Загрепска берза од денеска го воведува во употреба еврото

Загрепската берза ја воведува во употреба европската заедничка валута. Утровото преку соопштение до јавноста од Загрепската берза информираат дека почнувајќи од денеска податоците ќе ги презентираат и во хрватски куни и во европската валута. Хрватска станува дел од еврозоната од почетокот на следната година.

„Во рамки на подготовката за воведување на еврото, Загрепска берза од денеска, 5 септември 2022 година, започнува со двојно искажување на поединечните податоци на својата интернет страница и сервисите, во куни и во евра и така ќе биде се до крајот од 2023 година“, пишува во соопштеснието од Загрепска берза.

При тоа, во двете валути ќе се прикажуваат збирните податоци за тргување во рамки на дневниот преглед, цените и прометот на поединечните финансиски инструменти на интернет страницата, цените и прометот достапни во реално време на апликацијата ZSE Monitor, како и дневните и неделните извештаи што ги добиваат претплатниците на Загрепска берза. Исто така, и во куни и во евра ќе се прикажува и последната, најниската и највисоката вредност на дневните цени на поединечните инструменти, како и цените на услугите на берзата и на едукативниот центар во нејзини рамки.

Инаку, Загрепска берза поседува 29,98 проценти од акциите на Македонска берза и со тоа е најголемиот акционер на нашата берза.