Пазарот чека сигнал: Што ќе биде клучно за идните движења на биткоинот

Од избувнувањето на конфликтот на Блискиот Исток, највредната криптовалута, биткоинот, прво нагло падна додека инвеститорите ја третираа како ризична актива, за потоа брзо да закрепне и во следните денови да осцилира, без јасно и доследно однесување на сигурно засолниште на пазарот. Сепак, со досегашниот резултат таа го надмина златото, со кое често се поврзува, носејќи го епитетот „дигитално злато“ во криптозаедницата. Како аналитичарите во такви околности ги гледаат позицијата на биткоинот и неговите изгледи?

Да потсетиме, вторникот донесе скок на биткоинот на највисока цена во последните четири недели, бидејќи се засилија надежите дека САД може да постигнат договор со Иран и со тоа да го завршат конфликтот. Американскиот претседател Доналд Трамп соопшти дека Иран се обратил до неговата администрација за потенцијални мировни преговори, и покрај тоа што САД започнаа поморска блокада на Ормускиот Теснец. Водечката криптовалута во утринските часови се приближи до 75.000 долари, а подоцна во текот на денот се тргуваше околу 74.400 долари. Помалите криптовалути во најголем дел го следеа движењето на биткоинот.

Аналитичарот во ИГ (IG Markets), Тони Сајкамор, во белешка напиша дека биткоинот „се однесува повеќе како класична ризична актива отколку како традиционално безбедно засолниште“, а дека подобрувањето на општото расположение кон ризикот овој месец им дало „ветар во грб на неговите неодамнешни добивки“.

Индексот на страв и алчност на аналитичката платформа „Коинмаркеткап“ (CoinMarketCap), кој го следи расположението на криптопазарот, во вторникот беше во неутрална зона, додека пазарната капитализација на криптосекторот растеше, држејќи се над 2,5 билиони долари.

Ден претходно беше забележан вкупен нето-одлив од околу 300 милиони долари од биткоин ЕТФ-ови (exchange-traded funds – фондови со кои се тргува на берза), со што продолжи нестабилниот тек на овие финансиски инструменти. Трговците внимателно ги следат овие параметри, бидејќи ЕТФ-овите остануваат главен канал за институционална побарувачка за биткоин, па континуираните приливи по правило ја обезбедуваат долната граница на цената и ја намалуваат волатилноста. Исто така, наглите пресврти во приливите може да предизвикаат значителен притисок на продажба, бидејќи ЕТФ-овите исто така нудат лесен излез за големите институционални сопственици.

Вкупни нето-приливи во биткоин ЕТФ (портокалови столбови) и цена на биткоинот (сива линија) Извор: Coinmarketcap.com

Што се очекува во наредниот период

Изгледите за биткоинот покажуваат значително подобрување, особено на пазарот на опции, во контекст на релативно стабилен геополитички пејзаж, наведува „Декрипт“ (Decrypt). Како што за нив изјави раководителот на истражување во криптоберзата Битру (Bitrue), Андри Фаузан Адзима, поместувањето на биткоинот кон 75.000 долари било примарно водено од спот купување, што сугерира дека приливите во ЕТФ-ови, заедно со падот на отворените позиции во фјучерси и стапките на финансирање, укажуваат на „намалување на финансискиот левериџ и поздрав замав“.

Ако водечката криптовалута успее да се задржи над 75.000 долари, „тоа би можело да отвори пат кон 80.000 долари“, особено ако „приливите во  ЕТФ-ови и институционалната побарувачка останат стабилни“, изјави Венy Caи, основачка на компанијата АФ (Anchored Finance).

Од друга страна, пазарниот аналитичар Јулијан Пинеда нагласува дека цената на биткоинот и понатаму се движи во утврден распон. „И покрај закрепнувањето, оптимизмот на пазарот сè уште не е доволно силен за да се пробие страничниот тренд, па тргувањето продолжува во границите меѓу 64.000 и 75.000 долари.“

Како што додава тој, индексот на релативна сила останува над нивото 50, што укажува дека бикoвскиот замав сè уште е релевантен во последните 14 сесии. Како потенцијално клучни ценовни нивоа ги издвојува:

• 75.000 долари – Клучен отпор: Горна граница на тековниот распон. Пробив над ова ниво може да активира посилна нагорна тенденција и тест на долгорочниот надолен тренд.

• 70.000 долари – Краткорочна бариера: Неутрално ниво што се совпаѓа со 50-дневниот подвижен просек. Тргувањето околу оваа вредност дополнително потврдува странично краткорочно движење.

• 64.000 долари – Клучна поддршка: Неодамнешен минимум и главна надолна бариера. Одржлив пробив под ова ниво може повторно да активира доминантен мечкин тренд.

