Клиент на FTX вели дека бил измамен од хеџ-фонд за неговите средства

Клиент на FTX го тужи хеџ-фондот што го купил неговото побарување во банкротираната берза за криптовалути, тврдејќи дека „Олимпус пик“ (Olympus Peak) му платил помалку додека се очекува да заработи повеќе од милион долари од нивниот договор.

Николас Гирчик од Калифорнија вели дека „Олимпус пик“ му должи поголема исплата откако тој му го продал своето побарување од 1,59 милион долари на хеџ-фондот минатата година со „значителен попуст од 42 отсто“, а FTX годинава доби одобрување на планот за реорганизација на стечајот, кој се очекува да ги отплати клиентите од 129 до дури 146 отсто.

Гирчик тврди дека преговарал за експлицитно право на дополнителен износ во неговиот договор со „Олимпус пик“, но фондот одбил да го почитува тоа, според жалбата од четвртокот пред федералниот суд на Менхетн.

„Оваа тужба е целосно без основа и се заснова на погрешно читање на договорот меѓу страните“, наведе Ариел Лавинбук, адвокат на хеџ-фондот, во изјава испратена по е-пошта.

Иако се случува ретко кај случаите на банкрот, FTX собра милијарди долари повеќе отколку што требаше за да го покрие она што клиентите го загубија во колапсот на берзата во ноември 2022 година - во голема мера благодарение на биковскиот криптопазар во текот на минатата година.

Вообичаено е хеџ-фондовите да купуваат побарувања за оштетени средства со попуст - нудејќи им на барателите брза исплата, додека средствата се држат со надеж за посилно закрепнување во процесот на банкрот.

Гирчик вели дека, според неговиот купопродажен договор со „Олимпус пик“, хеџ-фондот ветил дека ќе ја купи од него, со иста стапка од 42 отсто по која го продал своето побарување, секоја вишок распределба од банкротот. „Сепак, ’Олимпус пик’ јасно даде до знаење дека нема да го исполнат својот дел од спогодбата“, напишаа неговите адвокати.