Етерот и соланата го предводат падот кај криптовалутите, бидејќи загриженоста за ескалација на конфликтот на Блискиот Исток ги тера инвеститорите да се повлечат од поризични средства.
Етерот, втората најголема криптовалута според пазарната вредност по биткоинот, падна до осум отсто пред делумно да го ублажи падот. Соланата падна за повеќе од седум отсто во еден момент, додека падот на карданото достигна до 8,5 отсто. Сите овие токени претходно беа во пораст во понеделникот.
Биткоинот, кој сочинува повеќе од 60 отсто од пазарната вредност на дигиталните средства, ослабе за околу 3,8 отсто и достигна 104.743 долари. Водечката криптовалута падна во шест од последните седум дена.
„Тековниот пад на цените на алткоините е резултат на миксот од макроекономска неизвесност и пазарна динамика“, изјави Винсент Лиу, главен инвестициски директор на криптоинвестициската фирма КР (Kronos Research). „Последниот пад на биткоинот и зголемените геополитички тензии, како неодамнешните случувања во надворешната политика на САД, придонесуваат за овој пад“.
Според податоци од „Коинглас“ (Coinglass), во последните 12 часа се ликвидирани повеќе од 230 милиони долари т.н. „долги“ позиции во криптовалути.
Загриженоста на инвеститорите дека ескалацијата на тензиите на Блискиот Исток може да доведе до подиректно вклучување на САД предизвика пад и кај акциите и кај другите ризични средства.
Овој пад кај криптовалутите претставува уште еден удар за наративот дека биткоинот е „сигурно прибежиште“ во време на нестабилност. Биткоинот и другите токени исто така паднаа кон крајот на минатата недела кога Израел започна воздушни напади врз Иран.
Клучниот закон за стабилни коини, за кој се очекува да се гласа во Конгресот во текот на денов, би можел или да ги ублажи или да ги влоши притисоците врз криптопазарот, велат трговците.
„Освен исцрпувањето на ликвидноста, гледаме и мало намалување на ризикот низ целиот пазар пред клучните настани неделава, вклучувајќи ги и денешното гласање за законот GENIUS, одлуката на Фед утре и тековните тензии со Иран“, изјави Џошуа Лим, глобален кодиректор за пазари во „Фалкон екс“ (FalconX).
.webp){kind=icon}
