Недостигот од мемориски чипови ги разнишува пазарите, а најлошото допрва доаѓа

Непрестајниот раст на цените на мемориските чипови во изминатите неколку месеци создаде длабока поделба меѓу добитниците и губитниците на берзите, а инвеститорите не гледаат дека тоа наскоро ќе заврши.

Компании – од производителот на гејминг-конзоли „Нинтендо“ (Nintendo Co.), преку големи брендови за персонални компјутери, до доставувачи на „Епл“ (Apple Inc.) – бележат пад на акциите поради загриженост за профитабилноста. Производителите на мемориски чипови, пак, растат до досега невидени нивоа. Управителите на фондови и аналитичарите сега проценуваат кои компании најдобро можат да се справат со притисокот, преку обезбедување резерви, зголемување на цените на производите или редизајн за користење помалку меморија.

Показателот на „Блумберг“ за глобалните производители на потрошувачка електроника падна за 12 отсто од крајот на септември, додека кошничката од производители на мемориски чипови, во која е вклучен и „Самсунг електроникс“ (Samsung Electronics Co.), порасна за повеќе од 160 отсто. Прашањето сега е колку од тоа веќе е вградено во цените.

„Она што сѐ уште не е доволно согледано е ризикот поврзан со траењето – тековните вреднувања во голема мера пресметуваат дека нарушувањата ќе се нормализираат во рок од еден до два квартала“, изјави Вивиен Паи, менаџерка на фондови во „Фиделити“ (Fidelity International). „Ние сметаме дека затегнатоста во индустријата најверојатно ќе продолжи“, можеби и до крајот на годината, додаде таа.

Недостигот од мемориски чипови создава јаз меѓу добитниците и губитниците на берзите

Bloomberg

Недостигот и цените на мемориските чипови сѐ почесто се споменуваат во финансиските извештаи и на конференциските повици на компаниите. Инвеститорите ги слушаат алармантните сигнали.

Акциите на „Квалком“ (Qualcomm Inc.) паднаа за повеќе од 8 отсто минатиот четврток, откако производителот на процесори за паметни телефони сигнализираше дека ограничувањата со меморијата ќе ја ограничат продукцијата на телефони. „Нинтендо“ (Nintendo Co.) го забележа најголемиот пад во последните 18 месеци во Токио, ден откако предупреди на притисок врз маржите поради недостигот.

Швајцарскиот производител на периферна опрема „Логитек“ (Logitech International SA) забележа пад на акциите од околу 30 отсто од врвот во ноември, бидејќи повисоките цени на чиповите ги влошија изгледите за побарувачката за персонални компјутери. Акциите на кинеските производители на електрични возила и паметни телефони, од БЈД (BYD Co.) до „Шаоми“ (Xiaomi Corp.), исто така се движат слабо поради загриженоста поврзана со недостигот од чипови.

„Цените на меморијата навистина од споредна тема прераснаа во насловна приказна во оваа сезона на објавување резултати“, изјави Чару Чанана, главен инвестициски стратег во „Саксо“ (Saxo). „Пазарот генерално разбира дека цените на меморијата растат и дека понудата е ограничена – тоа веќе не е нова информација и би претпоставила дека тоа е вградено во цените. Но, се чини дека сега почнува да се доведува во прашање времетраењето на оваа затегнатост во понудата.“

Мемориски „суперциклус“

Загриженоста околу побарувачката и добивките врши притисок врз корпоративниот сектор, дополнително засилен од стравувањата дека огромните инвестиции во инфраструктура за вештачка интелигенција од страна на американските хиперскалери дополнително ќе го продлабочат недостигот од мемориски чипови. Огромната изградба на ВИ-инфраструктура, предводена од компании како „Амазон“ (Amazon.com Inc.), го пренасочи производствениот капацитет кон меморија со висок пропусен опсег, на штета на традиционалната DRAM-меморија.

Тоа доведе до појава што некои ја опишуваат како „суперциклус“, кој ги нарушува вообичаените циклуси на подем и пад во понудата и побарувачката на мемориски чипови.

Цените на сите типови меморија нагло пораснаа од есента
И DRAM и NAND бележат силен раст, бидејќи вештачката интелигенција го оптоварува производствениот капацитет

Bloomberg

Спот-цените на DRAM пораснаа за повеќе од 600 отсто во изминатите неколку месеци, иако побарувачката за крајни производи како паметни телефони и автомобили останува слаба. Дополнително, вештачката интелигенција создава нова побарувачка за чипови NAND и други производи за складирање податоци, што ги турка трошоците нагоре и во тие сегменти. Поради тоа, производителите на мемориски чипови се издвоија како најголеми добитници меѓу технолошките акции.

Акциите на „СК Хајникс“ (SK Hynix Inc.), клучен доставувач на меморија со висок пропусен опсег за „Енвидија“ (Nvidia Corp.), пораснаа за повеќе од 150 отсто од крајот на септември во Сеул. Кај производителите на поосновни чипови, јапонската „Киоксија“ (Kioxia Holdings Corp.) и тајванската „Нанја“ (Nanya Technology Corp.) пораснаа за околу 280 отсто во истиот период, додека „Сандиск“ (Sandisk Corp.) забележа раст од повеќе од 400 отсто во Њујорк.

„Историски, меморискиот циклус обично траеше од три до четири години“, изјави Џијан Шји Кортеси, менаџерка на фондови во „ГАМ инвестмент“ (GAM Investment Management) во Цирих, додавајќи дека подолго време држи акции од производители на мемориски чипови. „Тековниот циклус веќе ги надмина претходните и по траењето и по интензитетот, а не гледаме дека замавот на побарувачката слабее.“

Помалите азиски акции на производители на мемориски чипови растат поради недостигот од меморија

Bloomberg

Водечки технолошки приказни

„Алфабет“ (Alphabet Inc.) се задолжува насекаде за да го финансира планот за трошење во областа на вештачката интелигенција, а инвеститорите очигледно не можат да се заситат.

Криминалци во Југоисточна Азија користат евтини алатки за вештачка интелигенција за со голема брзина да целат на поширок круг потенцијални жртви, одржувајќи ги центрите за измами активни и покрај обидите на владите да ги сузбијат, велат високи претставници на Интерпол (Interpol).

Дигиталниот регулатор на Австралија соопшти дека ја тестира усогласеноста на „Роблокс“ (Roblox Corp.) со сопствените обврски за заштита на децата, во време кога расте загриженоста околу можни случаи на злоупотреба, заведување и сексуална експлоатација на платформата.