'1 BTC = 1 BTC' - нов наратив кога цената на токенот станува болно ниска

Виртуелни пари, дигитално злато, хеџинг за инфлација, неповрзани средства, складиште на вредност: ова се фразите што љубителите на биткоин некогаш ги користеа за да ги опишат доблестите на криптовалутата. Нивниот нов наратив? Едноставно, биткоинот е биткоин.

Тоа е фраза што се користи на „Твитер“ (Twitter) во последните денови, каде што корисниците, во услови на длабок пад на цената, објавуваат дека „1 BTC = 1 BTC“. Идејата е дека навистина не е важно која е цената на токенот. Понудата на оваа криптовалута е фиксна и тоа, теоретски, треба да ги стимулира цените на долг рок.

„1 BTC = 1 BTC е нешто што максималистите во однос на развојот на биткоинот иронично го велат кога цената на биткоинот изразена во долари станува болно ниска“, вели Џошуа Лим, поранешен шеф на секторот за деривати во Genesis Trading. „Постои навестување дека биткоинот на крајот ќе стане пресметковна единица, затоа фокусирајте се на апсолутниот број на биткоини што го поседувате денес“, додава тој.

Секој што посветил внимание на крипто-пазарот се запознал со многуте титули што биткоинот ги имал низ годините. Фановите користеа голем број наративи за токенот пред 2022 година, вклучително и дека може да го замени златото во одреден момент или дека е одлична заштита од инфлација. Повеќето од тие фрази годинава паднаа во вода бидејќи цените ослабнаа поради заострувањето на монетарната политика. Биткоинот изгуби приближно 60 отсто од својата вредност годинава и се тргуваше под 19.000 долари во последните денови, што е значителен пад од неговото највисокото ниво од речиси 69.000 долари на крајот од 2021 година. Дури денеска токенот „скокна“ преку нивото од 20.000 долари.

Кога се појави пандемијата, крипто-инвеститорите се приклучија на идејата дека биткоинот, благодарение на неговата ограничена понуда, може да дејствува како заштита од растечките цени. Но, притисоците од потрошувачките цени станаа лепливи годинава, при што цените на повеќето криптовалути паднаа. Многу набљудувачи на пазарот велат дека инвеститорите сега бараат нов наратив за пазарот на дигитални средства. Twitter е преплавен со објави во кои се изјавува дека единственото нешто што е важно е дека еден биткоин е еднаков на еден биткоин.

Илан Солот од Tagus Capital вели дека наративот за биткоинот како хеџинг за инфлација, за кој поборниците зборуваат, е погрешно сфатен. „Наративот никогаш не бил дека биткоинот е уред за следење на инфлацијата“, рече тој. „Биткоинот важеше за заштита против неодговорното печатење пари од централните банки“, објаснува Солот.

Сепак, тоа не значи дека упорните крипто-инвеститори се одвратени од инвестирање. Процентот на биткоини кои не биле поместени повеќе од една година остана стабилен на 68 отсто. Метриката моментно е на највисоко ниво од 2014 година, според податоците собрани од FRNT Financial.

Биткоинот сè уште е во канџите на макрото опкружувањето и не ја прекина својата корелација со ризичните средства, посочува Стефан Оулет, извршен директор на FRNT.

„Наративот обично ги следи пазарите, а не обратно“, изјави тој. „На крајот на краиштата, има сè поголем процент на сопственици на биткоини кои никогаш нема да ги продадат своите токени и оние кои ги користат за комерцијални цели. Во одреден момент, биткоинот ќе почне да се однесува поинаку од другите ризични средства, но очигледно сè уште не го достигнал тоа ниво“, смета Оулет.

Сепак, јасно е дека другите наративи за биткоинот не се поткрепени со резултати, вели Питер Малук, претседател на Creative Planning. „Сега знаеме дека криптовалутите не се заштита од инфлација, тоа ни е докажано. Тоа е голема, голема шпекулативна игра за секој што е заинтересиран за таков вид возбуда“, додава тој.

Во моментов нема коментари за веста. Биди прв да коментира...

Остави коментар