Мајкл Сејлор купи биткоини за дури 600 милиони долари

Претседателот и соосновач на „Микростратеџи“ (MicroStrategy Inc.), Мајкл Сејлор, го постави можеби најголемиот облог досега со производителот на софтвер за претпријатија, кој купи биткоин во вредност од 593,3 милиони долари.

Фирмата со седиште во Вирџинија во четвртокот објави дека купила 16.130 биткоини во ноември, зголемувајќи го сопствеништвото на околу 6,5 милијарди долари. Тоа беше највредна трансакција на компанијата откако во февруари 2021 година купи 19.452 биткоини за нешто повеќе од една милијарда долари.

Сејлор почна да купува биткоини во 2020 година, но годинава го засили тоа бидејќи криптовалутата закрепнува по падот што беше регистриран во последната година, а беше предизвикан од зголемените стапки и некои високопрофилни криптоимплозии и банкротства. Сејлор се повлече од функцијата извршен директор пред една година, велејќи дека ќе се фокусира на аспектот - биткоин во стратегијата на компанијата.

Акциите на „Микростратеџи“ годинава пораснаа за 250 проценти, надминувајќи го растот на биткоинот, кој порасна за повеќе од 125 проценти во услови на оптимизам дека САД наскоро може да одобрат лансирање фонд со кој ќе се тргува на берзата ЕТФ (од англиски: exchange-traded fund - ETF) и кој ќе инвестира директно во таа криптовалута.

„Ако и кога ќе добиеме биткоин ЕТФ, тоа ќе го зголеми интересот за таа класа на средства“, рече Метју Џ. Мејли, главен пазарен стратег во „Милер табак“ (Miller Tabak + Co.) „Тука не треба да има многу канибализација“.

„Микростратеџи“ исто така склучи договор со „Коуен енд компани“ (Cowen and Company), „Канакорд џенуити“ (Canaccord Genuity) и БТИГ (BTIG) за понуда на обични акции до 750 милиони долари.

Bloomberg

Компанијата првично ги објави плановите да ја подигне сумата преку продажба на акции во август, велејќи дека приходите ќе бидат искористени за цели како што се купување биткоини, обртни средства и откуп на долгот.

 

Во моментов нема коментари за веста. Биди прв да коментира...

Остави коментар