Германската влада ги продаде сите биткоини, се одлучи за побезбеден метод

Германската влада неодамна ја заврши продажбата на сите преостанати залихи на биткоин, што доведе до видливо влијание на пазарот на криптовалути. Според „Аркам интелеџенс“ (Arkham Intelligence), германската влада викендов го продаде последниот од своите биткоини, во кој беа вклучени 3.846 биткоини испратени на адресите „Флоу трејдрс“ (Flow Traders) и „139Po“. „Аркам“ ја опиша оваа трансакција како институционален депозит или услуга преку шалтер (over the counter-OTC). Услугата преку шалтер овозможува големи трансакции надвор од традиционалните берзи, со што се намалува влијанието врз пазарната цена.

Оваа конечна продажба уследи по неколку недели во кои германската влада интензивно ги продаваше залихите на биткоин, што имаше значително влијание на пазарот. Беа продадени вкупно 50.000 биткоини во неколку големи транскации во текот на три недели.

Продажниот притисок предизвикан од германската влада помогна да се задржи цената на биткоинот под 60.000 долари. Исто така, цената остана под 200-дневниот експоненцијален подвижен просек, што е важен технички показател што инвеститорите го користат за да ги проценат долгорочните трендови на цените.

И покрај тоа што германската влада ги продава сите свои резерви на Биткоин, притисокот за продажба што произлегува од планот за компензација за „Мт. гокс“ (Mt. Gox) вреден девет милијарди долари би можел да ја задржи цената на биткоин ниска во наредните недели. Ова може да го продолжи периодот на страв, неизвесност и сомнеж (FUD од англиски: fear, uncertainty, and doubt) кој е присутен на пазарот со недели.

„Мт. гокс“ беше една од најголемите крипто берзи која пропадна во 2014 година, кога цената на биткоинот сè уште беше во опсег од неколку стотици долари. Пропастот беше предизвикан од хакирање и губење на големи количини на биткоини, што резултираше со огромни финансиски загуби за многу корисници на берзата.