Адвокатите на Банкмен-Фрид не го разнишаа сведочењето на неговата поранешна девојка

Керолин Елисон мина низ повеќечасовно вкрстено испрашување од страна на адвокатите на Сем Банкмен-Фрид и нејзината приказна во голема мера остана неизменета додека одбраната се обидуваше да ѝ го разниша сведочењето дека коосновачот на FTX ја смислил измамата тешка повеќе милијарди долари.

Елисон, главниот сведок на владата против нејзиниот поранешен шеф и момче, изгледаше опуштено и покрај вкрстеното испрашување за време на нејзиниот трет ден од судењето за измама на Банкмен-Фрид во федералниот суд на Менхетн. Обвинителите тврдат дека коосновачот на FTX организирал шема за пренос на средства на клиентите од криптоберзата до „Аламеда рисрч“ (Alameda Research), нејзиниот поврзан хеџ-фонд, каде што Елисон беше извршна директорка.

Практично откако FTX и „Аламеда“ поднесоа барање за стечај во ноември 2022 година, Банкмен-Фрид сугерираше дека Елисон е виновна, што ги зголеми очекувањата за вкрстеното испрашување во четвртокот. Во пресрет на нејзиното сведочење, Бенкмен-Фрид допушти нејзини приватни пораки да излезат во медиумите во очигледен обид да ја дискредитира, со што ја укина својата кауција за потенцијално влијание врз сведоците во судењето.

Но, во текот на три часа, адвокатот на одбраната Марк Коен успеа да постигне само неколку суптилни поени. Тој ја натера Елисон да признае дека Банкмен-Фрид не ги надгледувал секојдневните операции и дека таа самата не била добра менаџерка. Но, Коен не исфрли никакви „бомби“ што ќе предизвикаат голем сомнеж во случајот што обвинителите го изградија против Банкмен-Фрид.

Керолин Елисон Bloomberg

„Има некои засеци во кората“, рече Мајкл Вајнштајн, адвокат на одбраната што не е вклучен во случајот. „Но, одбраната сè уште го сече големиот даб“, додаде тој.

Одговорност

Еден од главните аргументи на Банкмен-Фрид беше дека, како што тврди, Елисон е одговорна за сумата на пари што „Аламеда“ ја позајмила од FTX и дека не успеала да го заштити ризикот што го создала. Елисон потврди дека имало моменти кога Банкмен-Фрид не бил вклучен во секојдневните операции на „Аламеда“. Банкмен-Фрид ја основа „Аламеда“ и имаше 90 отсто удел во фондот.

„Имаше периоди кога не обрнуваше внимание на 'Аламеда'“ или не комуницираше со раководителите на фирмата, изјави Елисон пред судот. Таа имала секојдневна одговорност за стратегиите за тргување на „Аламеда“, но „Сем ја даваше конечната насока за тоа што мисли дека треба да направиме“.

Елисон (28) се изјасни за виновна и се согласи да соработува со владата во случајот против Банкмен-Фрид. Од вторникот оваа недела, таа даде детален опис за тоа како Банкмен-Фрид управувал со одредени активности за да го прикрие позајмувањето средства на клиентите од страна на „Аламеда“, главно за ризични неликвидни инвестиции. Напорите да се скрие долгот се зголемиле бидејќи криптопазарите паднаа во 2022 година. Таа рече дека во еден момент тој ја замолил да создаде нови финансиски табели што ќе скријат дупка од повеќе милијарди долари во билансот на состојбата на „Аламеда“.

Раскинување

Одбраната успешно постави одредена дистанца меѓу операциите на „Аламеда“ и Банкмен-Фирд кога ја испрашуваше Елисон за депозитите на клиентите на FTX што сè уште биле директно поврзани со сметките на „Аламеда“ откако берзата отвори своја банкарска сметка. Елисон рече дека им кажала на обвинителите дека „изгледа дека тој можеби не знаел“ за тие трансфери.

Коен сугерираше дека романтичната врска на Елисон со Банкмен-Фрид можеби значела дека таа не разговарала толку често за условите во „Аламеда“ со него. Таа призна дека нивниот контакт бил погоден од нивното раскинување во пролетта 2022 година.

„Ми беше тешко да разговарам лично, очи в очи“, рече Елисон, „па се обидов да го избегнам тоа и да избегнам социјални настани со него“.

Сем Банкмен-Фрид Bloomberg

„Амбиција“

Но, таа додаде дека двајцата продолжиле да комуницираат еден со друг преку апликацијата за пораки Сигнал (Signal), вклучувајќи и за „Аламеда“.

Адвокатот на одбраната се обиде да направи разлика меѓу нејзината личност и личноста на Банкмен-Фрид, сугерирајќи дека таа не се справувала со притисокот толку добро како тој, што можеби влијаело на нејзиното управување со „Аламеда“.

Елисон се согласи дека Банкмен-Фрид бил повеќе „проактивен“ и „амбициозен“, додека таа честопати била многу под стрес и неефикасна како менаџерка. Но таа исто така рече дека чувствува дека некои од ставовите и гледања на Банкмен-Фрид се пренеле врз неа.

„Не мислев за себе како амбициозна личност пред да почнам да работам во 'Аламеда', но мислам дека станав поамбициозна“, додаде таа.

Грешка

Како што се приближуваше крајот на вкрстеното испрашување, Коен се фокусираше на состанокот со персоналот на „Аламеда“ во ноември 2022 година, на кој таа јасно им ставила до знаење за финансиската состојба на фирмата и им кажала дека најверојатно ќе биде затворена.

„Дали им признавте на вработените дека сте погрешиле?“, праша Коен.

„Да, им признав“, рече Елисон.

Откако Коен заврши со сослушувањето, обвинителите ја прашаа за таа средба. Елисон рече дека иако вработените во „Аламеда“ изгледале вознемирено од неправдата, тие биле и благодарни што таа била отворена и искрена кон нив.

Обвинителите го изградија својот случај преку сослушување на најтесниот круг на Банкмен-Фрид и склучување договори за соработка со некои од неговите најдоверливи луѓе. Коосновачот на FTX, Сем Елисон, и поранешниот директор на одделот за технологија Гери Ванг минатата недела сведочеа дека Банкмен-Фрид побарал од него да го промени кодот на берзата за да ѝ се дозволи на „Аламеда“ да позајмува суштински неограничени износи од сметките на FTX. Нишад Синг, поранешен шеф за инженерството во FTX, исто така би можел да учествува во судењето за измама. Ванг и Синг исто така се изјаснија за виновни за измама.