Биткоинот се повлекува под 20.000 долари

Биткоинот бележи стабилно тргување под нивото од 20.000 долари, каде падна за прв пат од средината на јули, откако претседателот на Федералните резерви (ФЕД), Џером Пауел, истакна дека каматните стапки можеби ќе треба да останат покачени за да се елиминира инфлацијата.

Најголемиот токен утрово накратко падна за дури 2,3 отсто, на 19.527 долари, петти ден по ред. Биткоинот деновиве се лизна под психолошката граница од 20.000 долари по говорот на Пауел во петокот на конференцијата на банкари од американските централни банки, а потоа бргу се врати и се тргуваше стабилно околу тоа ниво. Акциите, исто така, паднаа низ Азија и Европа, заедно со американските фјучерси.

„Парите се излеваат од ризичните средства за тргување. Крипто валутите го следеа движењето на американската берза“, рече Циси Лу, главен извршен директор во консултантската фирма Вен Линк Партнерс (Venn Link Partners) по обраќањето на Пауел на годишната средба. 

Нивото од 20.000 долари делува како стабилна потпора за биткоинот, откако го достигна најниското ниво во последните месеци. Сепак, криптовалутата се тргуваше доста повисоко во последните неколку недели, кога во текот на август дури и надмина 25.000 долари. Но, тој нагорен раст беше прекинат поради загриженоста од зголемувањето на каматните стапки, па биткоинот загуби околу 20 проценти од својата вредност во последните две недели. Нестабилноста на вредноста на биткоинот доаѓа во услови на неизвесност во врска со интензитетот и висината на покачување на каматните стапки од страна на ФЕД и ефектот од тие потези што би можел да се прелее врз поризичните средства.

Етер, вториот по големина токен, денеска загуби дури 4,1 отсто од својата вредност и се тргува за 1.422,67 долари, продолжувајќи го падот од околу 2.000 долари, колку што вредеше пред неколку недели.

Во моментов нема коментари за веста. Биди прв да коментира...

Остави коментар