнерт