Растот на биткоинот што беше актуелен изминатите два месеца слабее, што е потенцијално предупредување за инвеститорите доколку се водиме според непишаното правило дека историјата се повторува.
Февруарскиот скок на највредниот дигитален токен ослабе на околу два отсто и бледнее во споредба со јануарскиот пораст од 39 отсто, според податоците собрани од „Блумберг“.
Имаше пет слични случаи од периодот на најниска вредност во текот на пандемијата во 2020 година, кога биткоинот растеше два месеца по ред, но со помали добивки во втората половина од таа временска рамка. Притоа, во третиот месец се повлекуваше во четири од пет вакви случаи, забележувајќи просечна загуба од 5,8 отсто. Единствен исклучок беше периодот до февруари 2021 година, кога токенот беше среде силен таканаречен биковски инвеститорски момент.
Во минатото биткоинот обично паѓаше по двомесечен раст
Bloomberg
Биткоинот ја заврши неделата со загуби (по третпат во четири недели), при што му наштети можноста за повисоки каматни стапки на подолг период за намалување на инфлацијата. Регулаторниот притисок во САД по колапсот на криптоберзата FTX исто така го притиска секторот.
„Не е изненадувачки што пазарот забележа одредена корекција минатата недела“, напиша Ноел Ачесон, авторка на билтенот „Крипто е сега макро“, која делумно се повика на силата на доларот во услови на повисоки трошоци за задолжување.
Биткоинот падна за околу 0,6 отсто во понеделникот, во 7.43 часот во Лондон, тргувајќи се за околу 23.430 долари. Второрангираниот етер падна за 0,4 отсто, на 1.636 долари.
SOL, оригиналната монета на блокчејнот на „Солана“, имаше полош ефект, паѓајќи дури за 2,5 проценти. „Солана“ претрпе повеќечасовно забавување во текот на викендот - што е најнов во низата прекини, технички тешкотии и проблеми со процесирањето што ја измачуваа мрежата од нејзиното деби во 2020 година.
.webp){kind=icon}