Сајкамор има малку поинаков став. Според него, сегашното закрепнување од февруарскиот минимум од околу 60.000 долари потсетува на корективните обрасци видени кон крајот на минатата година. „Се очекува горната линија на растечкиот тренд, која се наоѓа близу 79.000 долари, да обезбеди краткорочен отпор и да го запре понатамошниот раст пред нов тест, а потенцијално и пробив на клучната поддршка од околу 60.000 долари од почетокот на февруари.“

За него, оптимистичко сценарио подразбира дневно затворање над границата на растечкиот коридор на 79.000 долари, со подоцнежен одлучувачки пробив над 200-дневниот подвижен просек, кој моментално е околу 87.500 долари. Песимистичко сценарио би значело дека, доколку цената не го пробие отпорот, реален е пад назад кон поддршката околу 60.000 долари. „Ако продажниот притисок се засили, постои ризик тоа ниво да биде пробиено надолу“, вели Сајкамор.

Bloomberg

Во меѓувреме, американската Комисија за хартии од вредност (СЕЦ) закажа тркалезна маса за 16 април за да се разговара за регулаторната рамка за дигитални средства, Законот за јасност (Clarity Act), со цел да се реши долготрајната нејаснотија во надзорот над овој сектор. Се разбира, поволни правила би можеле да поттикнат нов бран институционални инвестиции, додека рестриктивни регулаторни исходи би можеле да го нарушат расположението на инвеститорите, кое беше охрабрено од ангажманот на Трамп и неговите отворено прокрипто ставови.

Во таа насока, Лох истакнува дека биткоинот можеби нема да забележи значаен скок додека САД не го усвојат Законот за јасност.

Покрај регулаторните настани, на вредноста на биткоинот влијаат и пошироки пазарни и макроекономски фактори, па, така, во изминатите години често се гледа јасна корелација меѓу криптопазарот и акциите на технолошките компании во периоди на значителен пад или раст на апетитот за ризик, како и реакции на одлуките на централните банки. 
Покачените цени на нафтата и инфлаторните ризици сега се закануваат да го одложат намалувањето на каматните стапки на американските Федерални резерви - централната банка чии одлуки најсилно одекнуваат на криптопазарот. Во средина во која каматните стапки остануваат високи подолг период, биткоинот може да се однесува како типична ризична актива и да се најде под продажен притисок.

За четири месеци цената се преполови

Од октомврискиот рекорд - кога биткоинот надмина 126.000 долари - до денес, цената на биткоинот падна за околу 40 отсто. Притоа, треба да се потсети дека многу брзо по тој рекорд дојде до историски ликвидации на криптопазарот, што веќе значително ја намали цената, а потоа ноември донесе уште една корекција водена од бран на продажба на спот-пазарот. Декември и јануари поминаа релативно стабилно, со тргување главно меѓу 85.000 и 95.000 долари.

 

 

Нов ценовен удар дојде на преминот од јануари во февруари, како дел од поширок стрес и криза на доверба на пазарите, што го спушти биткоинот уште пониско. Оттогаш, ценовниот опсег во кој се движи биткоинот е приближно од 65.000 до 75.000 долари. Имајќи ја предвид волатилната природа на криптосредствата, ваквите осцилации многу криптоентузијасти не би ги сметале за драматични, но треба да се нагласи дека дневните движења во последните недели беа особено динамични.

Непосредно по нападите врз Иран на 28 февруари, од пазарот на дигитални средства беа избришани речиси 130 милијарди долари, а биткоинот падна на околу 63.000 долари. Од тогаш до 14 април, изворната криптовалута поскапе за 11 отсто, додека златото (кое се смета за заштита во времиња на неизвесност) во истиот период падна за речиси 10 отсто.

Аналитичарите тогаш укажуваа на релативната сила на криптото во споредба со други класи на имот, но и на фактот дека биткоинот речиси цел февруари веќе се наоѓаше во зона на консолидација, па по почетокот на конфликтот почна да се приближува кон пробив од таа зона. Бидејќи вестите од Блискиот Исток укажуваа на потенцијално сложен и долготраен конфликт, кој би можел да ескалира, реакцијата на пазарот не беше целосно во согласност со очекувањата.

 

 

Набљудувачите на пазарот со години укажуваат на своевидна „криза на идентитет“ на биткоинот, која веројатно ќе се реши дури со поголема регулаторна јасност и усвојување. Иако титулата дигитално злато му е на дофат поради импресивниот раст во однос на благородните метали и други класи на имот, тоа останува врзано со судбината на глобалниот апетит за ризик. На крајот, прашањето не е само дали цената ќе надмине одредена граница туку и дали биткоинот во очите на (пред сè институционалните) инвеститори конечно ќе се трансформира од шпекулативен инструмент во вистинско сигурно засолниште, градејќи сопствен образец на однесување што би бил помалку подложен на нагли реакции на дневни геополитички потреси и движења на традиционалните берзи.

Одрекување од одговорност: Сите информации се од општ карактер и не претставуваат инвестициски совети.