.webp){kind=icon}
Соосновачот на ФТХ, Сем Банкмен-Фрид, треба да одлежи не повеќе од шест и пол години затвор за организирање на измамата што ја уништи неговата криптоберза, му рекоа неговите адвокати на федералниот судија, кој може да изрече казна од 20 години за најтешките обвиненија.
Адвокатите на 31-годишниот поранешен криптомагнат му ја дадоа својата препорака на американскиот окружен судија Луис А. Каплан во меморандум од 98 страници доцна во вторникот, пред неговата пресуда на 28 март. Во досието се вклучени писма од поддржувачите на Банкмен-Фрид, меѓу кои се и неговите родители и поборниците за јавно здравје од Африка, кои сведочат за неговата добротворна работа.
Според федералните упатства за казнување што ги земаат предвид „добротворната работа на Сем и покажаната посветеност на другите, казна што брзо ќе го врати Сем на продуктивна улога во општеството би била доволна, но не треба да биде поголема отколку што е потребно, за да се исполни целта на изрекувањето на казната“, се наведува во меморандумот.
Цитирајќи ги советодавните упатства, адвокатите на Банкмен-Фрид рекоа дека „праведна казна“ ќе биде затворска казна од 63 до 78 месеци.
Банкрот на ФТХ
Неговите адвокати исто така препорачаа да не му се наложува да плати реституција или да изгуби каков било имот, велејќи дека ниту една од сметките идентификувани за можно одземање не била за лична корист на Банкмен-Фрид. Тие тврдеа дека клиентите и доверителите ќе си ги вратат парите преку банкротот на ФТХ.
Банкмен-Фрид беше осуден во ноември за обвиненијата, меѓу другото и за измама и заговор, по двомесечно судење. Конечната одлука за казнување на Каплан може да биде патоказ за другите директори на криптосекторот што управуваат лошо со средствата.
Обвинителите имаат рок до 15 март да го достават својот одговор на писмото.
„Американските власти препорачаа стогодишна казна“, наведуваат адвокатите на Банкмен-Фрид во допис, нарекувајќи го предлогот „гротескен“ и „варварски“ и тврдејќи дека се заснова на погрешната претпоставка дека неговите злосторства вклучуваат загуба од 10 милијарди долари.
Банкмен-Фрид минатиот месец го ангажира Марк Мукаси, поранешен федерален обвинител и искусен адвокат, и така ги замени адвокатите што го застапуваа на судењето.
Bloomberg
Експерт за аутизам
Во поднесокот во вторникот беа вклучени писма од психијатри, меѓу кои и од специјалист за аутизам. Иако Банкмен-Фрид претходно не покажувал знаци на аутизам, неговото нарушување на вниманието (англ. Attention Deficit Hyperactivity Disorder - ADHD) стана проблем на судењето. Неговите адвокати постојано се жалеа на борбата на Банкмен-Фрид да добие лекови додека е во притвор.
Неговиот татко Џозеф Банкмен алудирал на проблеми со менталното здравје во писмо до судијата.
„Сем се бореше во текот на својот живот да научи да контролира работи што повеќето од нас ги земаат здраво за готово, како што се контакт со очи, разговор и реагирање на сигналите од социјалната заедница“, напиша Банкмен.
Таткото на соосновачот на ФТХ го повика Каплан да не изрекува „драконска казна“ што веројатно би резултирала со сместување во затвор со висока или средна безбедност.
„Таквата поставеност би го ставила Сем во средина во која неговите одговори на социјалните импулси понекогаш ќе се сметаат за чудни, несоодветни и непочитувани; кога ќе се случи тоа, тој ќе биде во голема физичка опасност“, напиша Банкмен. „Ништо што направил не може да ја оправда неговата изложеност на тој ризик“.
Казната на Банкмен-Фрид веројатно нема да одговара на некои од најтешките казни дадени на криминалци, како што е Шолам Вајс, кој доби 845 години затвор во 2000 година за рекетирање и измама поврзани со колапсот на „Нешнал херитиџ лајф“ (National Heritage Life). Казната подоцна беше ублажена од претседателот Доналд Трамп. Берни Медоф умре во затвор додека отслужуваше 150-годишна затворска казна за шема на Понзи вредна 20 милијарди долари.
Но Банкмен-Фрид најверојатно ќе се соочи со најмалку една деценија зад решетки, велат експертите. Каплан - кој беше назначен од тогашниот претседател Бил Клинтон во 1994 година - ќе ја одреди конечната казна користејќи ги федералните упатства за казнување, кои ги земаат предвид сериозноста на злосторствата, криминалната историја на обвинетиот и висината на отштетата.
Каплан во минатото се залагаше за претпазливост кога станува збор за упатствата, велејќи за време на изрекувањето на казната во мај 2022 година на човек што се изјасни за виновен за криптошема слична на Понзи дека загубата често игра „несразмерна улога“ во изрекувањето на казната.
Нестабилна врска
Но нестабилната врска на Банкмен-Фрид со Каплан нема нужно да му помогне на поранешниот криптомагнат. Тој го тестираше судијата повеќе од една година - од инсистирањето идентитетот на неговите обврзници со кауција да остане тајна до откривањето на белешките од дневникот на неговата поранешна девојка (клучен владин сведок) за печатот. Постапката го натера Каплан да ја отповика кауцијата на Банкмен-Фрид неколку недели пред почетокот на судењето. Банкмен-Фрид е во федерален затвор во Бруклин од август.
Самото судење претставуваше уште еден неуспех за Банкмен-Фрид по невообичаена постапка. Судијата го ограничи она што тимот на Банкмен-Фрид можеше да им го каже на поротниците за советите што ги доби од адвокатите, но не пред да одвои три часа за преглед на сведочењето на поранешниот извршен директор на ФТХ без присуство на поротата.
