Вредноста на биткоинот е на тринеделен максимум по одлуката на Фед

Биткоинот достигна највисока вредност во последните три недели, заедно со скокот на фјучерсите на акции во САД, бидејќи големото намалување на каматните стапки од страна на Федералните резерви (Фед) ги разбранува пазарите.

Дигиталниот токен порасна дури за 3,9 проценти и се тргува на ниво од 61.900 долари. Се зголемија и договорите од индексот S&P 500 и глобалните акции, бидејќи трговците се понесени од почетокот на очекуваниот циклус на олеснување на монетарната политика.

Фед ги намали трошоците за задолжување за 50 базични поени, кое инаку е прво намалување во повеќе од четири години. Но претседателот Џером Пауел остана претпазлив при изјавите во врска со натамошното темпо, велејќи дека потезите ќе ги преземаат според економските податоци.

„Агресивниот почеток на циклусот на олабавување е одлична вест за ризичните средства, вклучувајќи го и биткоинот. На пазарот му беа потребни неколку часа за да ја согледа големата слика и да почне да се одразува подобрената перспектива“, рече Керолин Маурон, соосновачка на „Орбит маркетс“ (Orbit Markets), кој тргува со дигитални средства.

Пред состанокот на Фед мислењата на инвеститорите беа поделени за тоа дали надлежните ќе се одлучат за олеснувачки потег од четвртина или половина поен. Пауел и неговите колеги се обидуваат да ја зачуваат силата на американската економија бидејќи ризиците на пазарот на трудот и инфлацијата стануваат поурамнотежени.