Акциите на азиската „Виктори“ со раст од 600 отсто благодарение на „Енвидија“

Иако судирите меѓу САД и Кина околу царините и трговските ограничувања се доминантна тема во технолошкиот свет, најжешката азиска акција оваа година покажува дека двете нации сè уште се потпираат една на друга.

Акциите на „Виктори џајант технолоџи“ се зголемени за речиси 600 отсто годинава, надминувајќи го индексот MSCI Asia Pacific, поттикнати од врската со нивниот клучен клиент „Енвидија“. Кинескиот производител се смета дека има специјализација во апликации за вештачка интелигенција и способност брзо да ги задоволи потребите на клиентите.

Оваа компанија се издвојува од другите неодамнешни успешни акции кои ја нагласуваат поделбата меѓу обидите на САД да ја вратат технолошката продукција дома и напорите на Кина да ја зајакне самостојноста.

„Последниот раст на ‘Виктори’ покажува колку се важни односите меѓу САД и Кина за глобалниот технолошки екосистем,“ рече Џералд Ган, заменик главен инвестиционен директор во „Рид капитал партнерс“. „Иако двете страни продолжуваат да се натпреваруваат во развојот на напредни чипови, зависноста од кинеските производители за клучни хардверски компоненти покажува дека целосната разделба е непрактична во блиска иднина.“

Минатонеделните разговори на високо ниво оставија неизвесност околу можноста за продажба на чипови од „Енвидија“ во Кина — негативниот сентимент поврзан со тоа ја намали вредноста на акциите на „Виктори“ за 13 отсто во последните две сесии. Но, јасно е дека американскиот производител на чипови сè уште се потпира на кинескиот синџир на снабдување, кој неговиот извршен директор Џенсен Хуанг го нарече „чудо“.

Во секој случај, нема сомнеж дека најголемите технолошки компании во светот ќе продолжат масовно да инвестираат во развој на нивните ВИ услуги. „Енвидија“ ќе продолжи да има корист од тоа, заедно со нејзините добавувачи.

 

Таканаречените  „pick-and-shovel“ компании (оние кои обезбедуваат основна инфраструктура, алатки или компоненти што им се потребни на другите компании за да го создадат својот производ)  со доминантни позиции добиваат големи награди од инвеститорите, како што е водечкиот производител на чипови за вештачка интелигенција „Тајван семикондактор“, чија пазарна вредност годинава за првпат надмина 1 билион долари.

Метеорскиот раст на „Виктори“  донесе осумкратно зголемување на нејзината пазарна капитализација од почетокот на јануари до над 40 милијарди долари. Компанијата се смета за лидер во високо-густински интерконекции и повеќеслојни печатени кола (PCBs), кои се клучни за ВИ чиповите.

Задоволувањето на ненаситната побарувачка од клиенти е тешко за некои добавувачи, како „СК хиникс“, која во средата соопшти дека веќе ги распродала сите залихи на мемориски чипови за следната година. „Виктори“ не се соочува со такви проблеми.

Компанијата од Хуижоу има „способност многу брзо да го зголеми производствениот капацитет и е подготвена да инвестира во него, што е многу важен критериум за „Енвидија“ или купувачите кои ги распределуваат своите нарачки,“ рече Викторија Миo, раководителка за акции во„Јанус Хендерсон“ во Сингапур.

Основана во 2006 година, „Виктори“ тргува на берзата во Шенжен нешто повеќе од една деценија. Нејзините планови да собере околу 1 милијарда долари преку листирање во Хонг Конг беа дополнителен поттик во последните месеци, заедно со силните резултати поттикнати од ВИ.

Нето добивката на компанијата во третиот квартал скокна за 260 отсто во однос на минатата година, додека продажбата порасна за 79 отсто на над 5 милијарди јуани (715 милиони долари).

Иако минатата година имаше над 2.000 производители на печатени кола (PCB) ширум светот, „Виктори“ се истакна како водечка по продажба за апликации во вештачка интелигенција и компјутерство со високи перформанси, според Сумит Синг, раководител на истражување на акции. Компанијата остварува околу 60 отсто од продажбата во странство, веројатно целосно преку „Енвидија“, со оглед на високата технолошка експертиза на „Виктори“, рече тој.

И покрај огромниот раст на цената на акциите, „Виктори“ се тргува по 32 пати над вредноста од проценетата добивка за наредните 12 месеци — далеку под нивото од кинеските производители на чипови „Семикондартор“ и „Камбрикон“. Вреднувањето е приближно на исто ниво со „Енвидија“.

Пазарот очекува понатамошен раст, при што сите 16 аналитичари што ја следат „Виктори“ ја оценуваат акцијата како „за купување“. Консензуалната целна цена предвидува дополнителен раст од 16 отсто во текот на следната година.

Тековниот раст на големите ВИ компании предизвика загриженост поради концентрација во само неколку акции. Џон Лин, главен инвестиционен директор за акции од пазарите во развој и кинески акции во „Алијанс бернстајн“, рече дека наместо тоа, тој бара изложеност кон ВИ преку „второстепени или заднински корисници“.

„Производителите на PCB се одличен пример за таков пристап,“ рече Лин, чие портфолио на акции од Кина ја наведува „Виктори“ како најголемо вложување. „Производителот на PCB игра клучна улога во овозможувањето на системи за компјутерство  со високи перформанси — на крајот, дури и најдобрите чипови во светот не можат да функционираат без висококвалитетна, прецизно дизајнирана плочка на која ќе бидат поставени.“