Тужба и против родителите на Сем Банкмен-Фрид, се богателе на сметка на клиентите

Менаџерите на банкротираната криптоберза FTX ги тужат родителите на коосновачот и поранешен главен извршен директор Сем Банкмен-Фрид за да „повратат милиони долари присвоени средства, пренесени со измама“.

Алан Џозеф Банкмен и Барбара Фрид, наводно, ги искористиле својот пристап и влијание во FTX за да „се збогатат, директно и индиректно, за милиони долари“, на сметка на должниците и доверителите, соопшти компанијата во понеделникот во судски поднесок.

Империјата FTX на Банкмен-Фрид се распадна минатиот ноември во, како што велат обвинителите, една од најголемите финансиски измами во историјата на САД. FTX им должеше на клиентите приближно 8,7 милијарди долари кога поднесе барање за стечај, а досега се обезбедени околу 7 милијарди долари ликвидни средства.

Како формален вработен во ентитет на FTX, Банкмен требало да биде добро подготвен, со оглед на неговата правна експертиза, за да ги идентификува погрешните постапки во компанијата многу пред нивното брзо разоткривање, се наведува во поднесокот. А во неколку случаи се чини дека избрал да ги игнорира јасните црвени знамиња.

Банкмен и Фрид се познати правни експерти и предаваат на Правниот факултет во Стенфорд. Банкмен е експерт за даноци, додека специјалност на Фрид е етиката.

„Ова е опасен обид да се заплашат Џо и Барбара и да се поткопа процесот на поротата само неколку дена пред да започне судењето на нивното дете“, посочуваат во соопштение адвокатите што ги застапуваат Банкмен и Фрид. „Овие тврдења се целосно лажни“, додаваат тие.

И покрај тоа што „знаеле или очигледно игнорирале“ дека FTX е несолвентна или на работ на несолвентност, Банкмен и Фрид разговарале со Банкмен-Фрид за трансфер на паричен подарок од 10 милиони долари и луксузен имот од 16,4 милиони долари на Бахамите, се наведува во поднесокот. Двојката исто така „притискала за десетици милиони долари во политички и добротворни придонеси“.

Според поднесокот, Банкмен бил многу свесен за ризикот од пад на компанијата. Тој започнал разговори за тоа како да се осигури дека средствата се безбедни од банкрот една година пред FTX да падне кон Поглавје 11.

Иако Банкмен-Фрид тврди дека неговите родители „не биле вклучени во ниту еден од релевантните делови“ на бизнисот, групацијата FTX низ годините се опишувала како „семеен бизнис“, според поднесокот. А во месеците што доведоа до несолвентност на компанијата, се чини дека улогата на Банкмен била позастапена.  

Поднесокот вклучува детали за трошењата, особено од Банкмен, кој бил вработен во „ФТХ филантропи“ (FTX Philanthropy) почнувајќи од 2021 година, според судските документи. Во еден пример, тој му дал на еден поранешен студент по право „бесплатно патување во Франција“, кое вклучувало билети за Големата награда на Формула 1, кои чинат неколку илјади долари.

Иако Фрид не била формално вработена во криптоберзата, таа исто така имала влијание врз финансиите на компанијата. Тужбата ја опишува како „највлијателна советничка“ за политичките придонеси на нејзиниот син и FTX. Показател за тоа е што таа го натерала Банкмен-Фрид да издвои милиони за акциска група што таа ја коосновала, покажуваат судските документи.