Паднати криптокралеви!

Финансиските пазари имаат загрижувачки кратка меморија. Сонувањето за иднината е многу помоќно од размислувањето за минатото.

Само погледнете што се случи на пазарот на криптовалути додека американската влада успешно го процесира коосновачот на FTX, Сем Банкмен-Фрид, за еден од најголемите финансиски криминали во историјата. Цените на криптовалутите продолжија да закрепнуваат од минатогодишниот крах, наместо да се продаваат по ниски цени (инвеститорите треба да се потсетат колку погрешија сите за време на растот на дигиталните средства воопшто, а особено на подемот на империјата Банкмен-Фрид). 

Сем Банкмен-Фрид Bloomberg

Имено, додека традиционалниот пазар на обврзници се движи кон трета година со невидени загуби, а пошироките берзански индекси држат главно невообичаени приноси по минатогодишниот мечкин пазар, криптовалутите се подготвени да станат средство со најдобри перформанси во 2023 година. Цената на биткоинот се зголеми повеќе од двојно годинава и некои помали криптовалути, како солана, постигнаа уште подобри резултати. Финансиските текови се враќаат кај инвеститорите што минатата година додадоа 807 милиони долари во производи со кои се тргува на криптоберзите, зголемувајќи ги нивните средства на речиси 10 милијарди долари, според податоците собрани од „Блумберг“. Постојат знаци дека левериџот на пазарот се зголемува, со тоа што побарувачката за заеми во криптовалути ги крева каматните стапки над 10 проценти за некои стабилни токени дизајнирани да ја следат вредноста на американскиот долар.

Сепак, пресудата за Банкмен-Фрид во никој случај не ги поништува судските записи за секторот за криптовалути. Истите американски обвинители го обвинија коосновачот на „Тераформ лабс“ (Terraform Labs), До Квон, за оркестрирање на наводна измама што минатата година збриша најмалку 60 милијарди долари пазарна вредност од криптовалутите тераУСД и луна, што, меѓу другото, ја предизвика кризата во FTX. Алекс Машински, поранешниот извршен директор на „Целзиус“ (Celsius Network LLC), беше уапсен во јули и обвинет за, како што велат обвинителите, шема за измама на клиентите пред криптозаемодавецот да пропадне со долг од над милијарда долари. Тој се изјасни за невин по обвиненијата. Су Жу, коосновачот на банкротираниот хеџ-фонд „Три ероус“ (Three Arrows Capital), беше затворен во Сингапур во септември, бидејќи ликвидаторите извршија максимален притисок по неколкумесечни расправии околу пронаоѓање на имотот на пропаднатата компанија. Во меѓувреме, „Гемини“ (Gemini Trust Co.) и „Џенезис“ (Genesis Global Holdco) од „Диџитал каренси“ (Digital Currency Group) во сопственост на близнаците Винклвос беа заглавени во меѓусебни тужби, како и постапки поведени од правни институции поради нивното партнерство за задолжување и заем.

Чангпенг Жао, познат како CZ, е последниот во долгата низа криптоосновачи што се соочуваат со потенцијално значајни правни последици. Основачот на „Бајненс холдингс“ (Binance Holdings), најголемата криптоберза во светот, поднесе оставка како извршен директор како дел од договорот со американските обвинители за признавање вина, кој вклучува можност за затворска казна. „Бајненс“ како субјект се изјасни за виновен и се согласи да плати казна во вкупна вредност од 4,3 милијарди долари.

Чангпенг Жао Bloomberg

Сега се поставува прашањето колку светла треба да биде иднината на овој пазар за да може да ги засени сите овие негативни аспекти. Па, самиот факт дека сите овие криминални случаи, стечаи и регулаторни дејства се случуваат одеднаш наведе многумина во секторот да се надеваат дека крајот на овие случаи ќе го означи крајот на ерата на дивиот криптозапад и влезот во позрела, помалку хаотична фаза.

Очекувањата за посакуваната транзиција никаде не се поочигледни отколку во индустријата на фондови со кои се тргува преку берза (ETF). Инвестицискиот гигант „Блекрок“ (BlackRock Inc.) годинава влезе во тесна трка за спот биткоин ЕТФ. Се верува дека одобрувањето за лансирање еден или повеќе биткоин ЕТФ е неизбежно откако судот во август го поништи отфрлањето на Комисијата за хартии од вредност на предлогот на „Грејскејл“ (Grayscale Investments LLC) да го претвори својот фонд во ЕТФ. Голем дел од подемот на биткоинот годинава ѝ се припишува на надежта дека ЕТФ ќе отворат нов извор на побарувачка од тој тип кај инвеститорите (и нивните финансиски советници) што претходно не сакаа да се вклучат во инвестициските платформи изворно насочени кон криптовалути. Иако има многу скептици, фактот дека криптовалутите се средство со најдобри перформанси за годинава шири страв за пропуштени можности (англ. Fear of Missing Out - FOMO).

Bloomberg

Само времето ќе покаже дали оваа трансформација во позрела, нормализирана пост-FTX фаза за криптовалутите е пуста желба или не. Постојат индикации дека тоа нема да се случи без премрежиња. Планот на „Пејпал“ (PayPal Holdings Inc.) за развој на стабилни токени брзо наиде на судски повик упатен од страна на Американската комисија за хартии од вредност. „Коинбејс“ (Coinbase Global Inc.) е заглавен во речиси егзистенцијална битка со Комисијата, која ја тужеше најголемата американска берза во јуни за наводно непријавување како брокер, берза или клириншка фирма.

Сите надежи дека американските законодавци ќе донесат закони што ќе ја обезбедат потребната правна јасност на криптоиндустријата се мали, со оглед на нефункционалноста на Конгресот. Дури и да се случи тоа, не постои долг список на примери со кои владата би го спречила создавањето балони на финансискиот пазар или болните крахови што неизбежно следуваат. За среќа или за жал, тоа е работа што обично ја врши самиот пазар следејќи ги сопствените движења, вклучувајќи го и минатогодишното бришење криптовалути од два трилиони долари што ја уништи империјата FTX на Банкмен-Фрид.

„Да се ​​потсетиме дека водел 'безбедна и регулирана' берза, а ниту еден регулатор не го фатил“, објави на платформата X Ерик Ворхис, ран застапник за криптовалутите, по пресудата на поротата против Банкмен-Фрид. „Таа заслуга му припаѓа на пазарот, кој не само што е голем извор на иновации туку и најдобар арбитер за дисциплина и правда“.

Банкмен-Фрид седи во затворска ќелија во Бруклин, Њујорк, чекајќи да открие колку години ќе помине зад решетки.

 

 

* Додаден е делот за Чангпенг Жао од „Бајненс“ што не е споменат во оригиналот.