Допирот на Трамп носи раст – вивнаа акциите во кои инвестира САД

Сè што ќе посака претседателот на Соединетите Американски Држави (САД) Доналд Трамп, тоа успева на пазарот на капитал. Така, акциите на пет компании во кои американската администрација купи удел оваа година скокнаа, а најголем пораст од објавувањето на преземањето до денес е забележан кај акциите на компанијата „МП Материјалс“ (MP Materials) - производител на ретки, критични суровини.

Америка презеде сопственички удели во пет големи јавно котирани компании и речиси сите веднаш забележаа зголемување на вредноста на нивните акции по објавувањето на преземањето.

Купувањето акции е претставено како еден од потезите во спроведувањето на стратегијата за национална безбедност и означува нова фаза од улогата на САД во клучните индустрии. Целта е да се обезбедат домашни синџири на снабдување за полупроводници и критични суровини.

Акциите на „Ју-Ес Стил“(US Steel) пораснаа за околу два процента по објавата на 12 јуни дека владата на САД ќе добие таканаречена „златна акција“ како дел од аквизицијата од „Нипон Стил“ (Nippon Steel). Од почетокот на годината до затворањето на аквизицијата, акциите на „Ју-Ес Стил“ пораснаа вкупно за околу 61 процент. Како дел од уникатниот договор, американската администрација обезбеди посебна акција што ѝ дава на владата трајно право на вето врз клучните корпоративни одлуки, вклучително и преместување на нејзиното седиште од Питсбург, преместување на производството во странство или затворање на американските фабрики. Откако аквизицијата беше завршена на 18 јуни, „Ју-Ес Стил“ беше отстранета од берзата и повеќе не е јавно тргувана компанија.

Следните акции што ги купи САД беа од „МП Материјалс“ (MP Materials) во јули оваа година, а нејзината вредност се зголеми за 29 проценти по објавувањето. Од објавувањето, акциите на производителот на ретки метали пораснаа за 63 проценти. Од почетокот на годината, акциите на „МП Материјалс“ скокнаа за 373 проценти. Компанијата управува со единствениот целосно интегриран погон за рударство и преработка на ретки суровини во САД.

Во август беше објавено дека САД купуваат акции на „Интел“, кои, за разлика од нивните претходници, изгубија вредност во моментот на објавувањето и паднаа за еден процент. Сепак, подоцна, акциите на овој полупроводнички гигант пораснаа за 50 проценти од објавувањето на 22 август. Вкупно, акциите на „Интел“ пораснаа за 85 проценти од почетокот на годината.

Крајот на септември беше обележан со најавата дека САД ќе купат акции на „Литиум Америкас“ (Lithium Americas), кои пораснаа за 45 проценти за осум дена. Администрацијата купи удел во „Литиум Америкас“ како дел од преговорите за реструктуирање на федерален заем од 2,26 милијарди долари, со кој ќе се поддржи развојот на рудникот за литиум „Такер Пас“ во Невада. Се очекува ова да биде најголемата операција со литиум во западната хемисфера кога ќе започне производството во 2028 година. Проектот има за цел да го зајакне домашниот синџир на снабдување со литиум за производи како што се батериите за електрични возила.

Последното објавување за купување акции од САД беше пред два дена. Станува збор за компанијата „Трилоџи Металс“ (Trilogy Metals) и во моментот на објавувањето, на 6 октомври, вредноста на овие акции се зголеми за 20 проценти. Овие акции, во споредба со сите други во кои што влегоа САД за време на вториот мандат на Трамп, имаа најголем раст од почетокот на годината до денес, импресивни 729 проценти.

Инвестицијата е дел од поддршката на Белата куќа за истражување на рудници во рударскиот округ Амблер во Алјаска, еден од најголемите неразвиени минерални појаси на бакар и цинк во светот.

Стратегијата за директни инвестиции во клучни компании би можела да се прошири и на одбранбениот сектор. Министерот за трговија Хауард Лутник потврди дека администрацијата размислува за купување удели во компании како „Локид Мартин Корп.“( Lockheed Martin Corp), истакнувајќи дека тие речиси сите свои приходи ги добиваат од владата на САД односно дека работат „во суштина како продолжение на владата на САД“. Веста ги зголеми акциите во одбранбениот сектор.

Во моментов нема коментари за веста. Биди прв да коментира...

Остави коментар